ކޮމަންވެލްތުން ދެމުން އަންނަ ޕޮއިންޓް އޮފް ލައިޓް އެވޯޑު ލިބޭ ފުރަތަމަ ދިވެއްސަކަށް މޯލްޑިވްސް ރެޑްކްރެސެންޓުގެ ޕްރޮގްރާމް އޮފިސަރު މައީދު މުހައްމަދު ޒާހިރު ވެއްޖެ އެވެ.
ޕޮއިންޓް އޮފް ލައިޓް އެވޯޑަކީ ކޮމަންވެލްތްގައި ހިމެނޭ 54 ގައުމުން ކޮންމެ ގައުމަކުން ހޮވާލެވޭ މީހުންގެ މެދުގައި ދެވޭ އެވޯޑެކެވެ. މިއީ ހާއްސަކޮށް ވޮލެންޓިއާކޮށް މަސައްކަތް ކުރާ މީހުންނަށް ކޮމަންވެލްތުން ދެމުން އަންނަ އެވޯޑެކެވެ.
މައީދަށް ލިބުނީ ވޮލެންޓިއާކޮށް މަސައްކަތް ކުރާ ޒުވާނުންނަށް ސަޕޯޓް ކުރުމުގެ އެވޯޑެވެ. އެއީ 174 ޕޮއިންޓުންނެވެ.
މައީދު މުހައްމަދު ޒާހިރަކީ ޒުވާނުންނަށް މަދަދުކުރުމާއި ތިމާވެށި ރައްކާތެރިކޮށް ދެމެހެއްޓުމަށްޓަކައި ގެންދަވާތާ 10 އަހަރަށް ވުރެ ގިނަ ދުވަހު ހިލޭ ސާބަހަށް މަސައްކަތްކުރައްވާފައިވާ ބޭފުޅެކެވެ. އަދި އޭނާއަކީ ދެމެހެއްޓެނިވި ތަރައްގީ އާއި މޫސުމަށް އަންނަ ބަދަލުތަކާއި ކާރިސާތަކުގެ ހިރާސްކުޑަކުރުމާއި ކާރިސާތަކުގެ ގެއްލުމުން އަރައިގަތުން ފަދަ ކަންތައްތަކަށް ބޮޑު ޝައުގުވެރިކަމެއް ހުރި ބޭފުޅެކެވެ.
ދިވެހި ރެޑްކްރެސެންޓްގެ ހިދުމަތްތަކާއި ޕްރޮގްރާމްތަކުގައި އިސްކޮށް މިހާރު އުޅުއްވާ އިރު އޭނާއަކީ ތިމާވެއްޓާއި އާތު ސައިންސްގެ ބެކްގްރައުންޑް ހުރި ބޭފުޅެކެވެ.
މައީދަކީ ޒުވާނުންގެ މައްސަލަތަކަށް (ހައްލު ހޯއްދަވަން)، ތިމާވެށީގެ މައްސަލަތައް، ދެމެހެއްޓެނިވި ތަރައްގީ، މޫސުމަށް އަންނަ ބަދަލުތަކުގެ މައްސަލަ، ކާރިސާތަކުގެ ހިރާސްތައް ކުޑަކުރުން، އަދި ކާރިސާތަކުގެ ގެއްލުމުން އަރައިގަތުމުގެ ގާބިލުކަން އިތުރުކުރުމަށް ބޮޑު ޝައުގުވެރިކަމެއް ހުރި، ތިމާވެށީގެ ހިމާޔަތުގައި އަޑުއުފުއްލަވާ ބޭފުޅެކެވެ.
2008 ވަނަ އަހަރުން ފެށިގެން އޭނާ ގެންދަވަނީ މަދަނީ ޖަމިއްޔާތަކުގައި މަސައްކަތްކުރައްވަމުންނެވެ. އޭނާ ބައިވެރި ޖަމިއްޔާތަކުގެ ތެރޭގައި، ރާއްޖޭގައި ތިމާވެށީގެ ކަންކަމުގައި އެންމެ ނަގާކިޔާ ޖަމިއްޔާ ކަމަށްވާ އިކޯކެއާ މޯލްޑިވްސް، އާތު އަވާ މޯލްޑިވްސް އަދި ރާއްޖޭގެ ޒުވާނުންގެ އެންމެ ބޮޑު ޖަމާއަތް ކަމަށްވާ ސްކަައުޓް އެސޯސިއޭޝަން އޮފް މޯލްޑިވްސް ހިމެނެ އެވެ.
މުއީދަކީ އިޖުތިމާއީ ހިދުމަތާއި ޒުވާނުން ބާރުވެރިކުރުވުމާއި ހިލޭސާބަހަށް މަސައްކަތްކުރުމުގެ ދާއިރާއިން އާއްމު ހިދުމަތުގެ އަގު ވަޒަންކުރުމުގެ ގޮތުން ދިވެހި ސަރުކާރުން ދޭ ގައުމީ އިނާމު 2020 ވަނަ އަހަރު ހާސިލުކުރައްވާފައިވާ ބޭފުޅެކެވެ.
މައީދު ވަނީ ނެޝަނަލް ޑިޒާސްޓާ މެނޭޖްމަންޓް އޮތޯރިޓީގައި މެނޭޖާ ޑިވެލޮޕްމެންޓް އެންޑް ރެޒިލިއެންސްގެ މަގާމު އަދާކުރައްވައިފަ އެވެ.
އަދި އޭނާ ވަނީ ޔުނިސެފް މޯލްޑިވްސް އިން ހިންގި، "ސަޕޯޓިން ދަ ލޯ އެމިޝން ކްލައިމެޓް ރެޒިލިއެންޓް ޑިވެލޮޕްމެންޓް ޕްރޮޖެކްޓް" ގައި ނެޝަނަލް ކޮންސަލްޓެންޓެެއްގެ ގޮތުގައި މަސައްކަތް ކުރައްވައިފަ އެވެ.
