އެންޓި ކޮރަޕްޝަން ކޮމިޝަން (އޭސީސީ)އަށް އައްޔަން ކުރައްވަން ރައީސް އިބްރާހީމް މުހައްމަދު ސޯލިހު ހުށަހެޅުއްވި ބޭފުޅުންނަށް, ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ރުހުން ދޭން ފައްޓައިފި އެވެ.
އޭސީސީއަށް އައްޔަންކުރަން ރައީސް ހުށަހެޅުއްވި ބޭފުޅުންގެ ތެރެއިން މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު އިންޓަވިއު ކުރީ އޭސީސީގައި އިންވެސްޓިގޭޝަން ހެޑެއްގެ ގޮތުގައި މިހާރު ވެސް މަސައްކަތް ކުރައްވަމުން ގެންދަވާ ށ. ނަރުދޫ ހަވާ، އަބްދުއް ސަލާމްއާ އެވެ. އެންމެ ފަހުން އޭސީސީގައި ތިއްބެވި ހަތަރު މެމްބަރުން އިސްތިއުފާ ދެއްވި އިރު ވެސް އޭސީސީގައި މަސައްކަތް ކުރެއްވި ބޭފުޅަކަށް ވާތީ ބައެއް މެމްބަރުން، އަބްދުއް ސަލާމްއާ މިއަދު ވަރަށް އުނދަގޫ ސުވާލުތައް ވެސް ކުރިމަތިކުރެއްވި އެވެ. އޭނާއަށް ރުހުންދޭން މަޖިލީހުގެ ތަޅުމަށް ފޮނުވަން ފާސްކުރީ އެ ސުވާލުތަކަށް ވެސް ޖަވާބު ދެއްވުމަށް ފަހުގަ އެވެ.
އޭނާއަށް ރުހުން ދޭން އެދި ތަޅުމަށް ފޮނުވަން ނެގި ވޯޓްގައި ބައިވެރިވެރި ވެވަޑައިގެންނެވި 11 މެމްބަރުންގެ ތެރެއިން އެކަމަށް ތާއީދުކުރައްވައި ވޯޓްދެއްވީ އަށް މެމްބަރެކެވެ.
އަބްދުއް ސަލާމާ ކޮމިޓީން މިއަދު ކުރި އިންޓަވިއުގައި އޭނާއާ އެންމެ އުނދަގޫ ސުވާލުތަކެއް ކުރެއްވީ ވިލިމާލެ ދާއިރާގެ އެމްއެެންޕީ މެމްބަރު އަހުމަދު އުޝާމެވެ. އިސްތިއުފާދެއްވި މެމްބަރުންނަށް މިނިވަންކަމާ އެކު މަސައްކަތް ކުރެއްވުމަށް ހުރަހެއް އެޅުނުކަމަށް ގަބޫލުކުރައްވަންތޯ ނުވަތަ ނޫންތޯ އުޝާމް ސަލާމާ ސުވާލުކުރެއްވި އެވެ.
އެ ސުވާލަށް ޖަވާބު ދެއްވަމުން ސަލާމް ވިދާޅުވީ އޭސީސީގައި މަސައްކަތްކުރާތާ ގާތްގަނޑަކަށް އަށް އަހަރު ވެއްޖެ ކަމަށާއި މިނިވަންކަމާ އެކު މަސައްކަތް ނުކުރެވޭ ކަމަށް ކޮމިޝަންގެ މެމްބަރުންގެ ފަރާތްޕުޅުން އަޑުއިވިވަޑައިގެންފައި ނުވާ ކަމަށެވެ.
"އެކަމަކުވެސް އަަޅުގަނޑުމެން އެންމެން ވެސް ދަންނަން ޖެހޭ ކަމަކީ ކޮރަޕްޝަނުގެ މައްސަލަތަކުގައި ވަގުތު ނަގާނެކަން،" އޭނާ ވިދާޅުވި އެވެ.
ކޮމިޝަނުގެ މެމްބަރުކަމުން އިސްތިއުފާ ދެއްވި ބޭފުޅުން ފެއިލްވެފައިވާ ކަމަށް ގަބޫލުކުރައްވަންތޯ ވެސް އުޝާމް ސުވާލުކުރެއްވި އެވެ. ސަލާމް ވިދާޅުވީ އެ ބޭފުޅުން ސީދާ ފެއިލްވިކަމަށް ގަބޫލުނުކުރައްވާ ކަމަށެވެ. އެ ބޭފުޅުން މަސައްކަތްތަކެއް ކޮށްފައި އެބަހުރި ކަމަށް ގަބޫލުކުރައްވާ ކަމަށް ވެސް އޭނާ ވިދާޅުވި އެވެ.
ރައީސް ދެން ފޮނުއްވި ބޭފުޅުންނާ ވެސް މިއަދު ކޮމިޓީން އަންނަނީ އިންޓަވިއު ކުރަމުންނެވެ.
