އިސްލާމްއާބާދް، ޕާކިސްތާން (އެޕްރީލް 3) - ޕާކިސްތާނުގެ ބޮޑު ވަޒީރު އިމްރާން ހާންއާ ދެކޮޅަށް ހުށަހެޅި އިތުބާރު ނެތްކަމުގެ މައްސަލަ ޕާލިމެންޓުން ބޭރުކޮށްލުމާ އެކު، ރައީސްގެ އަރިހުގައި ދަންނަވައި ޕާލިމެންޓް އުވާލުމަށް ފަހު، އާ އިންތިހާބަކަށް ސަރުކާރުން ތައްޔާރުވެއްޖެ އެވެ.
ޕާލިމެންޓް އުވާލުމާ އެކު ކުރިއަށް އޮތް ތިން މަހުގެ ތެރޭގައި އާ އިންތިހާބުގެ ވޯޓުލުން ބާއްވަން ޖެހޭނެ އެވެ.
އިތުބާރު ނެތްކަމުގެ މައްސަލަ ޕާލިމެންޓުން ބޭރުކޮށްލީ އެ މައްސަލައިގައި ބޭރު ގައުމުތަކުން ނުފޫޒު ފޯރުވަމުންދާ ކަމަށް ވިދާޅުވެ، ޕާލިމެންޓުގެ ނައިބު ރައީސް އަސަދު ގައިސަރެވެ.
އެކަން އިއުލާނު ކުރިތާ ކުޑައިރުކޮޅެއް ފަހުން ޓީވީ މެދުވެރިކޮށް ދެއްވި ހިތާބެއްގައި އިމްރާން ހާން ވިދާޅުވީ ޕާލިމެންޓު އުވާލައްވަން ރައީސްގެ އަރިހުގައި އެދިވަޑައިގެންފައިވާ ކަމަށެވެ.
"އަޅުގަނޑުމެން އާއްމުންގެ ކައިރިއަށް ގޮސް އިންތިހާބު ބާއްވާނަން. ގޮތް ނިންމާނީ ގައުމުން،" އެމަނިކުފާނު ވިދާޅުވި އެވެ.
ޕާކިސްތާނުގެ ތާރީހުގައި އެއްވެސް ބޮޑު ވަޒީރަކު ދައުރު ފުރިހަމަ ކުރައްވާފައެއް ނުވެ އެވެ. އިމްރާން ހާން އެ މަގާމަށް އިންތިހާބުވެވަޑައިގެންނެވީ 2018 ވަނަ އަހަރު އެވެ.
އިތުބާރު ނެތްކަމުގެ ވޯޓަކީ އެމަނިކުފާނުގެ ދައުރުގައި މިހާތަނަށް ކުރިމަތިވާ އެންމެ ބޮޑު ގޮންޖެހުމެވެ. އިދިކޮޅު ފަރާތްތަކުން ތުހުމަތު ކުރަނީ ސަރުކާރުގެ ހާރިޖީ ސިޔާސަތު ހަމަނުޖެހޭ ކަމަށާއި އިގްތިސާދު ވެސް މެނޭޖު ނުކުރެވޭ ކަމަށެވެ.
މިދިޔަ ހަފްތާގައި އިމްރާން ހާން ވަނީ ޕާކިސްތާނުގެ ދާހިލީ ކަންކަމަށް އެމެރިކާއިން ނުފޫޒު ފޯރުވާ ކަމަށް ވިދާޅުވެފަ އެވެ. ޕާކިސްތާނުގެ ނޫސްތަކުން ބުނީ އެމެރިކާއިން ޕާކިސްތާނަށް ކަނޑައަޅާފައި ހުންނަ ސަފީރު އިމްރާން ހާނަށް ފޮނުއްވި ސިޓީއެއްގައި، އެމަނިކުފާނު މަގާމުން ވަކިވެއްޖެ ނަމަ ދެ ގައުމުގެ ގުޅުން މިހާރަށް ވުރެ ރަނގަޅު ވާނެ ކަމަށް ވިދާޅުވި ކަމަށެވެ.
ނަމަވެސް, ސްޓޭޓް ޑިޕާޓްމަންޓްގެ ތަރުޖަމާނު ނެޑް ޕްރައިސް ވިދާޅުވީ އެއީ ދޮގު ހަބަރެއް ކަމަށާއި އިމްރާން ހާންގެ ތުހުމަތުގައި ވެސް އެއްވެސް ހަގީގަތެއް ނުވާ ކަމަށެވެ.
އިމްރާން ހާން ވިދާޅުވީ ޕާކިސްތާނުގެ އިދިކޮޅު ގްރޫޕްތަކުން އެމެރިކާއާ ގުޅިގެން މަސައްކަތް ކުރަނީ، ދުނިޔޭގެ ބޮޑެތި މައްސަލަތަކުގައި އެމެރިކާ އާ އެއް ވިސްނުމެއް އެމަނިކުފާނު ނުގެންގުޅޭތީ ކަމަށެވެ. އެގޮތުން, ޗައިނާ އާއި ރަޝިއާގެ މައްސަލަ ފާހަގަކުރެއްވި އެވެ.
ޕާކިސްތާނުގެ އިދިކޮޅުގައި އުޅެނީ މުސްލިމް ލީގް-އެން (ޕީއެމްއެލް-އެން) އަދި ޕާކިސްތާން ޕީޕަލްސް ޕާޓީ (ޕީޕީޕީ) އެވެ.
