ރޯދަ މަހަށް ހާއްސަކޮށްގެން "އަދަދު" ނޫހުން ތައްޔާރުކުރާ ދީނީ ޕްރޮގްރާމް ހުށަހަޅައިދެއްވާނީ ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ކަމަށް އެ ނޫހުގެ މެނޭޖްމެންޓުން މިއަދު ބުނެފި އެވެ.
ރޯދަ މަހުގެ ކޮންމެ ދުވަހަކު، "ސުންދުސް" ގެ ނަމުގައި ގެނެސްދޭ އެ ވީޑިއޯ ޕްރޮގްރާމް ނޫހުން އުފައްދަނީ އިލްމު އިންސްޓިޓިއުޓް ފޯ އިސްލާމިކް ސްޓަޑީސްއާ ގުޅިގެންނެވެ. އެކަމުގެ އެއްބަސްވުމުގައި "އަދަދު" އާއި އެ އިންސްޓިއުޓާ ދެމެދު ވަނީ މިހާރު ސޮއިކޮށްފަ އެވެ.
އެ ޕްރޮގްރާމުން އިޖުތިމާއީ އަހުލާގު ދިރުވުމަށް ބާރު ލިބޭ ހާއްސަ މެސެޖްތަކެއް ގެނެސްދޭނެ ކަމަށް އިލްމު އިންސްޓިއުޓުގެ ޑިރެކްޓަ ޖެނެރަލް ޑރ. ޝަހީމް ވިދާޅުވި އެވެ.
"އިޖުތިމާއީ އަހުލާގު އާލާކޮށް ދިރުވުމަށްޓަކައި އަދަދު އޮންލައިނުން އިސްނަންގަވައިގެން ސުންދުސް ޕްރޮގްރާމް ފައްޓަވަން ނިންމެވިކަމަށްޓަކައި ޝުކުރު ދަންނަވަން. އިސްލާމީ ރިވެތި އަހުލާގު އާލާކޮށް ދިރިވުމަށް މިއަދު ދިވެހި މުޖުތަމައު ވަނީ ވަރަށް ބޮޑަށް ބޭނުންވެފަ. މި ޕްރޮގްރާމަކީ އެކަމަށް ކޮށާލެވޭ ރާސްތާއަކަށް ވެގެން ދާނެ ކަމަށް އުންމީދުކުރަން،" ޝަހީމް ވިދާޅުވި އެވެ.
ސުންދުސްގެ އިތުރުން މި ރޯދަ މަހު "އަދަދު"ން ގިނަ ޝޯތަކެއް ގެނެސްދޭނެ އެވެ. އަދި އޮންލައިން ކޮންޓެންޓްގެ އިތުރުން ރޯދައަށް ހާއްސަ ޕްރިންޓް މެގެޒިނެއް ނެރުމަށް ވަނީ ނިންމައިފަ އެވެ.
