ސޯލް، ދެކުނު ކޮރެއާ (މާޗް 5) - އުތުރު ކޮރެއާއިން ހޮނިހިރު ދުވަހު "ޕްރޮޖެކްޓައިލެއް" ލޯންޗުކޮށް، މި އަހަރުގެ މިހާތަނަށް ނުވަ މިސައިލް ޓެސްޓުކޮށްފި އެވެ.
ދެކުނު ކޮރެއާގެ ޖޮއިންޓް ޗީފް އޮފް ސްޓާފްސްއިން ނެރުނު ބަޔާނެއްގައި ބުނީ "ޕްރޮޖެކްޓައިލް" ފޮނުވާލީ އިރުމަތީ ސަރަހައްދަކަށް ކަމަށެވެ.
މިދިޔަ ޖެނުއަރީ މަހު އެކަނިވެސް އުތުރު ކޮރެއާއިން ހަތް މިސައިލް ޓެސްޓު ކުރި އެވެ. އެހެންވެ، ގައުމުތަކުން ކަންބޮޑުވުން ފާޅުކޮށް، ކުށްވެރި ކުރި އެވެ.
ބައިނަލްއަގްވާމީ ދަތިކުރުމުގެ ގިނަ ފިޔަވަޅުތަކެއް އަޅާފައިވީ ނަމަވެސް، އުތުރު ކޮރެއާއިން ދަނީ އަސްކަރީ ތަރައްގީގެ މަސައްކަތް މަޑުނުޖައްސާ ކުރިއަށް ގެންދަމުންނެވެ.
މިދިޔަ ހަފްތާގެ ހޯމަ ދުވަހު ވެސް އުތުރު ކޮރެއާއިން މިސައިލެއް ލޯންޗު ކުރި އެވެ. އޭރު އެ ގައުމުން ބުނީ އެއީ ޖައްވަށް ސެޓެލައިޓެއް ފޮނުވުމަށް މުހިއްމު މަސައްކަތެއް ކަމަށެވެ.
އެނެލިސްޓިން ދެކޭ ގޮތުގައި ރަޝިއާއިން ޔޫކްރެއިނަށް އަރައި ހަނގުރާމަ ފަށާފައި ވާތީ، މި ދަނޑިވަޅުގެ ބޭނުން ހިފައި، ގިނަ ޓެސްޓުތަކެއް އުތުރު ކޮރެއާއިން ކުރުން އެކަށީގެންވެ އެވެ.
މިދިޔަ މަހު އުތުރު ކޮރެއާއިން ބުނީ ޔޫކްރެއިންގެ މައްސަލައިގެ އަސްލު ސަބަބަކީ އެމެރިކާ ކަމަށާއި އެހެން ގައުމުތަކުގެ ދާހިލީ ކަންކަމާ އެމެރިކާއިން ބެހެމުންދާ ކަމަށެވެ.
