ދަންވި ދަންވިހެން ގައި ހިރުވުމަކީ ބައެއް މީހުންނަށް ދިމާވާ އުނދަގޫ ސިއްހީ މައްސަލައެކެވެ. އާންމުކޮށް މިގޮތަށް ގައި ހިރުވުމަކީ ރޭގަނޑުގެ ނިދީގެ އަރާމު ވެސް ގެއްލެން ދިމާވެދާނެ ސަބަބެކެވެ.
ރޭގަނޑަށް ގައި ހިރުވުމަށް އިނގިރޭސި ބަހުގައި ބޭނުންކުރާ ސިއްހީ ލަފުޒެއް އޮވެ އެވެ. ޕިރުރައިޓިސް ނަމަކަށް ކިޔާ މި ހާލަތަކީ ބައެއް ފަހަރު ބައެއް މީހުންނަށް ވަރަށް ވޭން ހުރި ކަމަކަށް ވެސް ވެ އެވެ. ޕިއުރައިޓިސްް އަކީ ބައެއް ފަހަރު ތަބީއީ ކަމަކުން މެދުވެރިވާ ކަމެކެވެ. އަނެއްބައި ފަހަރު، މިއީ ހަށިގަނޑަށް ކުރިމަތިވެފައިވާ ސިއްހީ ނުރައްކަލެއްގެ އަލާމާތަކަށް ވެސް ވެ އެވެ.
ގުދުރަތީ ސަބަބުތައް
ރޭގަނޑު ގައި ކަހަން އާންމުކޮށް މެދުވެރިވާ ބައެއް ގުދުރަތީ ސަބަބުތަކުގެ ތެރޭގައި ތަބީއީގޮތުން ހަށިގަނޑުގައި ހިނގާ ބައެއް މުހިންމު މަސައްކަތްތައް ހިމެނެ އެވެ. މިސާލަކަށް، އިރުއޮއްސުމުން ހަށިގަނޑުގެ ފިނިހޫނުމިނާއި, ލޭ ދައުރުވުން އިތުރުވެ އެވެ. އޭގެ ސަބަބުން ހަންގަނޑުގައި ކުޑަ ހޫނުކަމެއް ހުންނަ އިރު މިއީވެސް ގައި ކެހުމަށް މެދުވެރިވެދާނެ ސަބަބެކެވެ.
މިފަފަދަ ދެވަނަ ސަބަބަކަށް، ރޭގަނޑު ހަށިގަނޑުގައި އުފައްދާ ސައިޓޯކިންސް މާއްދާ ވެސް ބެލިދާނެ އެވެ. ސައިޓޯކިންސް އަކީ އިންފްލެމޭޓޮރީ (ދިލަނެގުމެއް) އެކުލެވޭ މާއްދާ އެކެވެ. ހަމަ އެހެން، ރޭގަނޑުގެ ވަގުތުތަކުގައި އިންފްލެމޭޝަން ލަސްކޮށްދޭ ހޯމޯން ކަމުގައިވާ ކޯޓިކޯސްޓްރޮއިޑްސް ރިލީޒްކުރާ މިންވަރު މަދުުވުމުން ހަންގަނޑުން ފެން ގެއްލޭ މިންވަރު ދުވާލާއި ބަލާއިރު އިތުރުވެ އެވެ. ފިނި މޫސުމުގައި ހަންގަނޑު ހިކިގެންދަނީ މި ސަބަބާއި ހެދި ހުރެ އެވެ. ހަން ޑްރައިވުމަކީ ހިރުވުމަށް މެދުވެރިވާ ސަބަބެކެވެ.
ސިއްހީ ސަބަބުތައް
ގައިހިރުވުމަކީ ކޮންމެ ފަހަރަކު އަދި އާދައިގެ ކަމެކޭ ހިތާ ދޫކޮށްލެވޭ ކަހަަލަ ކަމެއް ނޫނެވެ. ރޭގަނޑަށް ގައި ކަހަން މެދުވެރިކުރުވާ ސިއްހީ ސަބަބުތަކެއް ވެސް ހުރެ އެވެ.
- ހަމުގެ ބަލިތައް (އެކްޒެމާ, ސޮރޭސިސް, ހައިވްސް)
- ބައެއްކަހަލަ ބަގްސްތައް (ސްކޭބީސް, އުކުނު, ޕިންވޯމްސް)
- ކިޑްނީ އަދި ލިވާގެ ބަލިތައް
- ދަގަނޑު ދައްވުން (އެނީމިއާ)
- ތައިރޮއިޑް މައްސަލަތައް
- ސައިކޮލޮޖިކަލް މައްސަލަތައް (ސްޓްރެސް, ޑިޕްރެޝަން, ސްކިޓްސަފްރީނިއާ)
- ލިއުކީމިއާ އަދި ލިމްފޯމާ
- ނާރުގެ މައްސަލަތަކާއި, ހަކުރު ބަލި
- އެލާޖީ
- މާބަނޑުވުން
ފައިގައި ލޯޝަން ހާކަނީ--
ފަރުވާ އެއް އެބަ އޮތްތަ؟
ރޭގަނޑު ގައި ކަހަން މެދުވެރިވާ ސަބަބު ހޯދުމަކީ މި ވޭނީ ތުރާލުން ސަލާމަތްވުމަށްޓަކައި ކޮންމެހެންވެސް މުހިންމު ކަމެކެވެ. ކެހުން ހުއްޓުވުމަށްޓަކައި ބޭނުންކުރެވިދާނެ ތަފާތު ބޭސްތަކާއި ކްރީމްތައް ފަސޭހައިން ލިބެން ހުރެ އެެވެ. ނަމަވެސް އެބައި ކުރިއަށްގެންދަންވާނީ ޑޮކްޓަރަކަށް ދެއްކުމަށްފަހު ޑޮކްޓަރެއްގެ ލަފާއާ އެކުގަ އެވެ.
