ރަޝިޔާއިން ޔޫކްރެއިން ހިފުމަށް މިދިޔަ ބުރާސްފަތި ދުވަހު ހަނގުރާމަ ފެށުމާއެކު ޔޫކްރެއިނުގައި ތާށިވެފައި ތިބި ދިވެހިންގެ ތެރެއިން 15 މީހަކު ހަންގޭރީގެ ބުޑަޕެސްޓަށް ގެންގޮސްފި އެވެ.
ރާއްޖެ ގަޑިން ރޭ ދަންވަރު ބުޑަޕެސްޓަށް ގެންދިޔައީ ކުރިން އިވަނޯ-ފްރެންކިވްސްކް ގައި ތިބި ދިވެހިންނެވެ. އެމީހުން އެންމެ ފުރަތަމަ ގެންދިޔައީ ޔޫކްރެއިން/ހަންގޭރީ ބޯޑަރާ ކައިރީގައި އޮންނަ އުޒްހޯޑުގައި ހުންނަ ހަންގޭރީ ކޮންސިއުލޭޓަށެވެ. އެތަނުން ސީދާ ހަންގޭރީއަށް ދިޔައީ އެ ގައުމުގެ ޑިޕްލޮމެޓިކް ވެހިކަލްތަކުގަ އެވެ.
"އެއްވެސް މައްސަލައެއް ނުޖެހޭ އައި ވަގުތު. ތިން ވެހިކަލުގައި އަޅުގަނޑުމެން އައީ. ވެހިކަލްތައް ވެސް ނުހުއްޓުވާ. މިހާރު މިތިބީ ހޮޓަލުގައި،" ދިވެހިންގެ ޓީމުގެ ލީޑަރެއްގެ ގޮތުގައި ހަރަކާތްތެރިވި މީހަކު ނޫހުގައި ނަން ނުޖެހުމަށް އެދި ބުންޏެވެ.
ޔޫކްރެއިނުގައި ބާކީ ތިބީ ނުވަ ދިވެހިންނެވެ. އޭގެ ތެރެއިން އަށް މީހުން ތިބީ ހާރްކީވްގަ އެވެ. އެކަކު ހުރީ ނިޕްރޯގަ އެވެ. އެ އެންމެން ވެސް ވީ އެންމެ އަވަހަކަށް ހަންގޭރީއަށް ގެންދިޔުމަށް ދިވެހި ސަރުކާރުން ދަނީ މަސައްކަތް ކުރަމުންނެވެ.
ޔޫކްރެއިނަށް ރަޝިޔާއިން ހަމަލާދޭން ފެށީ އެ ގައުމުގައި ތިބި ދިވެހިން ރާއްޖެ ގެނައުމަށް ރައީސް އިބްރާހިމް މުހައްމަދު ސޯލިހު އެންގެވިތާ ދެ ދުވަސް ފަހުންނެވެ. ރައީސްގެ އެންގެވުން އައީ ރަޝިޔާއިން ޔޫކްރެއިނަށް އަރާނެ ކަމަށް އެމެރިކާއިން ހާމަ ކުރުމާ ގުޅިިގެންނެވެ.
ހަނގުރާމައަށް މިއަދަށް ތިން ދުވަސް ވާއިރު ޔޫކްރެއިނުގެ 100 އަށް ވުރެ ގިނަ މީހުން މަރުވެފައިވާ އެ ގައުމުން ބުނެ އެވެ. ރަޝިޔާއިން ދަނީ ޔޫކްރެއިނުގެ ބޮޑެތި ހުރިހާ ސިޓީތަކަށް ހަމަލާދެމުންނެވެ. އޭގެ ތެރޭގައި ވެރި ރަށް ކިޔެވް ހިމެނެ އެވެ.
ޔޫކްރެއިނުގެ ފަރާތުން އެއްވެސް ބާވަތެއްގެ ނުރައްކަލެއް ނެތީސް ރަޝިޔާއިން ދުރާ ރާވައިގެން ޔޫކްރެއިން ހިފުމަށް މަސައްކަތް ކުރާތީ ދުނިޔޭގެ ގައުމުތަކުން އަންނަނީ އެކަން ކުށްވެރި ކުރަމުންނެވެ. އަދި އެމެރިކާ އާއި ހުޅަނގުން ވަނީ ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އިއުލާންކޮށްފަ އެވެ. ނަމަވެސް އެއްވެސް ގައުމަކުން ޔޫކްރެއިނަށް އަސްކަރީ ގޮތުން އެހީއެއްނުވެ އެވެ.
