ޕާކިސްތާނުގެ ބޮޑު ވަޒީރު އިމްރާން ހާންގެ އިތުބާރު ނެތް ކަމުގެ މައްސަލަ ޕާލިމެންޓުން ބޭރުކޮށް، ޕާލިމެންޓު އުވާލުމާ އެކު، އެމަނިކުފާނުގެ ކުރިމަގާ މެދު ގޮތް ނިންމަން ސުޕްރީމް ކޯޓަށް ހިނގައްޖެ އެވެ.
މިދިޔަ ހަފްތާގައި އިމްރާން ހާން ވަނީ ޕާކިސްތާނުގެ ދާހިލީ ކަންކަމަށް އެމެރިކާއިން ނުފޫޒު ފޯރުވާ ކަމަށް ވިދާޅުވެފަ އެވެ. ޕާކިސްތާނުގެ ނޫސްތަކުން ބުނީ އެމެރިކާއިން ޕާކިސްތާނަށް ކަނޑައަޅާފައި ހުންނަ ސަފީރު އިމްރާން ހާނަށް ފޮނުއްވި ސިޓީއެއްގައި، އެމަނިކުފާނު މަގާމުން ވަކިވެއްޖެ ނަމަ ދެ ގައުމުގެ ގުޅުން މިހާރަށް ވުރެ ރަނގަޅު ވާނެ ކަމަށް ވިދާޅުވި ކަމަށެވެ. ނަމަވެސް އެމެރިކާއިން އެކަން ދޮގުކުރެ އެވެ.
ބޭރުގެ ނުފޫޒާ އެބަ އޮތް ކަމަށް ބުނެ އިތުބާރު ނެތް ކަމުގެ މައްސަލަ ޕާލިމެންޓުން ބޭރު ކުރުމުން، އިދިކޮޅު ފަރާތްތަކުން ވަނީ އެ ނިންމުމަކީ ގާނޫނު އަސާސީއާ ހިލާފު ނިންމުމެއް ކަމަށް ކަނޑައަޅައި ދިނުމަށް އެދި ސުޕްރީމް ކޯޓަށް ހުށަހަޅާފަ އެވެ.
މައްސަލައިގައި ސުޕްރީމް ކޯޓުން ހޯމަ ދުވަހު ގޮތެއް ނިންމާނެ ކަމަށް ބެލެވެ އެވެ.
އިމްރާން ހާން ވިދާޅުވީ ޕާކިސްތާނުގެ އިދިކޮޅު ގްރޫޕްތަކުން އެމެރިކާއާ ގުޅިގެން މަސައްކަތް ކުރަނީ، ދުނިޔޭގެ ބޮޑެތި މައްސަލަތަކުގައި އެމެރިކާ އާ އެއް ވިސްނުމެއް އެމަނިކުފާނު ނުގެންގުޅޭތީ ކަމަށެވެ. އެގޮތުން, ޗައިނާ އާއި ރަޝިއާގެ މައްސަލަ ފާހަގަކުރެއްވި އެވެ.
ޕާކިސްތާނުގެ އިދިކޮޅުގައި އުޅެނީ މުސްލިމް ލީގް-އެން (ޕީއެމްއެލް-އެން) އަދި ޕާކިސްތާން ޕީޕަލްސް ޕާޓީ (ޕީޕީޕީ) އެވެ.
