"ރޫޓް" ފިހާރަ އިން ބޭންކް އޮފް ސިލޯން (ބީއޯސީ)އަށް ޖަމާކުރަން ގެންދިޔަ ހަތަރު މިލިއަނަށް ވުރެ ގިނަ ރުފިޔާ ފޭރިގަންނަން އުޅުނު ކަމަށް ހަތަރު މީހަކު އިއުތިރާފްވެފައިވާތީ، އެމީހުން ބަންދުގައި ތިބި މުއްދަތު ކެނޑުމަށްފަހު އަހަރު ދުވަހުގެ ހުކުމެއް އިއްޔެ ކްރިމިނަލް ކޯޓުން އިއްވައިފި އެވެ.
ބީއޯސީ ކައިރިއަށް ރޫޓްގެ ވޭން މަޑުކުރުމާ އެކު، އޮކްޓޫބަރު 25، 2020 ވަނަ ދުވަހު ފޭރެން މަސައްކަތްކުރީ ދެ ސައިކަލެއްގައި އައި ހަތަރު މީހެކެވެ. އޭގެ ތެރެއިން ތިން މީހަކު ހެލްމެޓް އަަޅައިގެން ތިބި އިރު އެކަކު ހުރީ ހެލްމެޓް ނާޅައި ފޭސް މާސްކެއް އަޅައިގެންނެވެ.
ނަމަވެސް ފޭރެން އުޅުނު މީހުންގެ މަސައްކަތް ނާކާމިޔާބުކޮށްލީ ބީއޯސީގެ ސެކިއުރިޓީ ގާޑާއި ރޫޓްގެ މުވައްޒަފުންގެ މަސައްކަތުންނެވެ.
ފުލުހުންގެ ސީރިއެސް އެންޑް އޯގަނައިޒް ކްރައިމްއިން ތަހުގީގު ކުރި މި މައްސަލާގައި ފޭރުމުގެ ކުށުގެ ދައުވާ އުފުލާފައި ވަނީ ލ. ގަން. ތުނޑި، ކީމިޔާގެ، އަބްދުﷲ ރާޝިދުއާއި، ގއ. ވިލިނގިލި، ކަނީރުމާގެ، މުހައްމަދު މުސްއަބު ޒުބައިރުއާއި، ކ. މާލެ، ދަފްތަރު. ނަންބަރު ރސ 3678، ހުސައިން އަބްދުލްމަޖީދުއާއި، ކ. މާލެ، ވ. ޕިންކްވިލާ، އަހްމަދު އަމީރުގެ މައްޗަށެވެ. އެ ކުށުގައި ބައިވެރިވި ކަމަށް ރ. ރަސްމާދޫ، އޯކިޑްމާގެ، މުހައްމަދު އަޒްމީންއަށް ދައުވާ ކުރެ އެވެ.
ފޭރުމުގެ ކުށަށް އޮންނަ އަސާސީ އަދަބަކީ ތިން އަހަރާއި ދެ މަހާއި 12 ދުވަހަށް ޖަލަށްލުމެވެ. ނަމަވެސް އެ ކުށަށް އެ އެންމެންވެސް އިއުތިރާފްވެފައި ވާތީއާ، އެ މައްސަލައިގައި ހައްޔަރުކޮށްގެން ބަންދުކޮށްފައި ހުންނަތާ މިހާރު ގާތްގަނޑަކަށް އެއް އަހަރާއި ހަތަރު މަސް ވެފައި ވާތީ، ގާޒީ ހަސަން ސައީދު ހުކުމް އިއްވީ އެބައި އުނިކުރުމަށްފަހު އެވެ.
މި ފޭރުމުގެ ވީޑިއޯއެއް ސޯޝަލް މީޑިއާގައި އާންމުވެފައިވާއިރު، ރޫޓުގެ ވޭން ބީއޯސީ ކުރިމައްޗަށް މަޑުކުރިއިރު، އެ މީހުން ވެސް ވޭނުގެ ކުރިމައްޗަށްވާ ގޮތަށް މަޑުކޮށް ވޭނުގެ ތެރެއިން ނެރުނު ފޮށިގަނޑެއް އަތުލައިގެން ދާން އުޅޭތަން އެ ވީޑިއޯއިން ފެނެ އެވެ. ނަމަވެސް ފޮށިގަނޑު ނެގި އެކަކު ވެއްޓި ބެންކުގެ ގާޑުން އެ މީހާ އަތުން ފޮށިގަނޑު އަތުލި މަންޒަރު ވެސް ފެނެ އެވެ. ވޭނުން އެ ބޭންކުގެ އަންހެން މުވައްޒަފަކު ވެސް ފައިބާ މަންޒަރު ވީޑިއޯތަކުން ފެނެ އެވެ.
