އުތުރު ކޮރެއާއިން އެންމެ ފަހުން ލޯންޗު ކުރި މިސައިލް ފެއިލްވެފައިވާ ކަމަށް ދެކުނު ކޮރެއާގެ އަސްކަރިއްޔާއިން ބުނެފި އެވެ.
އަންގާރަ ދުވަހު މިސައިލް ލޯންޗު ކުރީ ވެރިރަށް ޕިޔޯންގްޔޭންގްގެ ބޭރުގައި އޮންނަ އެއާފީލްޑަކުންނެވެ. މީގެ ކުރިން ވެސް ގިނަ ޓެސްޓުތަކެއް އެ އެއާފީލްޑުގައި ކުރި އެވެ.
ފަހަކަށް އައިސް އުތުރު ކޮރެއާއިން ވަނީ ހަތިޔާރު ޓެސްޓު ކުރުން ވަރަށް ބޮޑަށް އިތުރުކޮށްފަ އެވެ. އެހެންވެ، އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅު ވެސް ވަނީ ވަރުގަދަކޮށްފަ އެވެ.
މި އަހަރުގެ މިހާތަނަށް ނުވަ ހަތިޔާރު ޓެސްޓުކޮށްފައިވާ އިރު، އެއީ އެއް ބައްރު ހުރަސްކޮށް އަނެއް ބައްރަށް ފޯރާވަރުގެ ބެލިސްޓިކް މިސައިލަކާ ގުޅޭ ޓެސްޓުތަކެއް ކަމަށް އެމެރިކާއިން ބުނެ އެވެ.
އިންޓަ ކޮންޓިނެންޓަލް ބެލިސްޓިކް މިސައިލް (އައިސީބީއެމް) ދަތުރު ކުރާ އެންމެ ކުރު ހިސާބަކީ 5،500 ކިލޯމީޓަރެވެ. އުތުރު ކޮރެއާއިން ލޯންޗުކޮށްފި ނަމަ، އެފަދަ މިސައިލް އެމެރިކާއަށް ފޯރާނެ އެވެ. އޭގެ އިތުރުން އެއީ ނިޔުކްލިއާ ހަތިޔާރު އުފުލުމަށް ޑިޒައިންކޮށްފައިވާ މިސައިލެކެވެ.
އދ. އިން ވަނީ ބެލިސްޓިކް މިސައިލާއި ނިޔުކްލިއާ ހަތިޔާރު ޓެސްޓު ކުރުން އުތުރު ކޮރެއާއަށް މަނާކޮށްފަ އެވެ. ނަމަވެސް އެ ގައުމުން އެކަމަށް ފަރުވާލެއް ނުބަހައްޓަ އެވެ.
