ސީލައިފް ފްލެޓްތަކުގެ މައްސަލައިގައި ހިޔާނާތުގެ ދައުވާ އުފުލާފައިވާ އެ އެ ކުންފުނީގެ ވެރިޔާ އަހުމަދު މޫސާ މުހައްމަދު (އަންމަޓީ) ބަންދުން ދޫކޮށްލަން ކްރިމިނަލް ކޯޓުން ނިންމި ނިންމުން ހައި ކޯޓުގައި އިސްތިއުނާފު ކުރަން ޖެހޭ މުއްދަތުގެ ތެރޭގައި ނުކުރުމުން އޭނާ ސަލާމަތް ވެއްޖެ އެވެ.
އަންމަޓީ ދޫކޮށްލަން ކްރިމިނަލް ކޯޓުން އަމުރު ކުރީ މާޗް 20، ގަ އެވެ. ޖިނާއީ އިޖުރާއަތުގެ ގާނޫނުގައިވާ ގޮތުން 48 ގަޑިއިރުގެ ތެރޭގައި ބަންދު އަމުރުގެ މައްސަލަތައް އިސްތިއުނާފް ކުރަން ޖެހެ އެވެ. ދައުލަތުން މި މައްސަލަ ހައި ކޯޓުގައި އިސްތިއުނާފް ކުރީ މާޗް 23، ގަ އެވެ.
ހައި ކޯޓުގައި މި މައްސަލަ ބެއްލެވި ތިން ފަނޑިޔާރުންގެ އިއްތިފާގުން މިއަދު ހުކުމް ކުރެއްވީ ޖިނާއީ އިޖުރާއަތުގެ ގާނޫނުގައިވާ އިސްތިއުނާފުގެ މުއްދަތު ފާއިތުވި ފަހުން ހުށަހެޅި މައްސަލައަކަށް ވާތީ މި މައްސަލަ އިޖުރާއީ ގޮތުން ކުރިއަށް ގެންދެވެން ނެތް ކަމަށެވެ.
އެގޮތަށް ކަނޑައެޅުއްވުމުގައި ފަނޑިޔާރުން ވަނީ ގާނޫނުގައި މުއްދަތު ގުނުމުގައި ބަލަނީ ދުވަހަށްތޯ ނޫނީ ސީދާ ގަޑިއަށްތޯ ބައްލަވައިފަ އެވެ. ހުކުމް އިއްވަމުން ފަނޑިޔާރު ވިދާޅުވީ ހައްޔަރު ކުރުމާއި ބަންދު ކުރުމުގައި އަބަދު ވެސް އަމަލު ކުރަނީ އެ ކަމެއް ވުމަށް ފަހު ސީދާ ގަޑިއިރަށް ބަލައިގެން ކަމުގަ އެވެ.
އަންމަޓީ ދޫކޮށްލަން ކްރިމިނަލް ކޯޓުން އަމުރުކުުރީ އޭނާގެ މައްޗަށް ޝަރުތުތަކެއް ކަނޑައެޅުމަށް ފަހު އެވެ. މީގެ ކުރިން ވެސް ދެ ފަހަރެއްގެ މަތިން އަންމަޓި ވަނީ ބަންދުން ދޫކޮށްލާފަ އެވެ. ނަމަވެސް، އެ ފަހަރުތަކުގައި ހައި ކޯޓުން އެ އަމުރުތައް ބާތިލުކޮށް އޭނާ ބަންދު ކުރި އެވެ.
އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް، ހަވާލުކޮށްފައި ވަނިކޮށް އެއްބަސްވުމުގައިވާ މުއްދަތުގައި ހައުސިން ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، މަކަރާއި ހީލަތުން އެކި މީހުން އަތުން ބޮޑެތި އަދަދުތަކުން ފައިސާ ނަގައި، އެ ފައިސާއަށް ހިޔާނާތްތެރިވެފައިވާ ކަަމުގެ ތުހުމަތު އަންމަޓީގެ މައްޗަށް ކުރެވުނެވެ.
އެ ތުހުމަތުގައި އޭނާ ހޯދުމަށް ރެޑް ނޯޓިސް ވެސް ނެރެފައިވަނިކޮށް އޭނާ ހައްޔަރުކުރީ ލަންކާގައި ފިލައިގެން އުޅެނިކޮށެވެ.
އަންމަޓީގެ މައްޗަށް ހިޔާނާތުގެ 42 ދައުވާއެއް އުފުލާފައިވެ އެވެ. އެ ހުރިހާ މައްސަލައެއްގެ ވެސް ޝަރީއަތް ކުރިއަށް ދަނީ ވަކިވަކިންނެވެ. އެއީ، އޭނާ ހިޔާނާތްތެރިވި ކޮންމެ މީހެއްގެ މައްސަލަ ވަކިންނެވެ.
