ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ޓެރަރިސްޓު ހަމަލާ ކަމުގެ ތުހުމަތުކޮށް، ކްރިމިނަލް ކޯޓުގައި ދައުވާ އުފުލާފައިވާ މީހުންގެ ޝަރީއަތްތައް ލަސްވާތީ، އެ މައްސަލައަށް ފާރަވެރިވުމަށް ރައިސުލްޖުމްހޫރިއްޔާ އައްޔަންކުރެއްވި އިނގިރޭސިވިލާތުގެ މަންދޫބު، އައްބާސް ފާއިޒް ކަންބޮޑުވުން ފާޅުކުރައްވައިފި އެވެ.
މިދިޔަ އަހަރުގެ މެއި ހަވަނަ ދުވަހުގެ ރޭ އަތަމާ ޕެލަސް އިމާރާތުގެ އެތެރޭގަ ހުރެ ނަޝީދު ކާރުކޮޅަށް އަރާވަޑައިގަންނަވަނިކޮށް ރިމޯޓެއް ބޭނުންކޮށްގެން ބޮން ގޮއްވާލި މައްސަލާގައި ނުވަ މީހަކަށް ދައުވާ އުފުލާފައި ވާއިރު މިހާތަނަށް ހުކުމަކާ ހަމައަށް ވާސިލްވެފައި ވަނީ އެންމެ މީހަކަށް ކުރި ދައުވާތަކުގަ އެވެ.
ބާކީ ތިބި އަށް މީހުންގެ ޝަރީއަތް ނުފެށި، އަދިވެސް އިބްތިދާއީ އަޑުއެހުންތައް ކުރިއަށް ދާތީ އެ ހަމަލާގެ ތަހުގީގާއި، ކޯޓު މަރުހަލާތައް ގާތުން ބެއްލެވުމަށްޓަކައި ސަރުކާރުން ހަމަޖެއްސެވި އައްބާސް ގަބޫލުކުރަނީ އެ މައްސަލަ ވަރަށް ބޮޑަށް ލަސްވެއްޖެ ކަމަށެވެ.
"މެއި މަހުގެ ހަ ވަނަ ދުވަހުގެ ހަމަލާގައި ތުހުމަތު ކުރެވޭ ފަރާތުގެ ޝަރީއަތް މިހާރު ލަސްވުމަކީ ނުހަނު ކަންބޮޑުވާ ކަމެއް. އެ ދައުވާތައް އުފުލި ފަހުން މަސްތަކެއް ފާއިތުވެގެން ހިނގައްޖެ. އެންމެ މައްސަލައެއްގެ ޝަރީއަތް އަދި ނިމުނީ. ދެން ތިބި މީހުންގެ މައްސަލަ އަދިވެސް އޮތީ އިބްތިދާއީ މަރުހަލާގައި." ޝަރީއަތް ދިގުލައިގެން ގޮސްފިނަމަ، މައްސަލަ އޮޅުންބޮޅުންވެގެން ދިއުމުގެ ފުރުސަތު އޮތްކަން ފަހަގަކުރައްވަމުން އައްބާސް މިރޭ ކުރެއްވި ޓްވީޓެއްގައި ވިދާޅުވި އެވެ.
އަހްމަދު އަދުހަމަކީ ރައީސް ނަޝީދަށް ހަމަލާ ދިނުމަށްޓަކައި އަތަމާ ޕެލަސްގެ ގޯޅިތެރޭ ހުރެގެން ބޮން ގޮއްވާލި މީހާ އެވެ. އޭނާ ވަނީ ތަހުގީގުގައި އަދި ކޯޓުގައި ވެސް ކުށަށް އިއުތިރާފްވެފަ އެވެ. އެހެންވެ މިދިޔަ ޑިސެމްބަރު 14، 2021 ގައި އަވަސް ނިޔާ މައްސަލައެއްގެ ގޮތުގައި ޝަރީއަތް ކުރިއަށް ގެންގޮސް އޭނާގެ މައްޗަށް 23 އަހަރުގެ ހުކުމެއް އިއްވި އެވެ.
