ދައުލަތުގެ މުވައްޒަފުންނަށް މިހާރުވެސް ދެމުން އަންނަ ވިހެއުމުގެ ޗުއްޓީ ފަނޑިޔާރުންނަށް ވެސް ދިނުމަށްޓަކައި ފަނޑިޔާރުންގެ ގާނޫނަށް ސަރުކާރުން އިސްލާހެއް ހުށަހެޅުމުން، މެމްބަރުން އެ އިސްލާހަށް ތާއީދުކުރެއްވުމާ އެކުގައި ވެސް ގިނަ ޝަކުވާތަކެއް ކުރައްވައިފި އެވެ.
ފަނޑިޔާރުންނަށް ވިހެއުމުގެ ޗުއްޓީ ދިނުމުގެ ބިލު ސަރުކާރުގެ ފަރާތުން ކަނޑިތީމު ދާއިރާގެ އެމްޑީޕީ މެމްބަރު އަބްދުﷲ ޝަހީމް އަބްދުލް ހަކީމް ހުށަހެޅުއްވި އިސްލާހުގެ ބަހުސްގައި ގިނަ މެމްބަރުން، އިއްޔެއާއި މިއަދު ވެސް ވިދާޅުވީ ފަނޑިޔާރުގޭގައި ގިނަ މައްސަލަތަކެއް ނުނިމި ވަރަށް ދިގުލައިގެން ގޮސްފައިވާ ކަމަށެވެ.
މިއަދުގެ ޖަލްސާގައި ދިން ފުރަތަމަ ފުރުސަތުގައި އިނގުރައިދޫ ދާއިރާގެ މެމްބަރު ހަސަން އަހުމަދު ވިދާޅުވީ މައްސަލައެއް ފަނޑިޔާރުގެއަށް ދިއުމަށް ފަހު ދިހަ ބާރަ އަހަރުވެސް ވެފައި އެބަހުރި ކަމަށެވެ. އެގޮތަށް ކަންތައް ވުމުން މީހުންގެ ހައްގު ނުލިބިދާތަން ރާއްޖެއިން ފެންނަނީ މަދެއްކޮށް ނޫން ކަމަށް ވެސް އޭނާ ވިދާޅުވި އެވެ.
"އެހެންވީމާ މިކަންކަން އެބޭފުޅުން ވެސް ރަނގަޅަށް ވިސްނާވަޑައިގެން، މަސްއޫލިއްޔަތެއްގައިކަން މި ތިއްބަވަނީ، ދައުލަތަށް ހިދުމަތްކުރަން ކަން، އިހުސާސްވާ ވަރު އެބަ ވާން ޖެހޭ ކަންކަމުގައި،" އޭނާ ވިދާޅުވި އެވެ.
ގައްދޫ ދާއިރާގެ އެމްޑީޕީ މެމްބަރު އަހުމަދު ޒާހިރު ވިދާޅުވީ ފަނޑިޔާރުގެތައް އިސްލާހުކޮށް، ފަނޑިޔާރުންނަށް އޮންނަ އިތުބާރު ބޮޑުކުރުމަކީ އެމްޑީޕީގެ ވައުދެއް ކަމަށާއި އެ ވައުދާ އެއްގޮތަށް މިހާރު ވެސް ފަނޑިޔާރުންނަށް ގިނަ ކަންތައްތަކެއް ކޮށްދެވިއްޖެ ކަމަށެވެ. އެހެން ނަމަވެސް ރައްޔިތުންނަަށް އިންސާފު ލިބޭ ކަމާ މެދު ސުވާލު އުފެދޭ ކަމަށް ވެސް އޭނާ ވިދާޅުވި އެވެ.
"އިންސާފެއްނޫން އެއީ އިއްޒަތްތެރި ރައީސް، މައްސަލައެއްގައި އަކުރަކާ ފިއްޔަކާ ހެދީ މައްސަލަ އަނެއް ފުށަށް އނބުރާލައި ދިއުމަކީ ނޫނިއްޔާ މައްސަލަ ޑިސްމިސް ކުުރުމަކީ އިންސާފު ލިބުމެއް ނޫން، " ޒާހިރު ވިދާޅުވި އެވެ.
