ރަޝިޔާއިން ޔޫކްރެއިނަށް ހަމަލާދޭން ފެށިއިރު އެ ގައުމުގައި ތިބި 24 ދިވެހިންގެ ތެރެއިން ބާކީ ތިބި ނުވަ މީހުން ވެސް ރެ ދަންވަރު އެ ގައުމުން ނެރެފި އެވެ.
ރާއްޖޭގެ ފޮރިން މިނިސްޓަރު އަބްދުﷲ ޝާހިދު ރޭ ކުރެއްވި ޓުވީޓެއްގައި ވިދާޅުވެފައި އޮތީ ހާރްކީވްގައި ތިބި އަށް މީހުންނާއި ޑިނީޕްރޯގައި ހުރި ދިވެހި މީހާ ރޭ ދަންވަރު ހަންގޭރީއަށް ގެންގޮސްފައިވާ ކަމަށެވެ. އެހެންކަމުން ޔޫކްރެއިނުގައި މިހާރު ދިވެއްސަކު ނުހުންނާނެ އެވެ.
"މިހާ ބޮޑު ކާރިސާއެއްގައި، ކެތްތެރިކަމާއި މެޗުއަރިޓީ ދެއްކި ކަމަށްޓަކައި ދިވެހި ޒުވާން ކިޔަވާ ކުދިންނަށް އަޅުގަނޑު ސާބަސް ދެން،" ޝާހިދު ވިދާޅުވި އެވެ.
ޝާހިދުގެ ޓުވީޓުގައި ވިދާޅުވީ ހާރްކީވްގައި ތިބީ ފަސް ކިޔަވާ ކުދިންނާއި ތިން މީހުންގެ އާއިލާއެއް ކަމަށެވެ. ހާރްކީވުން އެމީހުން ނެރުނީ އަންގާރަ ދުވަހެވެ. އެއިރު އެ ސިޓީގައި ވަރަށް ގަދަޔަށް ދިޔައީ ހަނގުރާމަ ކުރަމުންނެވެ.
އެންމެ ފުރަތަމަ ޔޫކްރެއިނުން ނެރުނު 15 ދިވެހިން ގެންދިޔައީ ހަންގޭރީގެ ބުޑަޕެސްޓަށެވެ. އެ މީހުން ބުޑަޕެސްޓަށް ދިޔައީ ޔޫކްރެއިން/ހަންގޭރީ ބޯޑަރު ކައިރި ހުންނަ ހަންގޭރީ ކޮންސިއުލޭޓަށް ގޮސް، އެތަނުން ޑިޕްލޮމެޓިކް ވެހިކަލްތަކުގަ އެވެ.
ރޭ އެ ގައުމުން ސަލާމަތްވި މީހުން ވެސް ގެންދާނީ ބުޑަޕެސްޓަށް ކަމަށް ބެލެވެ އެވެ. އަދި އެމީހުން ވެސް ޔޫކްރެއިނުން ނެރުނީ ޑިޕްލޮމެޓިކް ވެހިކަލްތަކުގައި ކަމަށް ބެލެވެ އެވެ. އެންމެ ފުރަތަމަ ހަންގޭރީއަށް ގެންދިޔަ 15 ދިވެހިން މިހާރު ތިބީ ރާއްޖޭގަ އެވެ.
