ތ. ގުރައިދޫ ކަންޑަރު ސަރަހައްދުގައި އަނިޔާވެރި ގޮތަކަށް ބިދޭސީއެއް މަރާލި ކަމުގެ ތުހުމަތުވާ ބަހުލް މިއަހް ފުލުހުންނަށް ފެނުނުއިރު އޮތީ ހޭނެތިފާ ކަމަށް އެ މައްސަލާގައި ހަރަކާތްތެރިވި އޮފިސަރުން މިއަދު ކްރިމިނަލް ކޯޓުގައި ހެކިބަސް ދެމުން ބުނެފި އެވެ.
ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނު ގެ ފަސް ވަނަ މާއްދާގެ ދަށުން ބަހުލްގެ މައްޗަށް ކޮށްފައި ވަނީ ތޫނުއެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އެވެ.
ދެ ބިދޭސީއެއްގެ މެދުގައި ހިނގި މާރާމާރީއެއްގެ ތެރެއިން މެއި 20، 2020 ގައި އަނިޔާވެރިގޮތަކަށް މަރާލާފައި ވަނީ ބަންގްލޭޝަށް ނިސްބަތްވާ ޝާހުއާލަމް ނަމަކަށް ކިޔާ މީހެކެވެ.
އޭނާގެ ބުރަކައްޓަށާއި، އަރިކައްޓަށާއި، ކަރުގެ ކަނާއަތް ފަރާތަށް ވަޅިން ފުން ޒަހަމްތަކެއްދީގެން އޭނާ މަރާލާފައި އޮއްވާ ފެނުނީ އޭނާ ދިރިއުޅެމުންދިޔަ ސައިޓު ކުރިމަތިންނެވެ. މުޅި އެ ސަރަހައްދު އޮތީ ލެއިން ތަގައްޔަރުވެފައި ކަމަށް ކްރައިމް ސީންގައި ހަރަކާތްތެރިވި ފުލުހުން މިއަދު ކިޔައިދިނެވެ.
ގުރައިދޫގައި ދަނޑުވެރިކަން ކުރުމުގައި އުޅެމުން އައި އުމުރުން 35-40 އަހަރުގެ އެ މީހާ ހޮސްޕިޓަލަށް ގެންދެވުނީރުވެސް އޮތީ މަރުވެފައި ކަމަށާއި، އެވަގުތު އެ ސައިޓުގައި އުޅުނު ހުރިހާ ބިދޭސީން ފުލުހަށް ހާޒިރުކުރަން ވަތްއިރު، އެ ގަތުލުގެ ތުހުމަތުވާ ބަހުލް މިއާހް ނުތެދުވެވިފައި އޮތް ކަމަށް ބުންޏެވެ.
އެހެންވެ ފުލުހުންގެ އޮފިސަރުން ގޮސް ބެލިއިރު، އޭނާ ބޯ އަޅާއިގެން އޮތް ބާލީހުން ލޭ ފެނުނު ކަމަށާއި، ފުން ޒަހަމްތަކެއް ލިބިފައިވާކަންވެސް ފާހަގަކުރެވުމުން، އެއްވެސް ހަރަކާތެއް ނެތް އޭނާގެ ހަށިގަނޑު ވީ އެންމެ އަވަހަކަށް އެރަށު ހޮސްޕިޓަލަށް ގެންދިޔަ ކަމަށް މިއަދު އެ އޮފިސަރުން ކޯޓުގައި ފާހަގަކުރި އެވެ.
ނަމަވެސް ތަހުގީގުގައި އެ ގަތުލުގެ ތުހުމަތު އޭނާއަށް އަމާޒުވީ އޭނާގެ ވާހަތައް ހަމަނުޖެހުމުން ކަމަށް ވެއެވެ. އެންމެ ފުރަތަމަ އޭނާއާ ފުލުހުން ސުވާލުކުރުމުން، އެ އަނިޔާތަކަކީ މާސްކުއަޅައިގެން ތިބި ބަޔަކު އޭނާގެ ފޯނު ފޭރެން އުޅުމުގެ ތެރޭގައި ލިބުނު ޒަހަމްތަކެއް ކަމުގައި ބުނި ނަމަވެސް، ފަހުން އޭނާއަތުން ފޯނު ފެނިގެން ސުވާލުކުރުމުން ހަނު ހުރި ކަމަށް ފުލުސް އޮފިސަރުން މިއަދު ކޯޓުގައި ބުންޏެވެ.
