ހަނގުރާމަ ހިނގަމުންދާ ޔޫކްރެއިންގައި ތާށިވެފައި ތިބި ދިވެހިންގެ ތެރެއިން ސަރުކާރުގެ އެހީތެރިކަމާއެކު އެ ގައުމުން ހަންގޭރީއަށް ގެންދިޔަ 15 ދިވެހި ދަރިވަރުން ރާއްޖެ ގެނައީ އިއްޔެ އެވެ.

މިދިޔަ ބުރަސްފަތި ދުވަހު ރަޝިޔާއިން ޔޫކްރެއިންއަށް އަރައިގަތުމާއެކު ގިނަ އަދަދެއްގެ ދިވެހިންތަކެއް ވަނީ އެގައުމުން ރައްކާތެރިކަމާއެކު ނިކުމެވޭ ގޮތް ނުވެ ތާށިވެފަ އެވެ. ނަމަވެސް ސަރުކާރުގެ އެހީތެރިކަމާއެކު މީގެ ދެ ދުވަސް ކުރިން 15 ދިވެއްސަކު ވަނީ ޔޫކްރެއިންއިން ނެރެ ހަންގޭރީއަށް ރައްކާތެރިކަމާއެކު ގެންގޮސްފަ އެވެ.

އެ 15 ދިވެހިންނަކީ ވެސް ޔޫކްރެއިންގެ އިވަނޯވް-ފްރޭންކްވިސްކްގައި ކިޔަވަމުން ދިޔަ ދަރިވަރުންނެވެ. އިވަނޯވް-ފްރޭންކިވްސްކްއަކީ ރަޝިޔާއިން ޔޫކްރެއިންގައި ފެށި ހަނގުރާމައިގައި އެ ގައުމުން އެންމެ ފުރަތަމަ ހަމަލާތައް އަމާޒުކުރި އެއް ރަށެވެ.

އެމީހުން އިއްޔެ ރާއްޖެ ގެނެސްފައިވަނީ އެމިރޭޓްސްގެ މަތިންދާބޯޓެއްގަ އެވެ. އޭގެ ތެރޭގައި ހިމެނޭ އެއް ދަރިވަރަކު ވަނީ ރައްކާތެރިކަމާއެކު އެނބުރި ގައުމަށް އާދެވުނު ނަމަވެސް އަދިވެސް ޔޫކްރެއިންގައި ދިވެހިންތަކެއް ތާށިވެފައި ތިބީތީވެ ހިތާމަކުރާކަމަށް އިއްޔެ ބުނެފަ އެވެ.

ޔޫކްރެއިންގައި އަދިވެސް ޖުމްލަ 12 ދިވެހިން އެބަތިބި ކަމަށް ރާއްޖޭގެ ފޮރިން މިނިސްޓްރީން ބުނެ އެވެ. އޭގެ ތެރޭގައި ހަނގުރާމަ އެންމެ ގަދަޔަށް ހިނގަމުންދާ ހާރްކީވްގައި އަށް ދިވެހިން އަދި ޔޫކްރެއިންގެ ވެރިރަށް ކީވްގައި ތިބި ތިން ދިވެހިން ހިމެނެ އެވެ. އޭގެ އިތުރުން ވެސް ޑްނީޕްރޯގައި އެއް ދިވެއްސަކު އަދި އެބަ ހުއްޓެވެ.

ފޮރިން މިނިސްޓްރީން ވަނީ އެ މީހުން ރައްކާތެރިކަމާއެކު ޔޫކްރެއިން އިން ނެރުމުގެ މަސައްކަތް ކުރަމުންދާ ކަމަށް ބުނެފަ އެވެ. ނަމަވެސް އެމީހުން ތިބި ސަރަހައްދުގެ ގޮތުން އެ މަސައްކަތަށް ބޮޑެތި ގޮންޖެހުންތަކެއް އެބަހުއްޓެވެ.

ޔޫކްރެއިން މައްސަލައިގެ ފަހުގެ އަޕްޑޭޓް

ރަޝިއާ އާއި ޔޫކްރެއިންގެ މަންދޫބުން ބެލަރޫސްގައި މަޝްވަރާ ކުރަން އިއްޔެ ވަނީ ފަށާފަ އެވެ. އެ މަޝްވަރާތައް ކުރިއަށް ދަނީ ޔޫކްރެއިނާއި ބެލަރޫސް ގުޅޭ ބޯޑަރު ކައިރީގަ އެވެ.

ޔޫކްރެއިންގެ މަންދޫބުން ބެލަރޫސްއަށް ދިޔައީ އިއްޔެ މެންދުރެވެ. ޔޫކްރެއިނުން ދެކޭ ގޮތުގައި މަޝްވަރާގެ އެޖެންޑާގައި ހިމެނޭ އެންމެ މުހިއްމު ކަމަކީ ހަމަލާތައް ހުއްޓުމާއި، ރަޝިއާ ސިފައިން ޔޫކްރެއިނުން ފޭބުމެވެ.

