ހިޔާ ޓަވަރުތައް ކައިރީ ކާބޯތަކެތީގެ ހިދުމަތް ދިނުން ވަގުތުން ހުއްޓާލާ މޭޒުތައް ނެގުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު އަންގައިފި އެވެ.
އެޗްޑީސީން ބުނީ ހިޔާ ފްލެޓްތައް ހުންނަ ސަރަހައްދަކީ ވަރަށް ގިނަ ކޮންސްޓްރަކްޝަން މަސައްކަތް ކުރާ ސަރަހައްދެއް ކަމަށެވެ.
އެހެންކަމުން ކާބޯތަކެތި ވިއްކުމުގެ ހިދުމަތް ދޭއިރު ހުންނަންޖެހޭ ސާފުތާހިރު ކަމުގެ މިންގަނޑުތައް ދަށް ކަމަށް އެ ކޯޕަރޭޝަނުން ވަނީ ބުނެފަ އެވެ. އަދި، އޭގެ ސަބަބުން ބަލިމަޑުކަމެއް ކުރިމަތިވެދާނެ ކަމަށް ވެސް އެޗްޑީސީ އިން ބުންޏެވެ.
"އެ ސަރަހައްދުގައި ކާބޯތަކެތީގެ ހިދުމަތް ދޭން ބަހައްޓާފައި ހުރި ތަކެތި މާދަމާ އިން ފެށިގެން މިމަހުގެ 10 ވަނަ ދުވަހުގެ ނިޔަލަށް ނަގައި، ތަން ސާފުކޮށް ހިދުމަތް ހުއްޓާލަން އަންގަން،" އެޗްޑީސީން ބުންޏެވެ.
މިދިޔަ އަހަރު މީހުން ދިރިއުޅެން ފަށާފައިވާ ހިޔާގެ އެކި ޓަވަރުތަކުގެ ބޭރުގައި ހަވީރު ވަގުތު ހެދިކާ ވިއްކުމުގެ ވިޔަފާރި ގިނަ ބަޔަކު ދަނީ ކުރަމުންނެވެ.
އެގޮތުން، ދެ ޓަވަރު ދޭތެރޭ އަދި އެ ސަރަހައްދުގެ ބީޗުގައި ވެސް ކާބޯތަކެތި ވިއްކަ އެވެ.
