ކުނި ވަކިކޮށް ނައްތާލުމުގެ ނަމޫނާ ރަށަކަށް ދ. ކުޑަހުވަދޫ ބަދަލުކުރުމުގެ ޕްރޮގްރާމެއް މޯލްޑިވްސް އޯޝަން ޕްލާސްޓިކްސް އެލަޔަންސް (މޯޕާ) އިން މިދިޔަ ބުރާސްފަތި ދުވަހު އެ ރަށުގައި އިފްތިތާހުކޮށްފި އެވެ.
މި ޕްރޮގްރާމަކީ "އޮން ދަ ގްރައުންޑް، އިން ދަ ސީ: ވޭސްޓް ސެގްރެގޭޝަން މޮޑެލް އައިލެންޑް ކުޑަހުވަދޫ" ގެ ނަމުގައި އިފްތިތާހުކޮށްފައިވާ ޕްރޮގްރާމެކެވެ.
"މި ޕްރޮގްރާމަކީ މޯޕާގެ އެންމެ މުހިންމު އެއް ޕްރޮޖެކްޓް. މިދިޔަ އަހަރުގެ ކުރީކޮޅު މި ޕްރޮގްރާމް ހިޔާލަށް ގެނެސް މިއަހަރު މިކަން ފެށިގެން ދިޔުމަކީ ލިބުނު އުފަލެއް. ގޭބިސީތަކުން އުފައްދާ ކުނި ވެސް ވަކިކޮށް، ކުޑަހުވަދޫއަކީ ކުނި ނައްތާލުމުގެ އާ ގަވާއިދަށް ފުރިހަމައަށް އަމަލުކުރާ ފުރަތަމަ ރަށަށް (މި ޕްރޮގްރާމާއެކު) ވެވިދާނެ،" މޯޕާގެ ފައުންޑާ އަދި ޗެއާމަން ތޯރިގް އިބްރާހީމް ވިދާޅުވި އެވެ.
ކުޑަހުވަދޫ ވޭސްޓް މެނޭޖްމަންޓް ސެންޓަރުގައި ބޭއްވި މި ރަސްމިއްޔާތުގައި މޯޕާ އިން ވަނީ ކުނި ނަގަން ބޭނުންކުރާ ޑަސްބިން ކުޑަހުވަދޫ ކައުންސިލާ ހަވާލުކޮށްފަ އެވެ. އަދި، އެއަށްފަހު ދ. އަތޮޅު ތައުލީމީ މަރުކަޒުގައި ވަނީ ކުނި ވަކިކޮށް ނައްތާލުމާއި، ރީސައިކަލް ކުރުމާ ގުޅޭގޮތުން ހޭލުންތެރިކަމުގެ ސެޝަނެއް ކުރިޔަށް ގެންގޮސްފަ އެވެ.
"ކައުންސިލާއި ރައްޔިތުން ވެސް ތިބީ މޯޕާ އިން ފެށި މި ޕްރޮގްރާމް ކާމިޔާބު ކަމާއެކު ކުރިޔަށްގެންދަން. އަޅުގަނޑުމެންގެ އަމާޒަކީ ކުނި ނައްތާލުމުގެ އާ ގަވާއިދަށް އެންމެ ފުރިހަމައަށް އަމަލުކުރާ ފުރަތަމަ ރަށަކަށް ކުޑަހުވަދޫ ހެދުން،" އެ ރަށު ކައުންސިލްގެ ރައީސް އިބްރާހިމް ފިކުރީ ވިދާޅުވި އެވެ.
މޯޕާގެ މި ޕްރޮގްރާމްގެ ދަށުން ކުޑަހުވަދޫގެ ކޮންމެ ގެޔަކަށް ދެ ޑަސްބިންގެ މަގުން 1000 ޑަސްބިން ހަދިޔާކުރާނެ އެވެ. ހަމައެހެންމެ، ދަގަނޑާއި ބިއްލޫރި އަދި ޕްލާސްޓިކް ކުނީގެ އިތުރުން އެހެނިހެން ބާވަތްތަކުގެ ކުނި ވަކިކުރުމަށް ހަތަރު ގަނީ ބޭގް ވެސް ކޮންމެ ގެޔަކަށް ދޭނެ އެވެ. އޭގެ ސަބަބުން، މި ހަތަރު ވައްތަރުގެ ކުންޏަކީ އުކާލާއިރު ވެސް ވަކިކުރެވިފައިވާ ކުންޏަށް ވާނެ އެވެ.
