ރޯދަ މަހާ ދިމާކޮށް ރާއްޖޭގެ ފަޅުރަށްރަށުން ގަވާއިދާ ހިލާފަށް ގިނަ އަދަދަކަށް ވެލި ނަގަމުންދާ ކަމުގެ ޝަކުވާތަކެއް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އަށް ލިބެމުންދާ ކަމަށާއި އެގޮތަށް ގަވާއިދާ ހިލާފަށް ވެލި ނަގާ މީހުންނާ ދެކޮޅަށް ފިޔަވަޅު އަޅާނެ ކަމުގެ އިންޒާރު އެ އެޖެންސީން ދީފި އެވެ.
މީހުން ނޫޅޭ ފަޅު ރަށްރަށާއި ވަރުވާއަށް ދޫކޮށްފައިވާ ރަށްރަށް އަދި ހިކިފަ ހުންނަ ތުނޑިތަކާއި ފިނޮޅު ފަދަ ތަންތަނުން ރޯދަ މަހާއި ދިމާކޮށް ގިނަ އަދަދަކަށް ވެލި ނަގަމުންދާ ކަމުގެ ޝަކުވާ ލިބެމުންދާ ކަމަށް އީޕީއޭއިން މިއަދު ނެރުނު ބަޔާނެއްގައި ބުނެފައިވެ އެވެ. އަދި، ކޮންމެ އަހަރަކު ވެސް ރޯދަ މަހާ ދިމާކޮށް މީހުންގެ ގެދޮރު ޒީނަތްތެރި ކުރުމަށް ވެލި ނަގާކަން އެ އެޖެންސީއަށް ފާހަގަވާ ކަމަށް އީޕީއޭއިން ބުނެ އެވެ.
އީޕީއޭއިން ބުނީ ގަވާއިދާ ހިލާފަށް ވެލި ނެގުމުގެ ސަބަބުން ގޮނޑުދޮށް ހަލާކުވެ ރަށް ގިރުމުގެ މައްސަލަތައް އިތުރަށް ގޯސްވެ، ތިމާވެށީގެ އެކިއެކި މައްސަލަތަކާއި ކުރިމަތިވާ ކަމަށެވެ.
އީޕީއޭއިން ބުނީ އެފަދަ މައްސަލަތަކަކީ ހައްލުކުރަން ހަރަދު ބޮޑު މައްސަލަތަކެއް ކަމަށެވެ.
އީޕީއޭއިން ބުނީ އެފަދަ ބޭނުންތަކަށް ވެލި ނަގަން ހާއްސަ ކުރެވިފައިވާ ވަކި ސަރަހައްދުތަކަކާއި ވަކި އުސޫލުތަކެއް އެ އެޖެންސީއިން ކަނޑައަޅާފައިވާ ކަމަށެވެ.
އެހެންކަމުން ވެލި ނަގަން ގާނޫނާއި ގަވާއިދުތަކުގެ ދަށުން ހުއްދަ ދީފައިވާ ތަންތަނުން ވެލި ނެގުމަށް އީޕީއޭ އިން އިލްތިމާސްކުރެ އެވެ. އެގޮތަށް އަމަލު ނުކުރާ ފަރާތްތަކާ މެދު ގާނޫނާ ގަވާއިދުތަކުގެ ދަށުން ފިޔަވަޅު އަޅާނެ ކަމުގެ އިންޒާރު ވެސް އީޕީއޭ އިން މިއަދު ވަނީ ދީފަ އެވެ.
