ރައްޔިތުންގެ މަޖިލީހުގައި ސުޕަމެޖޯރިޓީ އޮންނަ އެމްޑީޕީގެ ޗެއާޕާސަން ހޮވުމުގެ އިންތިހާބުގެ ކެމްޕޭން ފެށި ފަހުން، އެ ކެމްޕޭންގެ އެންމެ ވަރުގަދައަށް ކުރިއަށްދާ އެއް ތަނަކީ ރައްޔިތުންގެ މަޖިލީހެވެ. ފަހަކަށް އައިސް މަޖިލީހުގެ ތަޅުމުގައި ކުރާ ކޮންމެ ބަހުސެއް ގޮސް ޖެހެނީ ޗެއާޕާސަން ހޮވުމުގެ ކެމްޕޭނުގަ އެވެ.
މަޖިލީހުގެ މިއަދުގެ ޖަލްސާގައި އެ ބަހުސް ފުރަތަމަ ފެށްޓެވީ މެދު ހެންވޭރު ދާއިރާގެ މެމްބަރު އަދި އެމްޑީޕީގެ ޕާލަމެންޓްރީ ގްރޫޕްގެ ކުރީގެ ލީޑަރު އަލީ އާޒިމެވެ. ސަރުކާރުގެ ފަރާތުން ދުވާފަރު ދާއިރާގެ އެމްޑީޕީ މެމްބަރު އިސްމާއީލް އަހުމަދު ހުށަހަޅުއްވާފައިވާ ކުންފުނީގެ ބިލުގެ ބަހުސްގައި އާޒިމްގެ ފާޑުވިދާޅުވުންތައް އެންމެ ބޮޑަށް އަމާޒުކުރެއްވީ އެމްޑީޕީގެ ޗެއާޕާސަން ކަމަށް ކުރިމަތިލައްވާފައިވާ އިކޮނޮމިކް މިނިސްޓަރު ފައްޔާޒް އިސްމާއީލަށެވެ.
އެމްޑީޕީގެ އެތެރޭގެ އިންތިހާގައި ފައްޔާޒު ބޭނުންކުރައްވާ ކެމްޕޭން މޮޓޯ "ހިންގާލަން" މި ލަފުޒު ވާކައިގެ ތެރެއަށް ގެންނަވައި، އާޒިމް އެއަށް ޖޯކު ޖެއްސެވި އެވެ.
"ދައުލަތް ހިންގާލަން، ސަރުކާރު ހިންގާލުމުގެ ވިސްނުމުގައި 12 ކުންފުނި އެބަ އޮތް މި ތިން އަހަރުގެ ތެރޭ އުފައްދާފައި. ދެން އަޅުގަނޑު ބަލައިލި އިރުގައި، ހިންގާލުމުގެ ޑެފިނިޝަނަކަށް މި އޮންނަނީ ޖީބު ބޮޑުކުރުން، ދައްކާ ވާހަކައާ ކުރާ ކަންތަކާ ދިމާ ނުވުން،" އާޒިމް ވިދާޅުވި އެވެ.
އާޒިމް އެގޮތަށް ވާހަކަ ކުރިއަށް ގެންދަވަން ފެއްޓެވުމުން ނިޒާމާ ބެހޭ ނުކުތާއެއް ކަމަށް ވިދާޅުވެ، ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފު އެކަން ފާހަގަވެސް ކުރެއްވި އެވެ. އާޒިމްގެ ވާހަކަ ނިންމަވައިލެއްވި ފަހުން ވެސް ފައްޔާޒަށް ތާއީދުކުރައްވާ މެމްބަރުން އޭނާއާ "ދިމާކުރުމުގެ" ވާހަކަތައް ދައްކަވާ އަޑު އިވުނެވެ.
ބައެއް މެމްބަރުން ވިދާޅުވާ އަޑު އިވުނީ އެމްޑީޕީގެ ޕީޖީ ލީޑަރުކަން އާޒިމަށް މިފަހަރު ލިބިވަޑައިނުގެންނެވުމުން "ވަރަށް ހާޓްވެފައި" ހުންނެވި ކަމަށެވެ.
