ސިކުނޑީގެ ނާށީގަނޑުން ބައެއް ނަގައިގެން ޓިއުމަރެއް ނައްތާލުމަށް ޓްރީ ޓޮޕް ހޮސްޕިޓަލުން ކާމިޔާބު އޮޕަރޭޝަނެއްކޮށްފި އެވެ.
އެ ހޮސްޕިޓަލުން ބުނީ އެ އޮޕަރޭޝަން ކޮށްފައި ވަނީ ސިކުނޑީގެ ޓިއުމަރަށް ފަރުވާ ކުރަމުންދާ އުމުރުން 66 އަހަރުގެ މީހެއްގެ ކަމަށެވެ. އޮޕަރޭޝަން ކުރިއަށްގެންދިޔައީ އެ ހޮސްޕިޓަލުގެ "ކްރެނިއޮޓޮމީ އަދި އިންޓަރކުރޭނިއަލް ޓިއުމާ" ޑިޕާޓްމަންޓުންނެވެ.
"މި އޮޕަރޭޝަން ގޮސްފައިވަނީ ވަރަށް ކާމިޔާބުކޮށްކަން އަޅުގަނޑުމެން ވަރަށް އުފަލާއިއެކު ފާހަގަކޮށްލަން،" ޑރ. ހުއާން ވިދާޅުވި އެވެ.
އެ އޮޕަރޭޝަން ކުރިއަށް ގެންދިޔައީ ނާރުގެ އޮޕަރޭޝަންތަކަށް ހާއްސަ ޑޮކްޓަރު، ޑރ. ހުއާން ލޮރީޑޯ އާއި ހޭނައްތާ ޑޮކްޓަރުން ކަމަށްވާ ޑރ. އައިމިނަތު ފިއުނާ އާއި ޑރ. ވިސްވަޖިތް އުދޭކުމާރު އަދި މެޑިކަލް އޮފިސަރު ޑރ. ގާސިމް ނިމާލް އާއި ހޮސްޕިޓަލްގެ ޓެކްނިކަލް ސްޓާފުންނާއި ނަރުހުންގެ ޓީމަކުންނެވެ.
ޓްރީޓޮޕް ހޮސްޕިޓަލުގެ ނާރުގެބަލިތަކުގެ ހާއްސަ އަދި ނާރުގެ އޮޕަރޭޝަންތަކަށް ހާއްސަ ޑިޕާޓްމަންޓް ހިންގަމުން ގެންދަނީ އެފަދަ އޮޕަރޭޝަންތަކުގައި އެތަކެއް އަހަރުތަކެއްގެ ތަޖުރިބާ ލިބިފައިވާ ކޮންސަލްޓަންޓް ޑޮކްޓަރުންނެވެ.
އެގޮތުން ޑރ. ހުއާން ލޮރީޑޯއަކީ މި ދާއިރާގެ ގިނަގުނަ ތަޖުރިބާތަކެއް ލިބިފައިވާ، ނާރުގެ އޮޕަރޭޝަންތަކަށް ހާއްސަ ޑޮކްޓަރެކެވެ. ޑރ. ހުއާން ފާހަގަ ކޮށްލެވެނީ ތަފާތު ނާރުގެ ބަލިތައް ދެނެގަނެ، ވީހާވެސް ކުޑަކޮށް ފަޅާލައިގެން ކާމިޔާބު ބޮޑެތި އޮޕަރޭޝަންތައް ކުރައްވާފައިވާ ޑޮކްޓަރެއްގެ ގޮތުގަ އެވެ.
އޭނާ ވަނީ ސްޕެއިންގެ ހޮސްޕިޓާލެސް ސެން ރޯގުގެ ނާރުގެ އޮޕަރޭޝަން ޑިވިޒަންގެ އިސްވެރިޔާގެ މަގާމާއި ކެނެރީ އައިލެންޑްސްގެ އައި.ސީ.އެން-އިންސްޓިޓިއުޓޯ ކެނޭރިއޯ ޑި ނިއުރޯސިރިއުޖިއާގެ ޑިރެކްޓަރުގެ މަގާމުފަދަ، އިސް މަގާމުތައް ވެސް ފުރުއްވާފަ އެވެ. އަދި ޒިއުރިކް ސްވިޓްޒަލޭންޑުގައި މައިކްރޯސާރޖަރީ، ލަންޑް ޔުނިވާރސިޓީގައި ނިއުރޯ-އިންޓެންސިވް ކެއާ، ހަވާޑް ޔުނިވާސިޓީ އަދި މެލްބޯންގައި ނިއުރޯ ސާޖަރީ، އަދި ޑެލަސްގައި ވެސްކިއުލޯ އިން އެތަކެއް ވިޒިޓިންގް ފެލޯޝިޕް ކްރެޑިޓްތައް ވެސް އޭނާ ހޯއްދަވާފައިވެ އެވެ.
