މިދިޔަ ހަތަރު އަހަރާ އަޅާ ބަލާއިރު ފިރިހެނުންނަށް އެންމެ ގިނައިން ގެވެށި އަނިޔާ ލިބިގެން ރިޕޯޓު ކުރީ މިދިޔަ އަހަރު ކަމަށް ޖެންޑާ މިނިސްޓްރީން ބުނެފި އެވެ.
ރާއްޖޭގައި ހިނގާ ގެވެށި އަނިޔާގެ މައްސަލަތައް ހުއްޓުވާ އެކަމަށް ހޭލުންތެރިކަން އިތުރު ކުރުމަށް 2020 ވަނަ އަހަރުގެ ޖުލައިގައި ޖެންޑާ މިނިސްޓްރީން އިސްނަގައިގެން "ގެވެށި ގުޅުން" ނަމުގައި ކެމްޕޭނެއް ފެށި އެވެ.
ގެވެށި އަނިޔާއާ ދެކޮޅަށް މަސައްކަތްކުރުމަކީ ރައީސް އިބްރާހިމް މުހައްމަދު ސޯލިހްގެ ސަރުކާރުން ހާއްސަ އަހައްމިއްޔަތު ކަމެއް ދޭ ކަމެކެވެ.
ޖެންޑާ މިނިސްޓްރީގެ ތަފާސްހިސާބުތަކުން ދައްކާގޮތުގައި އެއް އަހަރުން އަނެއް އަހަރަށް ގެވެށި އަނިޔާ ލިބޭ މީހުންގެ އަދަދަ އިތުރުވަމުން އަންނަނީ ކަންބޮޑުވާ މިންވަރަށެވެ. އޭގެ ތެރޭގައި ގިނައި އަންހެނުން ނަމަވެސް ފިރިހެނުންނަށް އަނިޔާ ލިބޭ މިންވަރުވެސް އަންނަނީ އިތުރުވަމުންނެވެ.
ޖެންޑާގެ ތާފާސްހިސާބުތައް
- 2018: ޖުމްލަ 383 ކޭސް ރިޕޯޓުކޯށްފައިވޭ، އޭގެ ތެރޭގައި 347 އަންހެނުންނާއި 36 ފިރިހެނުން ހިމެނޭ.
- 2019: ޖުމްލަ 433 ކޭސް ރިޕޯޓުކޯށްފައިވޭ، އޭގެ ތެރޭގައި 378 އަންހެނުންނާއި 55 ފިރިހެނުން ހިމެނޭ.
- 2020: ޖުމްލަ 419 ކޭސް ރިޕޯޓުކޮށްފައިވޭ، އޭގެ ތެރޭގައި 375 އަންހެނުންނާއި 44 ފިރިހެނުން ހިމެނޭ.
- 2021 (ނޮވެމްބަރުގެ ނިޔަލަށް): ޖުމްލަ 446 ކޭސް ރިޕޯޓުކޮށްފައި ވާއިރު ހިމެނެނީ 388 އަންހެނުންނާއި 58 ފިރިހެނުން.
ގެވެށި އަނިޔާއަކީ ކޮބާ؟
ގެވެށި އަނިޔާއަކީ ގެވެށި ގުޅުމަކުން ގުޅިފައި ތިބޭ މީހުންގެ ތެރެއިން އެކަކު އެގުޅުމުގައި ހިމެނޭ އަނެކާގެ މައްޗަށް ގެވެށި އަނިޔާ ހުއްޓުވުމުގެ ގާނޫނުގައި ބަޔާން ކޮށްފައިވާ އަމަލެއް ހިންގުމެވެ. އޭގެ ތެރޭގައި، އަންހެނެއް ފިރިހެނެއް، ކުޑަކުއްޖެއް ދުވަސްވީ މީހެއް އިސްތިސްނާއެއް ނުވެ އެވެ.
ގެވެށި އަނިޔާ އަކީ ހަމައެކަނި ޖިސްމާނީ ގޮތުން ލިބޭ އަނިޔާއެއް ނޫނެވެ. ނަފްސާނީ ގޮތުންނާއި ޖިންސީ ގޮތުން ދެވޭ އަނިޔާ ވެސް ގެވެށި އަނިޔާގެ ތެރޭގައި ހިމެނޭނެ އެވެ. ބިރުދެއްކުމާއި މާލީ ގޮތުން ދަތި ކުރުމާއި އެއްތަނުން އަނެއް ތަނަށް ދިއުން މަނާކުރުމާއި ގެވެށި އަނިޔާގެ އަމަލެއް ހިންގާތަން ކުޑަ ކުއްޖަކަށް ދެއްކުން ނުވަތަ އަޑުއިއްވުން ފަދަ އެތައް ކަމެއް ގެވެށި އަނިޔާގެ ތެރޭގައި ބެލެވޭނެ އެވެ.
އެއީ އަދަބި ކަނޑައެޅިގެންވާ ގާނޫނީ ގޮތުން ބޮޑު ކުށެކެވެ.
