ކޮވިޑް-19 ފެތުރޭ މިންވަރު ވަރަށް ބޮޑަށް އިތުރުވެފައިވާތީ އޭޑީކޭ ހޮސްޕިޓަލުގައި ބާއްވައިގެން ފަރުވާދެމުން އަންނަ ބަލި މީހުން ކައިރިއަށް ޒިޔާރަތް ނުކުރެވޭ ގޮތަށް އޭޑީކޭ އިން ހަދައިފި އެވެ.
އެ ހޮސްޕިޓަލުން މިއަދު ނެރުނު ބަޔާނެއްގައި ބުނެފައި އޮތީ ބަލި މީހުން ކައިރިއަށް ޒިޔާރަތް ކުރުމުގެ އިންތިޒާމް ހުއްޓާލާނީ މާދަމާއިން ފެށިގެން ކަމަށެވެ. އެއީ އާންމުންނާއި ސިއްހީ ހިދުމަތްދޭ ފަރާތްތަކުގެ ރައްކަލަކަށް އެ ހޮސްޕިޓަލުން އަޅާ ފިޔަވަޅެއް ކަމަށް ވެސް އޭޑީކޭއިން ބުންޏެވެ.
"މި ހޮސްޕިޓަލުގެ އިލްތިމާސަކީ ކޮވިޑް-19 ގެ ބަލިމަޑުކަމުން އަރައިގަތުމަށް އެންމެންގެ އެއްބާރުލުން ލިބުން،" އެ ހޮސްޕިޓަލުން ބުނެފައިވެ އެވެ.
ޒިޔާރަތް ނުކުރެވުނު ނަމަވެސް ކޮންމެ ބަލި މީހެއް ކައިރީގައި ކޮވިޑުގެ އަލާމާތް ނެތް އެކަކަށް ހުރެވޭނެ ކަމަށް އެ ހޮސްޕިޓަލުން ބުންޏެވެ.
އޭޑީކޭއިން ބުނީ އެ ހޮސްޕިޓަލުގެ އިލްތިމާސަކީ ބަލިވެގެން ނަމަވެސް ކޮންމެހެން ދާންނުޖެހޭ ހާލަތްތަކުގައި އެ ހޮސްޕިޓަލަށް ނުދިޔުން ކަމަށެވެ. އަދި ބުނީ، އެންމެ ރަނގަޅު ގޮތަކީ ހޮސްޕިޓަލަށް ދާ ނަމަ އެކަނި ދިއުން ނުވަތަ އެންމެ އެހީތެރިޔަކާއެކު ދިއުން ކަމަށެވެ.
"އަދި ހިދުމަތް ހޯއްދަވަން ވަޑައިގަންނަވާއިރު ރަނގަޅު ގޮތުގައި މާސްކު އަޅުއްވައި، ހޮސްޕިޓަލުގެ އެކި ސަރަހައްދުތަކުގައި ބަހައްޓާފައިވާ ހޭންޑް ސެނިޓައިޒާ ބޭނުން ކުރެއްވުމަށް ވެސް އިލްތިމާސް ކުރަން،" އޭޑީކޭއިން ނެރުނު ބަޔާނުގައި ބުނެފައިވެ އެވެ.