އަދި އެ ސައިޓުން ލޭހުރި ކަތިވަޅިއެއް ފެނިފައިވާއިރު، ޑަޒަނެއްގެ ޕޮކެޓް ނައިފްތަކެއްވެސް ފެނިފައިވާކަން ފުލުހުން ފާހަގަކުރި އެވެ. އެ އޮފިސަރުންގެ ހެކިބަހުން އެނގުނު ގޮތުގައި އޭނާ އޮތީ އެ މާރާމާރީއަށްފަހު ލިބުނު ގެއްލުންތައް ފޮރުވުމަށް، ފެންވަރައި، ސާފުވެ، ޒަހަމްވި ތަންތަނުގައި ބެންޑޭޖް އޮޅައިގެންނެވެ. އެ މާރާމާރީ ހިނގިއިރު އޭނާ ލައިގެން ހުރި މުންޑާއި އަންނައުނުތައްވެސް ފުލުހުންނަށް ފެނިފައިވާއިރު، ގިނަ އަދަދެއްގެ ގަރީނާ މި މަރު ސާބިތު ކުރުމަށް ދައުލަތުން ހުށަހަޅާފައި ވެއެވެ.
އެގޮތުން މޯބައިލް ފޮރިންސިކް ރިޕޯޓާއި، ބްލަޑް އެނަލެސިސް ރިޕޯޓްތަކާއެކު ޝަފައީ ހަ ހެކިވެރިން ދައުލަތުން މައްސަލަ ސާބިތުކުރަން ހުށަހެޅި އެވެ. އޭގެ ތެރެއިން ތިން އޮފިސަރުންގެ ހެކިބަހާއި، އެ ބިދޭސީން ގެންގުޅޭ ވެރިފަރާތުގެ ހެކިބަސް މިއަދު މެންދުރުން ފެށިގެން ކުރިއަށް ދިޔަ ޝަރީއަތުގެ މަޖިލީހުގައި ނެގި އެވެ. އަނެއް ދެ ހެކިވެރިންގެ ހެކިބަސް ނުނެގުނީ އެމީހުންގެ ބަލިހާލަތު ހުރިގޮތުންނެވެ.
މިއަދުގެ އަޑުއެހުމުގައި އޮފިސަރެއް ހެކިބަސް ދިނުމަށްފަހު، އެ ވާހަކަތައް ގާތިލުގެ ތުހުމަތުވާ ބަހުލް މިއަހްއަށް ތަރުޖަމާކޮށްދިނުމުން އޭނާ ވަނީ އެ ހެކިވެރިޔާގެ ވާހަކަތަކަކީ ދޮގެއް ކަމަށްވެސް ވަރަށް ނުރުހުންވެ ހުރެ ބުނެފަ އެވެ.
ކްރިމިނަލް ކޯޓުގައި މަޑު ޖެހިފައި އޮތް އެ މައްސަލަ އަވަހަށް ނިންމުމަށްޓަކައި، ގާޒީ ހުސައިން ފާއިޒް ރަޝާދު ވިދާޅުވީ މިމަހުގެ ތެރޭގައި އަދި އިތުރު އަޑުއެހުމެއްވެސް ބާއްވާނެ ކަމަށެވެ. އެއީ ދައުލަތުގެ ހެކިވެރިންގެ ހެކިބަސް ނެގުމަށްފަހު، ދިފާއީ ހެކިން ތިބި ނަމަ އެ ހެކިންގެ ހެކިބަސް ނެގުމަށެވެ.
އެއަށްފަހު ހުލާސާ ބަޔާން އިއްވުމަށް އަޑުއެހުމެއް ތާވަލްކުރުމަށްފަހު މި އަހަރުގެ ތެރޭގައި މި މައްސަލަ ނިންމާނެކަމަށް ގާޒީ ވިދާޅުވި އެވެ.
