ސަރުކާރު ވަޒީފާތަކުގައި އުޅޭ 27،467 މުވައްޒަފުންގެ އެވަރެޖު މުސާރައަކީ 15،686ރ. ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަކޮށްފި އެވެ.
އެ ބިއުރޯއިން އަލަށް ޝާއިއުކުރަން ފެށި މަންތްލީ ގަވަމަންޓް ވޭޖް އިންޑެކްސްގައި ސަރުކާރު ވަޒީފާތައް ތިން ގިންތިއަކަށް ބަހާލާފައިވާއިރު، އެންމެ ގިނަ މީހުން ވަޒީފާ އަދާކުރަނީ ޕަބްލިކް އެޑްމިނިސްޓްރޭޝަން ނުވަތަ އިދާރީ ހިންގުމުގެ ދާއިރާގަ އެވެ.
އެކަމަކު އެވަރެޖު މުސާރަތައް އެންމެ ބޮޑީ ހެލްތު އެންޑް ސޯޝަލް ނުވަތަ ސިއްހީ އަދި އިޖުތިމާއީ ދާއިރާގެ ވަޒީފާތަކުގަ އެވެ. އެންމެ މަދު މުވައްޒަފުންނާއި ނިސްތަބުން މުސާރަތައް އެންމެ ކުޑައީ އެޑިޔުކޭޝަން ނުވަތަ ތައުލީމީ ދާއިރާގަ އެވެ.
ސަރުކާރު މުވައްޒަފުންނާއި އެވަރެޖު މުސާރަ
- ޕަބްލިކް އެޑްމިނިސްޓްރޭޝަން: 17،904 މުވައްޒަފުން، 15،920ރ.
- އެޑިޔުކޭޝަން: 4،271 މުވައްޒަފުން، 12،605ރ.
- ހެލްތު އެންޑް ސޯޝަލް: 5،292 މުވައްޒަފުން، 17،381ރ.
އަސާސީ މުސާރައަށް ބަލާއިރު ގިނަ މުވައްޒަފުންގެ އަސާސީ މުސާރަ ހުރީ 6،500ރ-9،999ރ. ދޭތެރޭގަ އެވެ.
އަސާސީ މުސާރައާ ގުޅޭ ގޮތުން ފާހަގަކުރެވޭ އަނެއް ކަމަކީ މިނިމަމް ވޭޖު ތަންފީޒުކުރަން ފެށި ނަމަވެސް، ސަރުކާރު މުވައްޒަފުންގެ ހަތަރުބައި ކުޅަ އެއްބައި މުވައްޒަފުންގެ މުސާރަތައް ހުރީ 5،000ރ. އަށް ވުރެ ދަށުގައި ކަމެވެ.
މިއީ އަސާސީ މުސާރަތައް އިތުރުކުރުމުގެ ބަދަލުގައި މިނިމަމް ވޭޖަށް ކަނޑައަޅާފައިވާ 7،000ރ. ހުރިހާ މުވައްޒަފުންނަށް ދޭން މިނިމަމް ވޭޖު އެލަވަންސްގެ ނަމުގައި ފިކްސްޑް އެލަވަންސެއް ދޭން ނިންމުމާ ގުޅިގެންނެވެ.
މުވައްޒަފުންގެ އަދަދު ހަތަރު އަހަރުގެ ތެރޭގައި 33 ޕަސެންޓު އިތުރު
މި ރިޕޯޓުގައި ފާހަގަކޮށްފައިވާ ގޮތުގައި، ޖެނުއަރީ 2018-2022 އަށް ވޭތުވީ ހަތަރު އަހަރުގެ ތެރޭގައި 6،669 ވަޒީފާ އުފައްދައިފި އެވެ. އެއީ 33.3 ޕަސެންޓުގެ އިތުރުވުމެކެވެ.
މީގެ ތެރެއިން ގިނަ ވަޒީފާތައް އުފެދުނީ 2020 ވަނަ އަހަރު އެވެ. އެ އަހަރު 2،755 ވަޒީފާ އިތުރުވެފައިވާ އިރު، މީގެ ސަބަބެއް ކަމަށް ވަނީ ކޮވިޑު ބަލިމަޑުކަމާ ގުޅިގެން ސިއްހީ ދާއިރާއިން އުފެއްދި ވަޒީފާތަކެވެ.
- 2018 ގައި 196 ވަޒީފާ
- 2019 ގައި 2208 ވަޒީފާ
- 2020 ގައި 2755 ވަޒީފާ
- 2021 ގައި 1706 ވަޒީފާ
މަހުން މަހަށް ބަލާނަމަ މި އަހަރުތަކުގެ ތެރޭގައި ވަޒީފާތައް އެންމެ ބޮޑަށް އިތުރުވީ ޑިސެމްބަރު، 2020 ގަ އެވެ.
މުސާރަތައް ދޭން 430 މިލިއަން ރުފިޔާ ހޭދަވޭ
ސަރުކާރު މުވައްޒަފުންގެ މުސާރަތައް ދޭން މި އަހަރުގެ ޖެނުއަރީގައި 430 މިލިއަން ރުފިޔާ ހޭދަކުރި އެވެ.
މުސާރައަށް ކުރާ ހޭދައިގެ ތިންބައި ކުޅަ ދެ ބައި ނުވަތަ 66 ޕަސެންޓު ހޭދަވަނީ އެންމެ ގިނަ މުވައްޒަފުން ތިބޭ ޕަބްލިކް އެޑްމިނިސްޓްރޭޝަނަށެވެ. އެއީ 285 މިލިއަން ރުފިޔާ އެވެ.
ބާކީ ފައިސާގެ ތެރެއިން 92 މިލިއަން ރުފިޔާ ހޭދަވީ ހެލްތު ދާއިރާއަށް އަދި 53.8 މިލިއަން ރުފިޔާ ހޭދަވީ ތައުލީމީ ދާއިރާއަށެވެ.
