ޕާކިސްތާނުގެ ޕާލިމެންޓު އުވާލަން ބޮޑު ވަޒީރު އިމްރާން ހާން އެ ގައުމުގެ ރައީސް އާރިފް އަލްވީއަށް ލަފާ އަރުވައިފި އެވެ.
ޓީވީ މެދުވެރިކޮށް ދެއްވި ހިތާބެއްގައި އިމްރާން ހާން ވިދާޅުވީ ލަފައާ އެއް ގޮތަށް ޕާލިމެންޓު އުވާލުމާ އެކު އިންތިގާލީ ސަރުކާރެއް ގާއިމް ކުރުމުގެ މަސައްކަތް ފަށާނެ ކަމަށެވެ.
ޕާލިމެންޓު އުވާލަން އެދިވަޑައިގެންނެވީ، އިމްރާން ހާންގެ އިތުބާރު ނެތްކަމުގެ މައްސަލައެއްގައި އާދީއްތަ ދުވަހު ބަހުސްކޮށް، ވޯޓަށް އަހަން އިދިކޮޅު ހުށަހަޅާފައި ވަނިކޮށެވެ.
ނަމަވެސް ޕާލިމެންޓުން ނިންމީ އެ މައްސަލައިގެ ތެރެއަށް ބޭރު ގައުމަކުން ނުފޫޒު ފޯރުވާ ކަމަށް ބެލެވޭތީ، މައްސަލަ ބަލައިނުގަތުމަށެވެ.
ޕާކިސްތާނުގެ ތާރީހުގައި އެއްވެސް ބޮޑު ވަޒީރަކު ދައުރު ފުރިހަމަ ކުރައްވާފައެއް ނުވެ އެވެ. އިމްރާން ހާން އެ މަގާމަށް އިންތިހާބުވެވަޑައިގެންނެވީ 2018 ވަނަ އަހަރު އެވެ.
އިތުބާރު ނެތްކަމުގެ ވޯޓަކީ އެމަނިކުފާނުގެ ދައުރުގައި މިހާތަނަށް ކުރިމަތިވި އެންމެ ބޮޑު ގޮންޖެހުމެވެ. އިދިކޮޅު ފަރާތްތަކުން ތުހުމަތު ކުރަނީ ސަރުކާރުގެ ހާރިޖީ ސިޔާސަތު ހަމަނުޖެހޭ ކަމަށާއި އިގްތިސާދު ވެސް މެނޭޖު ނުކުރެވޭ ކަމަށެވެ.
މިދިޔަ ހަފްތާގައި އިމްރާން ހާން ވަނީ ޕާކިސްތާނުގެ ދާހިލީ ކަންކަމަށް އެމެރިކާއިން ނުފޫޒު ފޯރުވާ ކަމަށް ވިދާޅުވެފަ އެވެ. ޕާކިސްތާނުގެ ނޫސްތަކުން ބުނީ އެމެރިކާއިން ޕާކިސްތާނަށް ކަނޑައަޅާފައި ހުންނަ ސަފީރު އިމްރާން ހާނަށް ފޮނުއްވި ސިޓީއެއްގައި، އެމަނިކުފާނު މަގާމުން ވަކިވެއްޖެ ނަމަ ދެ ގައުމުގެ ގުޅުން މިހާރަށް ވުރެ ރަނގަޅު ވާނެ ކަމަށް ވިދާޅުވި ކަމަށެވެ.
ނަމަވެސް, ސްޓޭޓް ޑިޕާޓްމަންޓްގެ ތަރުޖަމާނު ނެޑް ޕްރައިސް ވިދާޅުވީ އެއީ ދޮގު ހަބަރެއް ކަމަށާއި އިމްރާން ހާންގެ ތުހުމަތުގައި ވެސް އެއްވެސް ހަގީގަތެއް ނުވާ ކަމަށެވެ.
އިމްރާން ހާން ވިދާޅުވީ ޕާކިސްތާނުގެ އިދިކޮޅު ގްރޫޕްތަކުން އެމެރިކާއާ ގުޅިގެން މަސައްކަތް ކުރަނީ، ދުނިޔޭގެ ބޮޑެތި މައްސަލަތަކުގައި އެމެރިކާ އާ އެއް ވިސްނުމެއް އެމަނިކުފާނު ނުގެންގުޅޭތީ ކަމަށެވެ. އެގޮތުން, ޗައިނާ އާއި ރަޝިއާގެ މައްސަލަ ފާހަގަކުރެއްވި އެވެ.
ޕާކިސްތާނުގެ އިދިކޮޅުގައި އުޅެނީ މުސްލިމް ލީގް-އެން (ޕީއެމްއެލް-އެން) އަދި ޕާކިސްތާން ޕީޕަލްސް ޕާޓީ (ޕީޕީޕީ) އެވެ.
