ތުރުކީ އާއި ރޮމޭނިއާގެ އައްސޭރިފަށުން މައިންތަކެއް ފެނުމުން، އެ ތަކެތި ނައްތާލުމުގެ މަސައްކަތް ކުރިއަށް ގެންގޮސްފި އެވެ.
ބްލެކް ސީ ކަނޑުން، ދެ ގައުމުގެ އައްސޭރިފަށާ ކައިރިން ފެނުނު މައިނުތަކަކީ، ބެލެވޭ ގޮތުގައި، ޔޫކްރެއިނުން އެ ހިސާބަށް ފޯރާފައިވާ ތަކެއްޗެވެ.
މިދިޔަ ހަފްތާގައި ރަޝިއާއިން ބުނީ ޔޫކްރެއިނުން ރަޝިއާ ސިފައިން ހުއްޓުވަން ބްލެކް ސީ ކަނޑުގެ އަޑިން ހަރުކުރި މައިނުތަކެއް ނެއްޓި، ދުރު ހިސާބުތަކަށް ހިނގައިދާނެ ކަމަށެވެ.
އެގޮތުން ރާޅުތަކާ އެކު ސްޓްރެއިޓްސް އޮފް ބޮސްފޮރަސް އަދި މެޑިޓެރޭނިއަން ކަނޑާ ހަމައަށް ވެސް މައިންތައް ހިނގައިދާނެ ކަމަށް ރަޝިއާއިން އިންޒާރު ދިނެވެ.
ހޯމަ ދުވަހު ތުރުކީގެ ޑިފެންސް މިނިސްޓްރީން ކުރި ޓްވީޓެއްގައި ބުނީ ބަލްގޭރިއާއާ ގުޅޭ ބޯޑަރު ކައިރިން، ބްލެކް ސީ ކަނޑުން، އިގްނިއާޑާގެ އައްސޭރިފަށާ ދިމާލުން މައިނެއް ފެނިފައިވާ ކަމަށެވެ.
އެ މައިން ރައްކާތެރިކަމާ އެކު ކޮންޓްރޯލްކޮށް، "ނިޔުޓްރަލައިޒް" ކުރުމުގެ މަސައްކަތް ކުރި ކަމަށް ރިޕޯޓުތައް ބުނެ އެވެ. ޑިފެންސް މިނިސްޓްރީން ފަހުން ބުނީ މައިން ނުގޮވާ ގޮތް ހަދާފައިވާ ކަމަށެވެ.
ހޯމަ ދުވަހު ރޮމޭނިއާގެ ޑިފެންސް މިނިސްޓްރީން ވެސް ބުނީ އައްސޭރިފަށުގައި އޮންނަ ކަޕުލް މިދިއާ އަވަށާ 70 ކިލޯމީޓަރު ދުރުން ކަނޑުން މައިނެއް ފެނިފައިވާ ކަމަށެވެ. މަސް ދޯންޏަކަށް މައިނު ފެނި ރިޕޯޓު ކުރުމުން، އޭތި ވެސް ވަނީ ނުގޮވާ ގޮތް ހަދާފަ އެވެ.
ތުރުކީ ކައިރިން އެންމެ ފުރަތަމަ މައިނެއް ފެނުނީ ހޮނިހިރު ދުވަހު މަސްވެރިއަކަށެވެ. ތުރުކީގެ ޑިފެންސް މިނިސްޓަރު ވިދާޅުވީ މައިނުތަކުގެ މައްސަލައިގައި ސަރުކާރުން ޔޫކްރެއިނާއި ރަޝިއާއާ އެކު ވެސް ވާހަކަދައްކާފައިވާ ކަމަށެވެ.