ދެން އެ ހަމަލާއާ ގުޅިގެން ދައުވާ އުފުލާފައި ވަނީ މުޖާޒް އަހްމަދާއި، އަބްދުﷲ އަލިމަނިކާއި، ހއ. ހޯރަފުށީ އަލަނާސިގޭ މުހައްމަދު ތަސްލީމާއި، ތަހުމީން އަހްމަދާއި، އަލީ ހައިޝަމްގެ އިތުރުން ފަހުމީ އަލީ އާއި،މުހައްމަދު ނާޒިމް އަދި އިސްހާގަށެވެ.
ފަހުމީއަށް ތުހުމަތު ކުރެވެނީ ގޮއްވާލި ސައިކަލުގައި ބޮން ހަރުކުރި ވަގުތު ފާރައަށް ހުރި ކަމަށެވެ. ނާޒިމަށް ތުހުމަތު ކުރެވެނީ ބޮން ގޮއްވި އަދުހަމް އަހުމަދަށް ބޮން ގޮއްވަން ބޭނުން ކުރި ރިމޯޓު ދިން ކަމަށެވެ. އަދި އިސްހާގަށް ތުހުމަތު ކުރެވެނީ އެކި ފަހަރުމަތިން ނަޝީދަށް ފާރަލި ކަމަށެވެ.
މުޖާޒްގެ މައްޗަށް ދައުވާ ކުރަނީ އައިއީޑީ ގޮއްވާލުމަށްފަހު އަދުހަމް ފިލުވަން މަސައްކަތް ކުރިކަމަށް ތުހުމަތުކޮށެވެ. ތަހުމީނުގެ މައްޗަށް ގޮވާ ތަކެތި އެހެން ތަނަކަށް ގެންދިއުމަށް އެހީތެރިވެދިންނެވެ.
ފުލުހުން ތުހުމަތު ކުރާ ގޮތުގައި އިސްހާގާއި ތަސްލީމަކީ އެ ހަމަލާގައި އެންމެ އިސް ދައުރެއް އަދާކުރި ކަމަށް ތުހުމަތުވާ ދެ މީހުންނެވެ. އަދި އަބްދުﷲ އަލިމަނިކަކީ ރާއްޖޭގައި ހަރުކަށި ފިކުރު ފެތުރުމަށް އިސްކޮށް ހަރަކާތްތެރިވާ މީހެއް ކަމަށާއި އަދުހަމް ފިލުވުމާއި ހެކި ނައްތާލުމަށް މަސައްކަތް ކޮށްފައިވާ ކަމަށް ތުހުމަތުވާ މީހެކެވެ.
ޓެރެރިޒަމްގެ ދައުވާ އުފުލާފައިވާ އެ އެންމެންވެސް ވަނީ ހާއްސަ ގާނޫނުގެ ދަށުން ޝަރީއަތް ނިމެންދެން ބަންދު ކޮށްފަ އެވެ.
އެ މައްސަލާގައި ޕްރޮސެކިއުޓާ ޖެނެރަލް އޮފީހުން ދައުވާ ނުކުރަން ނިންމީ އަހުމަދު ފާތިހުގެ މައްޗަށެވެ. އެއީ އޭނާގެ މައްޗަށް ކުށް ސާބިތުކުރެވޭ ވަރަށް ހެކި ނެތުމުން ކަމަށް އެ އޮފީހުން ބުނެ އެވެ.
މިއީ ރާއްޖޭގައި މިހާތަނަށް ގޮއްވާލި އެންމެ ބާރުގަދަ އައިއީޑީ ކަމަށް ރަސްމީ އިދާރާތަކުން ބުނާއިރު، މި ބޮން ހަދާފައި ވަނީ ބާޒާރުން އާންމުކޮށް ލިބެން ހުރި ބާވަތްތައް ބޭނުންކޮށްގެންނެވެ. އޭގެއިން ދޭ ގެއްލުން ބޮޑުކުރަން އަޅާފައި ހުރީ ރޭޒާ ފުއްތަކެކެވެ.
