ފާއިތުވެދިޔަ ފެބްރުއަރީ މަސް ތެރޭ 80 މީހަކު އެކި މައްސަލަތަކާއި ގުޅިގެން ޖަލަށްލި އިރު، އޭގެ ތެރެއިން އެންމެ ގިނަ މީހުން ޖަލަށްލީ މަސްތުވާތަކެތީގެ މައްސަލަތަކުގައި ހުކުމް ތަންފީޒުކުރަން ކަމަށް މޯލްޑިވްސް ކަރެކްޝަނަލް ސާވިސްގެ ތަފާސްހިސާބުތަކުން ދައްކައިފި އެވެ.
ކަރެކްޝަންސް އިން މިއަދު އާންމުކުރި ފެބްރުއަރީ މަހުގެ ތަފާސްހިސާބުތައް ދައްކާ ގޮތުން އެމަސްތެރޭ ޖަލަށްލި 80 މީހުންގެ ތެރެއިން 64 މީހަކީ ހުކުމް ތަންފީޒުކުރަން ޖަލަށް ލި މީހުންނެވެ. އަދި 16 މީހުންނަކީ ޝަރީއަތް ފެށެން ދެން ޖަލަށްލި މީހުންނެވެ.
އެންމެ ގިނައިން ހުކުމް ތަންފީޒުކުރަން ޖަލަށްލާފައި ވަނީ މަސްތުވާތަކެތީގެ މައްސަލަތަކުގަ އެވެ. އެއަށްފަހު ދެން އެންމެ ގިނަ މީހުން ޖަލަށްލީ ވައްކަމާއި ލޫޓުވުމުގެ މައްސަލަތަކުގަ އެވެ.
އެއަށްފަހު އެންމެ ގިނަ މީހުން ޖަލަށްލީ ހުއްދަ ނެތި މުދާ އަތުލުމުގެ މައްސަލަތަކާއި ކުޑަކުދިންނާ ބެހުމުގެ މައްސަލަތަކުގައި އަދި ތޫނު އެއްޗިހި އާއްމު ތަންތަނުގައި ގެންގުޅުމުގެ މައްސަލަތަކުގަ އެވެ.
ކަރެކްޝަންސްއިން ބުނީ ފެބްރުއަރީ މަސް ތެރޭ 52 މީހަކު ޖަލުން ދޫކޮށްލާފައި ވާ ކަމަށެވެ. އޭގެ ތެރެއިން 23 މީހުން ދޫކުރީ ހުކުމް ތަންފީޒުކޮށް ނިމުމުންނެވެ.
އަދި ފަސް މީހުންނަށް ހުކުމް މާފުކޮށްދީ ދޫކޮށްލާފައިވެ އެވެ. ހަތް މީހަކު ދޫކުރީ ޕެރޯލްގެ ދަށުންނެވެ. އަދި 17 މީހަކު ދޫކުރީ ބަންދުން ދޫކުރަން ކޯޓުން ނިންމުމުންނެވެ.
