ދެކުނު ކޮރެއާ، ސޯލް (މާޗް 10) - ކޮވިޑް ބަލިމަޑުކަން ފެށުނު ފަހުން، ކޭޕޮޕްގައި ނަން މަޝްހޫރު ބީޓީއެސްގެ އިން ސޯލްގައި ބާއްވާ ފުރަތަމަ ލައިވް ކޮންސެޓް ފަށަން ތައްޔާރުވެއްޖެ އެވެ.
ބީޓީއެސްގެ އެތައް ހާސް ފޭނުން ނުވަތަ "އާމީ" ދަނީ ބުރާސްފަތި ދުވަހުގެ ކޮންސެޓަށް ސޯލްއަށް ޖަމާވަމުންނެވެ. ނަމަވެސް ކޮވިޑާ ދެކޮޅަށް އަޅާފައިވާ ފިޔަވަޅުތަކުގެ ދަށުން ފޭނުންނަށް ލަވަ ކިޔުމާއި ނެށުމުގައި ބައިވެރިވުން މަނާ ވާނެ އެވެ.
މިޔުޒިކް ޗާޓުތަކުގެ ކުރި ހޯދާފައިވާ ބީޓީއެސް ތިން ދުވަހަށް ކުރިއަށް ގެންދާ ކޮންސެޓުގެ ނަމަކީ "ޕާމިޝަން ޓު ޑާންސް އޮން ސްޓޭޖް - ސޯލް" އެވެ. ކޮންސެޓް ފަށާނީ ބުރާސްފަތި ދުވަހުގެ ހަވީރު ސޯލްގެ އޮލިމްޕިކް ސްޓޭޑިއަމްގަ އެވެ.
ބީޓީއެސްއިން ދެކުނު ކޮރެއާގައި އެންމެ ފަހުން ޝޯއެއް ދިނީ 2019 ވަނަ އަހަރު އެވެ. އޭގެ ފަހުން ބީޓީއެސްގެ މަގްބޫލުކަން ބޮޑުވެ، ބިލްބޯޑް ޗާޓުގެ އެއް ވަނައިގައި ތިން ލަވަ ހިމެނި، ގްރެމީ އެވޯޑަށް ދެ ނޮމިނޭޝަން ލިބުނެވެ.
ބުރާސްފަތި ދުވަހުގެ ރޭ ފަށާ ކޮންސެޓުގައި 45،000 ސީޓު ވިއްކަން ހުޅުވާލިއިރު، ކުޑަ އިރުކޮޅެއްގެ ތެރޭގައި ހުރިހާ ޓިކެޓެއް ވަނީ ހުސްވެފަ އެވެ.
ދެކުނު ކޮރެއާގައި ކޮވިޑް ކޭސްތައް ވަރަށް ބޮޑަށް އިތުރުވެފައިވާ މި ދަނޑިވަޅުގައި ބުރާސްފަތި ދުވަހު އެކަނިވެސް 300،000 ކޭސް ރިޕޯޓުކޮށްފައިވެ އެވެ. އެހެންވެ، ކޮންސެޓު ކުރިއަށް ގެންދަން ޖެހެނީ ހަރުކަށި ފިޔަވަޅުތަކާ އެކު އެވެ.
އެގޮތުން ހަޅޭއްލެވުމާއި، ހިތްވަރު ދިނުމުގެ ގޮތުން އަޑު ގަދަ ކުރުމާއި، ލަވަ ކިޔުމާއި ގޮނޑިން ކޮޅަށް ތެދުވުން ވެސް މަނާ ވާނެ އެވެ. ބީޓީއެސް ހިންގާ ބިގް ހިޓް މިޔުޒިކް ގްރޫޕުން އެދުނީ ސަޕޯޓް ދެއްކުމުގެ ގޮތުން އަތް ޖެހުމަށެވެ.
ބީޓީއެސްގެ މަސައްކަތުގެ ސަބަބުން ދެކުނު ކޮރެއާގެ އިގްތިސާދަށް ބޮޑު ފައިދާއެއް ކުރެ އެވެ. ބަލިމަޑުކަމުގައި ޝޯތައް ނުބޭއްވި ނަމަވެސް ބީޓީއެސްއަށް ވަނީ ފާއިތުވި ދެ އަހަރު ބޮޑު ފައިދާއެއް ލިބިފަ އެވެ.
ބީޓީއެސް އިން 2020 ވަނަ އަހަރު ބާއްވަން މަސައްކަތް ކުރި ބޮޑު ބައިނަލްއަގްވާމީ ޓުއާއެއް ކޮވިޑާ ހެދި ކެންސަލް ކުރަން ޖެހުނެވެ. ނަމަވެސް އޭގެ ފަހުން ބައެއް ކޮންސެޓުތައް އޮންލައިންކޮށް ބޭއްވި އެވެ.
ކޮވިޑް ބަލިމަޑުކަމުގައި ފުރަތަމަ ފަހަރަށް ބީޓީއެސް އިން ސްޓޭޖުގައި ފޭނުންނާ އެކު ކޮންސެޓެއް ބޭއްވީ މިދިޔަ ނޮވެމްބަރު މަހު ލޮސް އެންޖެލިސްގެ ސޯފައި ސްޓޭޑިއަމްގަ އެވެ. ހަތަރު ރެއަށް ބޭއްވި އެ ކޮންސެޓުން 33.3 މިލިއަން ޑޮލަރު ހޯދި އެވެ.
