ދުނިޔޭގައި ވެސް ވަރަށް މަދުން ނޫނީ ނުފެންނަ ހަމުގެ ބައްޔެއް ކަމަށްވާ "ހެލްކުއިން އައިޗްތިއޯސިސް ޖެނެޓިކް ޑިސްއޯޑާ" ތަހައްމަލު ކުރަމުންދިޔަ، ޔޫނުސް ލަޔަކް ފަރަހް މިއަދު ނިޔާވެއްޖެ އެވެ.
އިންޑިއާގެ ބެންގަލޫރުގައި ހުންނަ ރެއިންބޯ ހޮސްޕިޓަލުގެ އައިސީޔޫގައި ފަރުވާދެމުން އަންނަނިކޮށް މިއަދު ހެނދުނުގެ ވަގުތެއްގައި ލަޔަކް، 1، ނިޔާވިކަން އޭނާގެ މަންމަ، ހައްވާ އުލާ ކުރި ފޭސްބުކް ޕޯސްޓެއްގައި ވަނީ ހާމަކޮށްފަ އެވެ.
ލަޔަކަށް ލޭގެ އިންފެކްޝަން ޖެހި އައިސީޔޫއަށް ލާފައި ވަނީ މި މަހުގެ އެއްވަނަ ދުވަހު އެވެ.
ހެލްކުއިން އައިޗްތިއޯސިސްއަކީ ދުނިޔެއިން މަދުން ނޫނީ ނުފެންނަ ޖެނެޓިކް ބައްޔެކެވެ. މިބަލީގެ ސަބަބުން ލަޔަކްގެ މުޅި ގައިގެ ހަންގަނޑު ބޯވެފައި ހުރުމުގެ އިތުރުން މޫނުގެ ސިފައަށް ބަދަލު އައިސް ނޭވާލާން އުނދަގޫވި އެވެ.
މި ބައްޔަށް ފަރުވާއެއް ނެތް ނަމަވެސް އުލާގެ ދެމަފިރިން ދިޔައީ ލަޔަކް ތަހައްމަލް ކުރަމުންދިޔަ ވޭނަށް ލުޔެއް ހޯދާދެވޭތޯ އެތައް ގޮތަކުން މަސައްކަތް ކުރަމުންނެވެ. އެގޮތުން، ފަރުވާއަށް އާންމުންގެ ފަރާތުން އެހީއަށް އެދުމުން ލައްކަ އަކަށްވުރެ ގިނަ ފައިސާ ލިބުނެވެ.
ލަޔަކް ގޮވައިގެން ބޭރަށް ދިޔައީ ނިއުމޯނިއާ ޖެހި، ހަންގަނޑު ވެސް ވަރަށް ބޮޑަށް އިންފެކްޓުވެގެން އިތުރު ފަރުވާއަށެވެ. ލޭގެ އިންފެކްޝަން ޖެހިފައި ހުރިކަން އެނގުނީ އެ ހޮސްޕިޓަލުން ހެދި ޓެސްޓަކުން ކަމަށް ލަޔަކްގެ މަންމަ މީގެ ކުރިން ބައެއް ނޫސްތަކަށް ދީފައިވާ އިންޓަވިއުގައި ބުނެފައިވެ އެވެ.
ލަޔަކް އަކީ އުލާއަށް ލިބުނު މި ބަލި ހުންނަ ދެވަނަ ކުއްޖާ އެވެ. މި ބަލި ހުންނަ ފުރަތަމަ ކުއްޖާ ލިބިފައި ވަނީ މީގެ 11 އަހަރު ކުރިންނެވެ. އެއީ އުލާގެ ދެމަފިރިންގެ އަލަތު ފަރިފުޅެވެ. ފުރަތަމަ ދަރިފުޅު ވިހެއިތާ ހަ މަސް ތެރޭގައި މަރުވެފައި ވާއިރު އެކުއްޖާ މަރުވެފައި ވަނީ އިންޑިއާގެ ޓްރިވެންޑްރަމްގެ ކިމްސް ހޮސްޕިޓަލްގައި ފަރުވާދެމުން ދަނިކޮށެވެ.
އެ އާއިލާއަށް ލިބުނު ދެވަނަ ދަރިފުޅަކީ އެހެން ކުދިންނެކޭ ވެސް އެއްފަދައިން ސިއްހަތު ރަނގަޅު ކުއްޖެކެވެ. ނަމަވެސް، ތިންވަނައަށް ލިބުނު ލަޔަކް އަކީވެސް ހަމަ ފުރަތަމަ ދަރިފުޅުގެ ހުރި ބަލި ހުންނަ ކުއްޖެއްކަން އެ އާއިލާއަށް އެނގުނީ ލަޔަކް ވިހޭފަހުން ކަމަށް އާއިލާއިން ބުނެ އެވެ.
