ޕެޝާވަރް، ޕާކިސްތާން (ފެބްރުއަރީ 9) - ފިރިހެން ދަރިއަކު ލިބޭނެކަން ކަށަވަރު ކުރުމަށް ރުގްޔާ ކުރާ މީހަކު ޕާކިސްތާނުގެ މާބަނޑު އަންހެނެއްގެ ބޮލަށް މޮހޮރެއް ޖަހައިފި އެވެ.
ރުގްޔާ ކުރުމުގެ ނަމުގައި އެކި ކަހަލަ އަނިޔާވެރި އަމަލު ހިންގާ މީހުން ޕާކިސްތާނުގައި އުޅެ އެވެ. އެކަމާ މެދު ގިނަ ބަޔަކު ހިތްހަމަ ނުޖެހެ އެވެ.
ޑޮކްޓަރު ހައިދަރް ހާން އޭއެފްޕީއަށް ވިދާޅުވީ ހުޅަނގު އުތުރު ޕެޝާވަރް ސިޓީގެ ހޮސްޕިޓަލަށް މާބަނޑު އަންހެން މީހާ ދިޔައީ ބޮލަށް ޖެހި މޮހޮރު ނެއްޓޭތޯ އަމިއްލައަށް ގޭގައި ވެސް މަސައްކަތް ކުރުމަށް ފަހު ކަމަށެވެ.
"އޭނާގެ ފުރިހަމަ ހޭވެރިކަން ހުރި އެކަމަކު އޭރު ދިޔައީ ވަރަށް ބޮޑަށް ތަދުވަމުން،" މޮހޮރު ނައްޓައިދިން ޑޮކްޓަރު ވިދާޅުވި އެވެ.
މާބަނޑު އަންހެން މީހާއަށް އޭގެ ކުރިން ތިން އަންހެން ދަރިން ލިބިފައިވާ އިރު، މި ފަހަރު ވެސް އޭނާ ބަލިވެ އިނީ އަންހެން ކުއްޖަކަށެވެ.
ހޮސްޕިޓަލުން ނެގި އެކްސްރޭއިން ފެންނަނީ ދެ އިންޗި ދިގު މޮހޮރެއް ބޮލުގެ ނާށިގަނޑުގެ ތެރެއަށް ޖަހާފައިވާ މަންޒަރެވެ. ނަމަވެސް އޭތި ސިކުނޑިއާ ހަމައަށް ފޯރާފައެއް ނުވެ އެވެ.
ޑޮކްޓަރު ހާން ވިދާޅުވީ މޮހޮރު ޖަހާފައިވަނީ މަރުތެޔޮ ނުވަތަ އެފަދަ ކޮންމެވެސް ބަރު އެއްޗެއްގެ އެހީގައި ކަމަށެވެ.
މާބަނޑު އަންހެން މީހާ އެންމެ ފުރަތަމަ ބުނީ ބޮލަށް މޮހޮރު ޖެހީ ރުގްޔާ ކުރާ މީހާގެ އިރުޝާދުގެ ދަށުން އޭނާ އަމިއްލައަށް ކަމަށެވެ. ނަމަވެސް ފަހުން ބުނީ އެކަން ކުރީ ރުގްރާ ކުރާ މީހާ ކަމަށެވެ.
ޕެޝާވަރުގެ ފުލުހުން މިހާރު މަސައްކަތް ކުރަމުން ދަނީ އަންހެން މީހާއާ ސުވާލުކޮށް، ރުގްޔާ ކުރި މީހުން ހައްޔަރު ކުރުމަށެވެ.
"ހޮސްޕިޓަލުގެ ސީސީޓީވީ ފުޓޭޖް އަޅުގަނޑުމެން ނަގައިފިން. އުއްމީދަކީ ވަރަށް އަވަހަށް އަންހެން މީހާ ހޯދައި، ސުވާލުކުރުން،" އެ ސިޓީގެ ފުލުހުންގެ ވެރިޔާ އައްބާސް އަހްސަން ވިދާޅުވި އެވެ.
