އަހަރެއްގެ ތެރޭ ކޯޓަށް ހުށަހެޅޭ މައްސަލަތަކުގެ ތެރެއިން ނިންމެނީ މަދު މައްސަލައެއް ކަމަށް ކްރިމިނަލް ކޯޓުގެ 2021 ވަނަ އަހަރުގެ ތަފާސްހިސާބިތަކުން ދައްކައިފި އެވެ.
ކްރިމިނަލް ކޯޓުން އިއްޔެ އާންމުކުރި މިދިޔަ އަހަރުގެ ތަފާސްހިސާބުތައް ދައްކާ ގޮތުން 2020 ވަނަ އަހަރު ނިމި 2021ވަނަ އަހަރު ފެށުނު އިރު 1732 މައްސަލަ ނުނިމި އޮތެވެ. މިދިޔަ އަހަރު 773 މައްސަލައެއް އަލަށް ކޯޓަށް ހުށަހަޅާފައި ވާއިރު ނިމިފައި ވަނީ 701 މައްސަލަ އެވެ. އަދި މިދިޔަ އަހަރު ނިމުނު އިރު 1804 މައްސަލަ ނުނިމި ކޯޓުގައި އޮތެވެ.
ޖުމްލަ 9973 އަޑުއެހުން ބޭއްވުމަށް ނިންމި ނަމަވެސް 4،852 މައްސަލަ އެކި އެކި ސަބަބުތަކާ ހެދި ކެންސަލްވި އެވެ.
ކުށުގެ ތުހުމަތުގައި ބަންދު ކުރެވޭ ނުވަތަ ހައްޔަރު ކުރެވޭ މީހުންނާ މެދު ގޮތެއް ނިންމުމުގެ މަސައްކަތް ކޮށްފައި ވާއިރު، 86 އިންސައްތަ މީހުން ބަންދުގައި ބަހައްޓަން އަމުރު ނެރެފައިވެ އެވެ. އަދި 14 އިންސައްތަ މީހުން ބަންދުން ދޫކޮށްލުމަށް ވަނީ ނިންމާފަ އެވެ.
ކޯޓުން ނެރެފައިވާ އަމުރުތައް;
- ބަލާ ފާސްކުރުމުގެ އަމުރު - 405
- ހައްޔަރު ކުރުމުގެ އަމުރު - 399
- ޕާސްޕޯޓު ހިފެހެއްޓުމުގެ އަމުރު - 112
- އެކައުންޓް ފްރީޒް ކުރުމުގެ އަމުރު - 19
- ސާމްޕަލް ނެގުމުގެ އަމުރު - 9
- އަމުރު މުރާޖާ ކުރުމަށް ދެ މީހަކަށް ކޮށްފައި ވާއިރު ކަފާލާތުގެ ފައިސާ ދޫކުރަން ދެ އަމުރެއްގެ އިތުރުން ދެ އަމުރެއް ބާތިލް ކޮށްފައިވޭ
- ޒާތީ މުއާމަލާތުގެ ކޯޓު އަމުރު - 54
- އެހެނިހެން ކޯޓު އަމުރު - 525
މިދިޔަ އަހަރު ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން އާއްމުކުރި ތަފާސްހިސާބުތައް ދެއްކި ގޮތުގައި ކްރިމިނަލް ކޯޓުގައި ކުރިއަށް ގެންދަން ނިންމާ ޝެޑިއުލް ކުރި އަޑުއެހުންތަކުގެ ތެރެއިން ދެ ބައިކުޅަ އެއް ބަޔަކަށް ވުރެ ގިނަ އަޑުއެހުން ކެންސަލްވީ އިދާރީ ސަބަބުތަކާ ހެދި އެވެ.
އަޑުއެހުންތައް ކެންސަލްކުރި މައްސަލަތަކުގެ ތެރެއިން 11.5 އިންސައްތަ އަކީ ދައުވާ ލިބޭ ފަރާތާއި ގުޅުން ހުރެގެން ކެންސަލް ވެފައިވާ މައްސަލަތަކަށް ވާއިރު، ދިފާއި ވަކީލާ ގުޅުން ހުރި 8.2 މައްސަލައެއް ކެންސަލް ކޮށްފައިވެ އެވެ.
