މި އަހަރު އޭޑީކޭ ހޮސްޕިޓަލުން 10 މިލިއަން ޑޮލަރު (154 މިލިއަން ރުފިޔާ)ގެ މަޝްރޫއު ކުރިއަށް ގެންދަން ނިންމާފައިވާ ކަމަށް އޭޑީކޭ ގުރޫޕްގެ ޗެއާމަން އަދި ޗީފް އެގްޒެކެޓިވް އޮފިސަރު އަހުމަދު ނާޝިދު ވިދާޅުވެއްޖެ އެވެ.
ރާއްޖޭގެ ފުރަތަމަ ޕްރައިވެޓް ހޮސްޕިޓަލްގެ ގޮތުގައި ހިދުމަތް ދޭން ފެށި އޭޑީކޭ ހޮސްޕިޓަލަށް 35 އަހަރު ފުރުން ފާހަގަކުރުމަށްޓަކައި ހެންވޭރު ދަނޑުގައި ރޭ ބޭއްވި ޖަލްސާގައި ނާޝިދު ވިދާޅުވީ މި އަހަރު ކުރިއަށް ގެންދަން ނިންމާފައިވާ މަޝްރޫއުތަކުގެ ތެރޭގައި އެންމެ ފަހުގެ އެމްއާރުއައި މެޝިނެއް ގެނެސް ހިދުމަތް ދިނުމާއި، ޑައިވިނަށް ގޮސްގެން ނޭވާލުމަށް ދަތިވާ މީހުންނަށް ފަރުވާ ދިނުމަށް ހާއްސަ ހައިޕަބެރިކް ޗެމްބަރެއް ގާއިމުކުރުން ހިމެނޭ ކަމަށެވެ.
އޭގެ އިތުރުން ވެލްނެސް ސެންޓަރެއް މި އަހަރު ހުޅުވަން ތައްޔާރުވަމުން އަންނަ ކަމަށް އޭނާ ވިދާޅުވި އެވެ.
"ހޮސްޕިޓަލަށް އައުމުގެ ބަދަލުގަ، ނައިސް ވެވޭތޯ ބެލުމުގެ ގޮތުން، އަޅުގަނޑުމެން ވެލްނެސް ކުލަބެއް، ހީޓް (ހީޓް ހެލްތު އެންޑް ފިޓްނެސް) އާ ގުޅިގެން މި އަހަރު ތެރޭ އިރާދަކުރެއްވިއްޔާ ހުޅުވާނަން،" އޭނާ ވިދާޅުވި އެވެ.
އެ ވެލްނެސް ސެންޓަރު ހުންނާނީ އޭޑީކޭ ހޮސްޕިޓަލްގަ އެވެ.
ސިއްހީ ފަރުވާއަށް ރަށްރަށުން މާލެ އަންނަ މީހުން ތިބުމަށް 21 ކޮޓަރި ހޮސްޕިޓަލް ތެރޭގައި ހަދައި މި އަހަރު ހުޅުވާނެ ކަމަށް ނާޝީދު ވިދާޅުވި އެވެ.
އުމުރުން ދުވަސްވީ މީހުންނަށް ހޮސްޕިޓަލުން ދޭ ފަރުވާ އިތުރަށް ކުރިއަރުވަން ނިންމާފައިވާ ކަމަށާއި ފިޒިއޮތެރަޕީ ސެންޓަރު ވެސް މިހާރަށް ވުރެ ތަރައްގީކުރަން ނިންމާފައިވާ ކަމަށް އޭނާ ވިދާޅުވި އެވެ.
މި އަހަރު ތެރޭގައި، ފާޓިލިޓީ ސެންޓަރަކާއި އިންޓަވެންޝަން އެންޑޮސްކޮޕީ ސެންޓަރެއް ވެސް ތަރައްގީ ކުރުމަށް ނިންމާފައިވާ ކަމަށް ނާޝިދު ވިދާޅުވި އެވެ. އަދި އެ ހޮސްޕިޓަލްގެ މެޑިކަލް ސްކޫލް، ޝާފިޔާ އިންސްޓިޓިއުޓް އޮފް ހެލްތު ރަސްމީކޮށް މިއަހަރު ހުޅުވުމަށް ވަނީ ނިންމައިފަ އެވެ.
"މި ޕްރޮޖެކްޓްތަކަކީ އޭގެ ޒާތުގަ، 10 މިލިއަން ޑޮލަރަށްވުރެ އަގު ބޮޑެތި މަސައްކަތްތަކެއް، އަޅުގަނޑުމެން އިރާދަކުރެއްވިއްޔާމުން މި މަސައްކަތްތައް ނިންމާލުމުން، އޭޑީކޭ ހޮސްޕިޓަލުގެ މިހާރު މި ކުރަމުންދާ މަސައްކަތް އިތުރަށް ފުޅާވެ، އަޅުގަނޑުމެންގެ މުވައްޒަފުންގެ އަދަދު އިތުރުވެ، އަޅުގަނޑުމެންނަށް މި މަސައްކަތާއިގެން ކުރިޔަށްދިޔުމުގައި ވަރަށް ބޮޑު އެހީތެރިކަމަކަށް ވެގެންދާނެ،" ނާޝިދު ވިދާޅުވި އެވެ.
އޭޑީކޭގައި މިހާރު 900 އެއްހާ މުވައްޒަފުން މަސައްކަތްކުރާއިރު، އޭގެ ތެރެއިން 450 އަށް ވުރެ ގިނަ މުވައްޒަފުންނަކީ ދިވެހިން ކަމަށާއި ހޮސްޕިޓަލުގެ ހަޔާތުގެ 35 އަހަރުގެ ހިދުމަތުގައި، އެތައް ބަޔަކު ގިނަ، ބުރަ މަސައްކަތްތަކެއް ކޮށްދީފައިވާ ކަމަށް ނާޝިދު ފާހަގަ ކުރެއްވެވި އެވެ.