"ކުޑަހުވަދޫ އަކީ ކޮންމެވެސް ވަރަކަށް ކުނި ވަކިކޮށް ގެންގުޅުމުގައި އިސްނަގާފަ އޮތް ރަށެއް. އެހެން ނަމަވެސް މުޅިން އެކަން ނުވެ އޮތީ. ކައުންސިލް އޮތީ އިސްނަގަން ތައްޔާރަށް. ޕާޓްނާރުން ގޮތުގައި ތިބި ބައެއް ރިސޯޓްތައް ވެސް ކުޑަހުވަދޫ އާ ކައިރީގައި ހުރުމުން އެ ޕްލާސްޓިކް މާލެ ގެންނަން ފަސޭހަވޭ،" މި ޕްރޮޖެކްޓް ކުޑަހުވަދޫގައި ކުރިޔަށް ގެންދިޔުމަށް ނިންމި ސަބަބު ހާމަކުރަމުން މޯޕާގެ އެގްޒެކެޓިވް ބޯޑު މެމްބަރު އަދި ޗީފް އޮޕަރޭޓިން އޮފިސަރު އަހުމަދު މައުމޫން (މާނު) މި ނޫހަށް ވިދާޅުވި އެވެ.
ކުޑަހުވަދޫއިން އުކާލާ ޕްލާސްޓިކް ފުޅި ވެސް މާލެއާ ހަމަޔަށް ގެނެސް ޕާލޭ މޯލްޑިވްސްއާ ހަވާލުކުރުން ވެސް މި ޕްރޮގްރާމްގެ ތެރޭގައި ހިމެނެ އެވެ. މިއާއެކު އެ ރަށުގެ ވޭސްޓް މެނޭޖްމަންޓު ސެންޓަރުން ކުރަން ޖެހޭ މަސައްކަތް ވަރަށް ބޮޑުތަނުން ލުއިވެގެންދާނެ އެވެ.
މޯޕާ އާއެކު މި ޕްރޮގްރާމް ކުރިޔަށް ގެންދިޔުމަށް ކުޑަހުވަދޫ ކައުންސިލްގެ އިތުރުން އެ ޖަމިއްޔާގެ ޕާޓްނަރުން އެހީތެރިކަން ފޯރުކޮށްދޭނެ އެވެ.
އެގޮތުން، މާލޭ އެރޭޓެޑް ވޯޓާ ކޮމްޕެނީ ލިމިޓެޑް، ދ. އަތޮޅު ތައުލީމީ މަރުކަޒު، ލިވް އެންޑް ލާން، ދާލު އެއާޕޯޓް، މަންޓާ އެއާ، އިންޓަނޭޝަނަލް ޕޯލް އެންޑް ލައިން ފިޝިން، ވެސްޓް މެރިން އަދި ކުޑަހުވަދޫ ވޭސްޓް މެނޭޖްމަންޓު ސެންޓަރާއި ކުޑަހުވަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީން މި ޕްރޮގްރާމްގައި އެހީތެރިކަން ފޯރުކޮށްދޭނެ އެވެ.
މޯޕާއިން އަންނަނީ މިހާރު ވެސް ކ. ތުލުސްދޫ އާއި ބައެއް ރިސޯޓުތަކުން އުކާލާ ޕްލާސްޓިކް ރީސައިކަލް ކުރުމަށް މާލެ ގެންނަމުންނެވެ. 2020 ވަނަ އަހަރުން ފެށިގެން މިހާތަނަށް މޯޕާއިން ވަނީ 40 ޓަނުގެ ޕްލާސްޓިކް ފުޅި ރީސައިކަލިންއާ ހަމަޔަށް ގެނެސްދީފަ އެވެ.
މި ޕްރޮގްރާމްގެ ދަށުން ކުރިޔަށްގެންދާ ހޭލުންތެރިކަމުގެ ސެޝަންތަކަށް ބޭނުންވާ މެޓީރިއަލްތައް މޯޕާއިން ތައްޔާރުކޮށްފައި ވަނީ މިނިސްޓްރީ އޮފް އެންވާރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާ ގުޅިގެންނެވެ.
