ރަޝިޔާ އިން ހަމަލާ ދޭން ފެށުމާއެކު ވަރުގަދަ ހަނގުރާމައެއް ކުރަމުން އަންނަ ޔޫކްރެއިންގައި ތާށިވެފައި ތިބި ނުވަ ދިވެހިން ވެސް ރައްކާތެރިކަމާއެކު ހަންގޭރީގެ ބޯޑަރު ކައިރީގައި އޮންނަ ހުޅަނގު ޔޫކްރެއިންގެ ސިޓީއެއް ކަމަށްވާ ލިވީވްއަށް ގޮސްފި އެވެ.
ޖުމްލަ 50 އަށްވުރެ ގިނަ ދިވެހިން ދިރިއުޅެމުންދިޔަ ޔޫކްރެއިންގައި މިވަގުތު ތާށިވެފައި ތިބީ ނުވަ ދިވެހިންނެވެ. އެއީ ރަޝިއާގެ ބޯޑަރާ އެންމެ ކައިރީގައި އޮންނަ ހާރްކީވްގައި ތިބި އަށް ދިވެހިންނާއި ނީޕްރޯގައި ހުރި ދިވެއްސެކެވެ.
އިއްޔެ ހުޅަނގު ޔޫކްރެއިންގައި އޮންނަ ލިވީވްއަށް އެ މީހުން ދަތުރު ފެށިއިރު މިއަދު ފޮރިން މިނިސްޓްރީން ވަނީ އެ ނުވަ ދިވެހިން ވެސް ރައްކާތެރިކަމާއެކު އެ ސިޓީއަށް ގޮސްފައިވާކަން ކަށަވަރު ކޮށްދީފަ އެވެ. އެ އެންމެން ވެސް ދަތުރުކުރީ ރޭލުންނެވެ.
"މިއަދު ބޯޑަރު ހުރަސްކޮށް ހަންގޭރީއަށް އެތެރެވުމުގެ ދަތުރު އެމީހުން ފަށާނެ. ލިވީވް އިން ދާނީ ހަންގޭރީގެ ކޮންސިއުލޭޓަށް. މިނިސްޓްރީން ވަނީ ފަސޭހަކަމާއެކު ހަންގޭރީގެ ބޯޑަރު ހުރަސް ކުރުމަށް އިންތިޒާމްތައް ހަމަޖައްސާފައި،" ފޮރިން މިނިސްޓްރީން މައުލޫމާތު ދިނެވެ.
ހަންގޭރީގެ ފޮރިން މިނިސްޓަރާއި ރާއްޖޭގެ ފޮރިން މިނިސްޓަރު އަބްދުﷲ ޝާހިދުއާ ދެ ބޭފުޅުން ވަނީ އެކަމާ ގުޅޭގޮތުން މަޝްވަރާ ކުރައްވާފަ އެވެ. ހަންގޭރީއަށް އެތެރެވުމާއެކު ފޮރިން މިނިސްޓްރީގެ ޓީމުން އެ ދިވެހިންނާ ބައްދަލުކުރާނެ އެވެ.
ހަމަލާތައް ފެށުނު ދުވަސްވަރު ޔޫކްރެއިނުގައި ތާށިވި ދިވެހިން ވެސް ގެނައީ ހަންގޭރީ މަގުންނެވެ. ހަންގޭރީ އަކީ ޔޫކްރެއިންގެ ހުޅަނގުން އެގައުމާ އިންވެގެން އޮންނަ ގައުމެކެވެ.
އެ ގައުމުގެ ވެރިރަށް ކިއޭވް ކައިރީގައި ދިރިއުޅެމުން ދިޔަ ދިވެހި ވެސް ވަނީ ބޯޑަރު ހުރަސްކޮށް ހަންގޭރީއަށް އެތެރެވެފަ އެވެ. އެެއީ ދިވެއްސަކާ ކައިވެނިކޮށްގެން އުޅޭ ޔޫކްރެއިންގެ ރައްޔިތަކާއި އެ ދެމަފިރިންގެ ކުޑަ ދެ ކުދިން ކަމަށް ފޮރިން މިނިސްޓްރީން ބުންޏެވެ.
ޔޫކްރެއިނު ހިފުމަށް ރަޝިޔާ އިން ކުރަމުންދާ ހަނގުރާމައިގައި މިހާތަނަށް 1000 އެއްހާ މީހުން މަރުވެފައިވާ ކަމަށް ލަފާ ކުރެ އެވެ. ޔޫކްރެއިނުގެ ބޮޑެތި ހުރިހާ ސިޓީއަކަށް ރަޝިޔާއިން ދަނީ ވަރަށް ބޮޑަށް ހަމަލާދެމުންނެވެ.
