އިސްލާމްއާބާދް (ޖެނުއަރީ 21) - ޕާކިސްތާނުގެ އިރުމަތީގައި އޮންނަ މެގަސިޓީ ލާހޯރްގައި ދިން ބޮމުގެ ހަމަލާއެއްގައި ތިން މީހުން މަރުވެ، 22 މީހުންނަށް އަނިޔާވެފައި ވާތީ ސެކިއުރިޓީ ވަރުގަދަކޮށްފި އެވެ.
ސަރުކާރާއި ތެހްރީކޭ ތާލިބާން ޕާކިސްތާން (ޓީޓީޕީ) އާ ދެމެދު އެކުލަވާލި ސުލްހައިގެ އެއްބަސްވުން މިދިޔަ ޑިސެމްބަރު މަހު ނިމުމަކަށް އައުމާ އެކު ޕާކިސްތާނުގައި ދޭ ހަމަލާތައް ވަނީ އިތުރުވެފަ އެވެ.
ނަމަވެސް ބުރާސްފަތި ދުވަހު ލާހޯރްގެ ކާރޫބާރޫ ބޮޑު ވިޔަފާރި ޑިސްޓްރިކްޓަކަށް ދިން ހަމަލާގެ ޒިންމާ ނެގީ ބަލޮޗް ނެޝަނަލިސްޓް އާމީ (ބީއެންއޭ) އިންނެވެ.
އެ ގްރޫޕަކީ ޕާކިސްތާންގެ އެންމެ ފަގީރު ޕްރޮވިންސް، ބަލޮޗިސްތާނުން އުފެދިފައިވާ ވަކިވެގަނެގެން އުޅޭ ގިނަ ގްރޫޕްތަކުގެ ތެރެއިން އެއް އަސްކަރީ ގްރޫޕެވެ.
ފުލުހުންގެ ތަރުޖަމާން ނައީމް އިގްބާލް ވިދާޅުވީ ވެރިރަށް އިސްލާމްއާބާދްގައި ސެކިއުރިޓީ ވަރުގަދަކޮށްފައިވާ ކަމަށެވެ. ސަރުކާރުގެ މައި އޮފީސްތަކާއި ބައިނަލްއަގްވާމީ އިދާރާތަކާއި އެމްބަސީތައް ހުންނަނީ އިސްލާމްއާބާދްގަ އެވެ.
މި ހަފްތާގެ ކުރީކޮޅި އިސްލާމްއާބާދްގައި ޓީޓީޕީގެ ޓެރަރިސްޓުން ސައިކަލުގައި ދަމުން ބަޑި ޖެހުމުގެ ސަބަބުން ފުލުހަކު މަރުވެ، ދެ މީހުންނަށް އަނިޔާވި އެވެ. ރައްދުގައި ބަޑި ޖެހުމުން، ދެ ޓެރަރިސްޓުން ވެސް މަރުވި އެވެ.
ބީއެންއޭ އިން ބުނީ ބުރާސްފަތި ދުވަހުގެ ހަމަލާ ދިނީ ބަލޮޗިސްތާންގައި ޕާކިސްތާން ސިފައިން އަންހެނުންނާއި ކުޑަކުދިން މަރާތީ ބަދަލު ހިފުމުގެ ގޮތުން ކަމަށެވެ.
ސަރުކާރާ ވަކިވެގަނެގެން އުޅޭ ގްރޫޕްތަކުން އެ ޕްރޮވިންސްގައި ހަނގުރާމަ ކުރާތާ އަހަރުތަކެއް ވެއްޖެ އެވެ. ގްރޫޕްތަކުން ބުނަނީ ޕްރޮވިންސްގެ ގުދުރަތީ މުއްސަނދިކަމުގެ ފައިދާ އެ މީހުންނަށް ނުކުރާ ކަމަށެވެ.
