ދެކުނު ކޮރެއާގެ އިންތިހާބުގައި ވާދަކުރެއްވި މައި އިދިކޮޅު ކެންޑިޑޭޓް، ކޮންޒަވޭޓިވް ޕާޓީގެ ޔޫން ސުލް ޔޯލް ރައީސްކަމަށް އިންތިހާބުވެއްޖެ އެވެ.
ޑިމޮކްރެޓިކް ޕާޓީގެ ޕީ ޖޭ މިޔުންގްގެ މައްޗަށް ޔޫން ކުރި ހޯއްދެވީ އާއްމުންގެ މެދުގައި އޮންނަ ތަފާތު ކުރުން ނައްތާލުމުގެ ވައުދާއެކު އެވެ.
ޔޫން ވިދާޅުވީ "މިއީ ދެކުނު ކޮރެއާގެ ހިތްވަރު ގަދަ ރައްޔިތުންނަށް ލިބުނު ކާމިޔާބެއް" ކަމަށެވެ.
މިއީ ދެކުނު ކޮރެއާގެ ތާރީހުގައި ވެސް އެންމެ ވާދަވެރި އިންތިހާބެވެ. ރަސްމީ ނަތީޖާ ދައްކާ ގޮތުން ޔޫންއަށް ކުރި ލިބިވަޑައިގެންނެވީ އެންމެ ޕަސެންޓެކަށް ވުރެ ވެސް ކުޑަ ތަފާތަކުންނެވެ.
ބުރާސްފަތި ދުވަހުގެ ހެނދުނު ސަޕޯޓަރުންނާ މުހާތަބު ކުރައްވައި ޔޫން ވިދާޅުވީ "ރައްޔިތުންގެ ދިރިއުޅުމަށް ސަމާލުކަން ދީ، އެހީ ބޭނުންވާ ރައްޔިތުންނަށް ދައުލަތުން ފޯރުކޮށްދޭ ހިދުމަތް ރަނގަޅު ކުރާނެ" ކަމަށެވެ.
ކެމްޕެއިންގެ ތެރޭގައި ދެ ކެންޑިޑޭޓުންގެ ވެސް މަގްބޫލްކަން ކުޑަ ކަމަށް ޕޯލްތަކުން ދެއްކި އެވެ. އެހެން ނަމަވެސް ބުދަ ދުވަހުގެ އިންތިހާބުގައި 77 ޕަސެންޓު މީހުން ނުކުމެ ވޯޓުލި އެވެ.
ރައްޔިތުންގެ އެންމެ ކަންބޮޑުވާ މައްސަލަތަކެއްގެ ގޮތުގައި ފާހަގަވެފައި ވަނީ ބޯހިޔާވަހިކަމުގެ އަގު އުފުލުމާއި، އިގްތިސާދީ ކުރިއެރުން މަޑު ޖެހުމާއި، ޒުވާނުންނަށް ވަޒީފާ ނެތުމާއި، ޖިންސުގެ ނަހަމަކަމެވެ.
ޔޫންގެ ރިޔާސީ ވައުދެއްގެ ގޮތުގައި ހިމެނޭ އެއް ކަމަކީ މިނިސްޓްރީ އޮފް ޖެންޑާ އީކުއަލިޓީ އެންޑް ފެމިލީ އުވާލުމެވެ. ދައުލަތުގެ ބަޖެޓުން އެ މިނިސްޓްރީއަށް ލިބެނީ އެންމެ 0.2 ޕަސެންޓެވެ.
ޔޫންގެ ކެމްޕެއިންގައި ޒުވާން ފިރިހެނުންގެ ބޮޑު ތާއީދެއް ލިބިފައިވާ އިރު، ބައެއް ސަޕޯޓަރުން ދެކޭ ގޮތުގައި ދެކުނު ކޮރެއާގައި ޖިންސުގެ ނަހަމަކަމެއް ނޯވެ އެވެ.
ނަތީޖާއިން ދައްކާ ގޮތުގައި އިންތިހާބުގައި ވާދަކުރި ތިން ވަނަ ކެންޑިޑޭޓް، ސިމް ސަންގް ޖޫއަށް ގިނަ އަންހެނުން ވޯޓުލާފައިވެ އެވެ. އެކަމަނާގެ އެންމެ އިސް ވައުދަކީ ޖިންސުގެ ހަމަހަމަކަން ގެނައުމެވެ.
ޔޫންއަށް ރައީސްކަން ލިބިވަޑައިގެންނެވި ނަމަވެސް، ޕާލިމެންޓުގެ މެޖޯރިޓީ އޮތީ ޑިމޮކްރެޓިކް ޕާޓީއަށެވެ. ދެކުނު ކޮރެއާގެ ރައީސްކަމުގެ ދައުރަކީ ފަސް އަހަރެވެ.
