ހަނގުރާމަ ހިނގަމުންދާ ޔޫކްރެއިންގައި ތާށިވެފައި ތިބި ދިވެހިންގެ ތެރެއިން ސަރުކާރުގެ އެހީތެރިކަމާއެކު އެ ގައުމުން ހަންގޭރީއަށް ގެންދިޔަ 15 ދިވެހި ދަރިވަރުން މިއަދު ރާއްޖެ އައިސްފި އެވެ.
މިދިޔަ ބުރަސްފަތި ދުވަހު ރަޝިޔާއިން ޔޫކްރެއިންއަށް އަރައިގަތުމާއެކު ގިނަ އަދަދެއްގެ ދިވެހިންތަކެއް ވަނީ އެގައުމުން ރައްކާތެރިކަމާއެކު ނިކުމެވޭ ގޮތް ނުވެ ތާށިވެފަ އެވެ. ނަމަވެސް ސަރުކާރުގެ އެހީތެރިކަމާއެކު މީގެ ދެ ދުވަސް ކުރިން 15 ދިވެއްސަކު ވަނީ ޔޫކްރެއިންއިން ނެރެ ހަންގޭރީއަށް ރައްކާތެރިކަމާއެކު ގެންގޮސްފަ އެވެ.
އެ 15 ދިވެހިންނަކީ ވެސް ޔޫކްރެއިންގެ އިވަނޯވް-ފްރޭންކްވިސްކްގައި ކިޔަވަމުން ދިޔަ ދަރިވަރުންނެވެ. އިވަނޯވް-ފްރޭންކިވްސްކްއަކީ ރަޝިޔާއިން ޔޫކްރެއިންގައި ފެށި ހަނގުރާމައިގައި އެ ގައުމުން އެންމެ ފުރަތަމަ ހަމަލާތައް އަމާޒުކުރި އެއް ރަށެވެ.
އެމީހުން މިއަދު ރާއްޖެ ގެނެސްފައިވަނީ އެމިރޭޓްސްގެ މަތިންދާބޯޓެއްގަ އެވެ. އޭގެ ތެރޭގައި ހިމެނޭ އެއް ދަރިވަރަކު ވަނީ ރައްކާތެރިކަމާއެކު އެނބުރި ގައުމަށް އާދެވުނު ނަމަވެސް އަދިވެސް ޔޫކްރެއިންގައި ދިވެހިންތަކެއް ތާށިވެފައި ތިބީތީވެ ހިތާމަކުރާކަމަށް ބުނެފަ އެވެ.
ޔޫކްރެއިންގައި އަދިވެސް ޖުމްލަ 12 ދިވެހިން އެބަތިބި ކަމަށް ރާއްޖޭގެ ފޮރިން މިނިސްޓްރީން ބުނެ އެވެ. އޭގެ ތެރޭގައި ހަނގުރާމަ އެންމެ ގަދަޔަށް ހިނގަމުންދާ ހާރްކީވްގައި އަށް ދިވެހިން އަދި ޔޫކްރެއިންގެ ވެރިރަށް ކީވްގައި ތިބި ތިން ދިވެހިން ހިމެނެ އެވެ. އޭގެ އިތުރުން ވެސް ޑްނީޕްރޯގައި އެއް ދިވެއްސަކު އަދި އެބަ ހުއްޓެވެ.
ފޮރިން މިނިސްޓްރީން ވަނީ އެ މީހުން ރައްކާތެރިކަމާއެކު ޔޫކްރެއިން އިން ނެރުމުގެ މަސައްކަތް ކުރަމުންދާ ކަމަށް ބުނެފަ އެވެ. ނަމަވެސް އެމީހުން ތިބި ސަރަހައްދުގެ ގޮތުން އެ މަސައްކަތަށް ބޮޑެތި ގޮންޖެހުންތަކެއް އެބަ ހުރި ކަމަށް ފޮރިން މިނިސްޓްރީން އިއްޔެ ބުންޏެވެ.
އެގޮތުން އެ ހުރިހާ އެންމެންވެސް ތިބީ ޔޫކްރެއިންގެ އިރުމަތީ ފަރާތުގެ ރަށްތަކުގައިކަމުން ރައްކާތެރިކަން ހޯދަން ހަންގޭރީއަށް ދިޔުމަށް ދިގު އަދި ނުރައްކާތެރި ދަތުރެއް ކުރަން ޖެހިދާނެކަމަށް ފޮރިން މިނިސްޓްރީން ބުނެ އެވެ.
އަދި ހަނގުރާމަ ހިނގަމުންދާތީވެ އެއީ އެންމެ އެދެވޭ ގޮތް ނޫންކަމަށް ވެސް އެ މިނިސްޓްރީން ބުނެ އެވެ. ހާރްކީވްގައި ތިބި އަށް ދިވެހިން ވެސް ތިބީ އެ ރަށުގެ ބޮން ޝެލްޓަރެއްގެ ގޮތުގައި ބޭނުންކުރާ ރޭލްވޭ ސްޓޭޝަނެއްގެ ތެރޭގަ އެވެ.
ފޮރިން މިނިސްޓްރީން މިއަދު އެންމެ ފަހުން ބުނީ ކީވްގައި ތިބި ތިން ދިވެހިން ވެސް މިހާރު އަމިއްލައަށް ހަންގޭރީގެ ބޯޑަރާއި ދިމާލަށް ދަތުރުކުރަމުންދާ ކަމަށެވެ. އަދި ސަރުކާރުން ހާރްކީވްގައި ތާށިވެފައި ތިބި ދިވެހިންނަށް މާލީ އެހީތެރިކަން ދޭން ނިންމާފައިވާކަމަށް ވެސް އެ މިނިސްޓްރީން ބުނެ އެވެ.
އޭގެ އިތުރުން ވެސް އެނބުރި ރާއްޖެ އަންނަ ފަރާތްތަކަށް މާލީ އެހީތެރިކަން ދޭން ވެސް ސަރުކާރުން ވަނީ ނިންމާފަ އެވެ. އަދި ހަމައެއާއެކު ޔޫކްރެއިންގައި ތިބި ދިވެހިންނަށް ސައިކޯ ސޯޝަލް ސަޕޯޓު ދީ، ސަރުކާރުން ދަނީ ބަރާބަރަށް އެމީހުންގެ ހާލަތު ބަލަމުންނެވެ.