ކެލާ ދާއިރާގެ މެމްބަރު އިބްރާހީމް ޝަރީފު ވިދާޅުވީ ފަނޑިޔާރުންނަށް ވިހެއުމުގެ ޗުއްޓީ ހަމަޖައްސަން ތާއީދުކުރައްވާ ކަމަށާއި އެއީ ހައްގެއް ކަމަށެވެ. އެހެން ނަމަވެސް ފަނޑިޔާރުން އެބޭފުޅުންގެ މަސްއޫލިއްޔަތު ރަނގަޅަށް އަދާނުކުރައްވާ ކަމަށް އޭނާ ތުހުމަތު ކުރެއްވި އެވެ. އޭގެ މިސާލަކަށް ދެއްކެވީ ވާރިސުންގެ ތެރެއިން ބަޔަކު މަރުވެ ދިޔައިރުވެސް ނުނިމި އޮތް ތަރިކައިގެ މައްސަލައެކެވެ.
"މަތިމަރަދޫގޭ ސަކީނާ ނިޔާވީ މީގެ ދުވަސްކޮޅެއް ކުރިން. ނިޔާވުމާ އެއްކޮށް [ގެ ބެހުމުގެ] މައްސަލަ ފަނޑިޔާރުގެއަށް ލައިފި. އޭނާގެ ދަރިފުޅު އޭގެ ހައެއްކަ އަހަރު ފަހުން ނިޔާވެއްޖެ. ނިޔާވި އިރު ވެސް ހަމަ އެއްކަލަ މުދާ ބަހަން، ގެ ބަހަން ލީ މައްސަލަ އަދިވެސް ހަމަ ފަނޑިޔާރުގޭގައި،" ޝަރީފު ވިދާޅުވި އެވެ.
ތަރިކައިގެ މައްސަލަތައް ހިމެނޭ ގޮތުން ގިނަ މައްސަލަތަކެއް ކޯޓްތަކުގައި ނުނިމި ލަސްވާތީ ކަންބޮޑުވެވަޑައިގަންނަވާ ކަމަށް ކެޔޮދޫ ދާއިރާގެ އެމްޑީޕީ މެމްބަރު ހުސައިން ގާސިމް ވެސް ވިދާޅުވި އެވެ. އޭނާ ވިދާޅުވީ އެކަހަލަ މައްސަލަތައް ނުނިމި ހުއްޓާ ވާރިސުން ނިޔާވަމުން ދާތީ ތަރިކައިން ހައްގުވާ އެތައް ބަޔަކަށް ހައްގު ގެއްލޭ ގޮތް ވެސް މެދުވެރިވާ ކަމަށެވެ.
ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް ވިދާޅުވީ ކޮމަންޑޫ ދާއިރާގެ ބައިއިލެކްޝަނަށް ވެސް ފަނޑިޔާރުގޭގެ ނުފޫޒު ފޯރުވި ކަމަށެވެ. އެެ ނުފޫޒަކީ އޭނާ ވިދާޅުވި ގޮތުގައި އެ އިންތިހާބުގެ ކެމްޕޭނުގައި ވަރަށް ބުރަކޮށް އުޅުއްވި ޔޫތު މިނިސްޓަަރު އަހުމަދު މަހްލޫފާ ދެކޮޅަށް ކޯޓަށް ހުށަހަޅާފައިވާ މައްސަލަ ތާވަލުނުކޮށް ލަސްކުރުމެވެ.
"ފަނޑިޔާރުގެއިން ވަކި ގޮތަކަށް ނިންމާފައި އޮއްވާ ވަކިވަކި ފަނޑިޔާރުން ވަކި މައްސަަލަތަކުގައި ވަކި ގޮތަަކަށް ނިންމާތަން އަަޅުގަނޑުމެންނަށް ފެނިގެން ދިޔަ،" ޝިޔާމް ވިދާޅުވި އެވެ.
ވިހެއުމާ ގުޅިގެން ދައުލަތުގެ މުވައްޒަފުންނަށް ދޭ ޗުއްޓީ މިހާރު ލިބެނީ ސިވިލްސާވިސް މުވައްޒަފުންނާއި ދައުލަތުގެ ކުންފުނިތަކުގެ މުވައްޒަފުންނަށާއި ބައެއް މިނިވަން މުއައްސަސާތަކުގެ މުވައްޒަފުންނަށެވެ. ވިހެއުމުން މައިމީމާއަށް ހަ މަސްދުވަސް އަދި ކުއްޖާގެ ބައްޕަޔަށް އެއް މަސް ދުވަހުގެ ޗުއްޓީއެއް ދެ އެވެ. ފަނޑިޔާރުންގެ ގާނޫނަށް ހުށަހެޅި އިސްލާހުގައި އޮތީ ފަނޑިޔާރުންނަށް ވެސް އެ އުސޫލުން ޗުއްޓީދިނުމަށެވެ.