ޕިއުރައިޓިސް ގެ ވޭން ކުޑަ ކުރުމަށް ގޭގައި އަޖުމަ ބަލާލެވިދާނެ ބައެއް ހޯމް ރެމެޑީސް ތަކާއި, ދިރިއުޅުމުގެ ވައްޓަފާޅިއަށް ގެނެވިދާނެ ބައެއް ބަދަލުތަކެއް އެބަހުއްޓެވެ. އެންމެ މުހިންމީ ނުތަނަވަސް ހިޔާލުތަކާއި ދުރުން ހިތްހަމަޖެހޭ ދިރިއުޅުމެއް އުޅުމެވެ. މިގޮތުން ހަށިގަނޑުގެ މަސްތައް ރިލެކްސްކުރުވުމަށްޓަކައި މެޑިޓޭޓްކުރުމާއި, ޔޯގާ ފަދަ ލުއި ކަސްރަތުތަކެއް ކުރެވިދާނެ އެވެ.
އެއާއެކު ހަންގަނޑު ޑްރައިވެ ކަހައިގަތުމުގެ ކުރިން ލުބްރިކޭޓްކޮށްދޭނޭ އަލްކޮހޯލް ފްރީ މޮއިސްޗަރައިޒާއެއް ވެސް ބޭނުންކުރެވިދާނެ އެވެ. ހާއްސަކޮށް ނިދުމުގެ ކުރިން މިފަދަ މޮއިސްޗަރައިޒާއެއް މުޅި ގަޔާއި، ހިރުވާ ހިސާބުތަކުގައި އުނގުޅާލުމުން ވެސް ލުޔެއް ލިބޭނެ އެވެ.
ފަސޭހައިން ލިބެން ހުރި ރަނގަޅު ބައެއް މޮއިސްޗަރައިޒާ ތަކުގެ ތެރޭގައި ސެރާވީ, ސެޓަފިލް ޔޫސެރިން އަދި ވެނީކްރީމް ހިމެނެ އެވެ.
މީގެއިތުރުން ހިރުވުން ކަހާ ދިމާލެއްގައި ފިނި އެއްޗެއް ހާކަލާ, ހަމަށް ކުޑަ މަސާޖެއް ދިނުމަކީ ވެސް ހިރުވުން ލުއިކޮށްދޭނެ ކަމެކެވެ.
ހަމައެޔާއެކު ނިދާކޮޓަރީގައި ހިއުމިޑިފައާއެއް ބޭނުންކުރާނަމަ ކޮޓަރީގެ ވައިގެ ތެރެއަށް އިތުރު ތެތްކަމެއް ގެެނެސްދީ ހަންގަނޑު ޑްރައިވުމުން ދުރުކޮށްދޭނޭ އެވެ.
ރޭގަނޑު ގައި ކަހާނަމަ ކޮށްގެން ނުވާނެ ކަންތައްތައް
- ގައި ހިރުވާނެކަހަލަ މެޓީރިއަލްއެއްގެ ނިދާ ހެދުން ބޭނުން ނުކުރުން. ނިދާ ގަޑިއަށް އެންމެ ރަނގަޅުވާނީ މަޑު, ނެޗުރަލް ފައިބާއިން ތައްޔާރުކުރެވިފައިވާ ސިލްކް ނުވަތަ ކޮޓަން ފޮތީގެ ހެދުން
- ކޮޓަރީ އާދައިގެ ވަރަކަށް ފިނިކޮށް ބެހެއްޓުން. މާ ބޮޑަށް ހޫނުވާނަމަ ގައި ކަހާނެ.
- ނިދުމުގެ ކުރިން ކެފެއިން ބޭނުންނުކުރުން. ކެފެއިންގެ ސަބަބުން ލޭ ހޮޅިތައް ފުޅާވެ, ހަންގަނޑުގައި އިތުރު ހޫނުކަމެއް ހުރުމަށް މަގުފަހިކޮށްދޭ.
- ކެހިޔަސް ނުކަހާތި. ކަހާ ކޮންމެފަހަަރަކީ އަދި އިތުރަށް ހިރުވާނެ އަދި ކަހަން ބޭނުންވާނެ ކަމެއް.
- އަބަދުވެސް ނިޔަފަތިތައް ވީހާވެސް ކުރުކޮށް ކަނޑާފައި ބަހައްޓާ
ޑޮކްޓަރަކަށް ދައްކާލުން ބުއްދިވެރި!
ހަމަކީވެސް ހަށިގަނޑުގެ މުހިންމު ގުނަވަނެކެވެ. އެހެންކަމުން މާބޮޑަށް ގައި ހިރުވާ ކަހަންޖެހޭނަމަ ހަމުގެ ޑޮކްޓަރަކަށް ނުވަތަ ޖެނެރަލް ޑޮކްޓަރަށް ދައްކާލެވިދާނެ އެވެ. ހާއްސަކޮށް މެދުނުކެނޑި ދެ ހަފްތާއެއްވަރު ކަހާނަމަ ނުވަތަ ކެހުމަކާއި ހެދި ނިންޖަށް އަސަރުކުރާނަމަ އެ ދެނީ މިކަމުގެ ސީރިއަސް ކަމުގެ ސިގްނަލްތަކެކެވެ. އަަދި ކެހުމާއެކު ބަރުދަން ލުއިވުމާ, ހުންއައުމާ ހަންގަނޑަށް އެއްވެސް ކަހަލަ ބަދަލެއް އަންނަނަމަ ލަސްނުކޮށް ޑޮކްޓަރަށް ދައްކާލަންވާނެ އެވެ.