ޔޫކްރެއިން ވަފުދުގައި އިސްކޮށް ތިއްބެވީ ޑިފެންސް މިނިސްޓަރު އޮލެކްސީ ރެޒްނިކޯވް އާއި ވެރިކަން ކުރާ ޕާޓީގެ ލީޑަރު ޑޭވިޑް އަރަހާމިއާ އެވެ. އިއްޔެގެ ބައެއް ރިޕޯޓުތައް ބުނާ ގޮތުން ލޮޖިސްޓިކްސް އާއި ސެކިއުރިޓީއާ ގުޅޭ ސަބަބުތަކާ ހެދި މަޝްވަރާ ފެށުނީ ވަރަށް ފަހަރު ފަސްކުރުމަށް ފަހު އެވެ.

ހަމައެހެންމެ، ބެލާރުސް އިން ވަނީ އިއްޔެ އެ ގައުމުގައި ނިއުކްލިއާ ހަތިޔާރު ބެހެއްޓުމުގެ ހުއްދަ ރަޝިއާ އަށް ދީފަ އެވެ. އަދި، ޔޫކްރެއިންގައި ކުރަމުންދާ ހަނގުރާމައިގައި ބައިވެރިވުމުގެ ހުއްދަ ޑެންމާކްގެ ރައްޔިތުންނަށް އެބަ އޮތް ކަމަށް އެ ގައުމުހެ ބޮޑު ވަޒީރު މެޓް ފްރެޑެރިކްސަން ވިދާޅުވީ ވެސް އިއްޔެ އެވެ.

ބައެއް މުހިންމު ހަބަރުތައް

• ޕާޓީގެ އެތެރޭގެ އިންތިހާބުތަކާ ގުޅުވައި ވަކި ކެންޑިޑޭޓަކަށް ސަޕޯޓު ނުކޮށްފިނަމަ ވަޒީފާގެ ބިރުދެއްކުމުގެ ޝަކުވާތަކެއް ލިބެމުންދާ ކަމަށް ވެރިކަން ކުރާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަންކަމަށް ވާދަކުރައްވާ އިމްތިޔާޒް ފަހުމީގެ ކެމްޕޭން ޓީމުން ބުނީ އިއްޔެ އެވެ.

• ސުޕްރީމް ކޯޓްގެ ބައެއް ނިންމުންތައް އުވައިލުން ހިމެނޭ ގޮތުން، ކޯޓްތަކުގެ ގާނޫނަށް ބަދަލުތަކެއް ގެންނަން ސަރުކާރުން ހުށަހެޅި ބިލަކަށް ރައްޔިތުންގެ މަޖިލީހުގެ އިދިކޮޅު ބައެއް މެމްބަރުން ވަނީ އިއްޔެ ވަރަށް ބޮޑަށް ފާޑުވިދާޅުވެފަ އެވެ.

• ސަރުކާރުގެ ހިއްސާ އޮންނަ ގިނަ ކުންފުނިތަކުގެ ހިންގުމަށް ބަދަލުގެންނަން ރައީސް އިބްރާހިމް މުހައްމަދު ސޯލިހު ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ)އަށް ހުށަހަޅުއްވާފައިވާކަން އިނގުނީ އިއްޔެ އެވެ.

ދުވަހުގެ ކޯޓޭޝަން

ސުޕްރީމް ކޯޓުން ނިންމާފައިވާ ގިނަ ނިންމުންތަކެއް އުވައިލެވޭ ގޮތަށް، ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލާ މެދު ކަންބޮޑުވުން ފާޅުކުރައްވަމުން މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވީ:

"މިއީ ސުވާލު އުފެދޭ ކަމެއްގެ ގޮތުގައި އަޅުގަނޑު ދެކެން. ސުޕްރީމް ކޯޓެއްގެ ރޫލިންއެއް އަޅުގަނޑު ހިތުން، ބާތިލުކުރަން ޖެހޭނީ ހަމަ ސުޕްރީމް ކޯޓުން. ގާނޫނެއް އަޅުގަނޑުމެން ލިޔެގެން ރޫލިން އެއް ބާތިލުކުރެެވިދާނެތޯ އެއީ އަޅުގަނޑު ސުވާލު އުފައްދާ ކަމެއް،"

ދުވަހުގެ ފޮޓޯ

ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022 ގެ އަތޮޅު މުބާރާތުގެ ޗެމްޕިއަންކަން ހދ. ނާވައިދޫން ހޯދުން. ދ. ވައިކަރަދޫ އަތުން އެ އަތޮޅު ފައިނަލުގައި ނާވައިދޫ މޮޅުވީ 7-1 އިން. -- ފޮޓޯ: ގޯލްޑަން ފުޓްސަލް އެސޯސިއޭޝަން

ދިރާސާތަކުން ކިޔާލުމަށް