މިއަދުގެ ހާޒިރީ
- ހާޒިރުވެވަޑައިގެންނެވީ: 26 މެމްބަރުން
- ސަލާމުގައި: 07 މެމްބަރުން
- ރަސްމީ ދަތުރުތަކުގައި: 02 މެމްބަރުން
ބަހުސްގައި އޭގެ ފަހުން ސަނީފަށް ލިބިވަަޑައިގެންނެވި ފުރުސަތުގައި ވެސް އޭނާ އާޒިމަށް ރައްދު ދެއްވި އެވެ. އާޒިމް އެގޮތަށް ވާހަކަ ދައްކަވަން ފުރުސަތު ދެއްވީތީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ވެސް އޭނާ ފާޑުވިދާޅުވި އެވެ.
"ކުރީގެ ޕީޖީ ލީޑަރު، ޚުދުމުޚުތާރު ސިޔާސަތެއްގެ ދަށުން، އަޅުގަނޑުމެންގެ ޕާޓީގެ އިއްޒަތްތެރި ރައީސް ހުރެމެ، އެފަދަ ވާހަކަތަކެއް މިމަޖިލީހުގައި ދައްކަން ފުރުސަތު ދެއްވިކަމީ އަޅުގަނޑު ހަމަ ހިތާމަކުރާ ކަމެއް. އެއީ މި މަޖިލީހުގެ ތަޅުމަކީ އެތެރޭގެ އިންތިހާބެއްގެ ކެމްޕޭނެއް.." ސަނީފުގެ ވާހަކަ މިހިސާބަށް ގެންދަވާ އިރަށް ރިޔާސަތުން ނަޝީދު އިންޓަރަޕްޓް ކުރެއްވި އެވެ.
ދުވަހުގެ ފޮޓޯ
ރައްޔިތުންގެ މަޖިލީހުގެ މިއަދުގެ ޖަލްސާގައި ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފު ވާހަކަ ދައްކަވަނީ.
ދުވަހުގެ ކޯޓޭޝަން
ކުރީގެ ޕީޖީ ލީޑަރު، ޚުދުމުޚުތާރު ސިޔާސަތެއްގެ ދަށުން، އަޅުގަނޑުމެންގެ ޕާޓީގެ އިއްޒަތްތެރި ރައީސް ހުރެމެ، އެފަދަ ވާހަކަތަކެއް މިމަޖިލީހުގައި ދައްކަން ފުރުސަތު ދެއްވިކަމީ އަޅުގަނޑު ހަމަ ހިތާމަކުރާ ކަމެއް. އެއީ މި މަޖިލީހުގެ ތަޅުމަކީ އެތެރޭގެ އިންތިހާބެއްގެ ކެމްޕޭނެއް [ކުރިއަށް ގެންދަން އޮތް ތަނެއް ނޫންވީމާ]-- ސަނީފް
އެމަނިކުފާނު ވިދާޅުވީ މަޖިލީހުގައި ވާހަކަ ކުރިއަށް ގެންދަވަން މެމްބަރަކަށް ފުރުސަތު ދެއްވަނީ ވަކި މެމްބަރަކު ރުހިވަޑައިގަންނަވާ ގޮތަށް ވާހަކަ ދައްކަވާ އިރުގައި އެކަނި ނޫން ކަމަށެވެ.
ނަޝީދުގެ އެވާހަކަފުޅަށް ފަހު ވެސް ސަނީފު ވިދާޅުވީ މަޖިލީހުގެ ތަޅުމަކީ އެމްޑީޕީގެ އެތެރޭގެ އިންތިހާބުގެ ކެމްޕޭންކުރާ ތަނަކަށް ވުމަކީ ހިތާމަކުރައްވާ ކަމެއް ކަމަށެވެ. އެހިސާބުން އެމަނިކުފާނު ދެވަނަ ފަހަރަށް އިންޓަރަޕްޓްކުރައްވައި ވިދާޅުވީ އާޒިމް ދެއްކެވީ ސަރުކާރުން ކުންފުނިތައް އުފެއްދި ގޮތްތަކާ ބެހޭ ވާހަކަތަކެއް ކަމަށާއި އެވާހަކަ އެހެން ކަމަކާ ގުޅުއްްވައިލެއްވީ ސަނީފު ކަަމަށެވެ.
އެހެން ވިދާޅުވުމުން ސަނީފު ވެސް ރާގު ބަދަލުކުރައްވައި ސީދާ ޒާތީ ގޮތުން އާޒިމަށް ބަހުގެ ހަމަލާތައް ރައްދު ކުރެއްވި އެވެ.
