އދ. ދަނގެތީގައި އަނިޔާވެރި ގޮތަކަށް އެ ރަށު ވިޔަފާރިވެރިޔާ މަހްމޫދް އަބޫބަކުރުގެ މަރައިލި ކަމަށް ތުހުމަތު ކުރެވޭ ބަންގްލަދޭޝްގެ ޝާ އޮލަމް މިއާ (ސާލިމް) ޝަރީއަތުގެ މަޖިލީހުގައި ކުށަށް އިއުތިރާފުވެއްޖެ އެވެ.
މަހްމޫދް، 57، މަރާލުމަށްފަހު ފަޅު ގޯއްޗެއްގެ ފެންވަޅު ތެރެއަށް އެއްލާލާފައި އޮއްވާ ފެނުނީ މިދިޔަ އޮކްޓޯބަރު 13، ގަ އެވެ. ފައިސާގެ ބޭނުމަށް މަހްމޫދް މަރާލީ އޭނާ ކަމަށް ފުލުހުންގެ ތަހުގީގުގައި ވެސް ސާލިމް އެއްބަސްވެފައިވާއިރު އޭނާގެ މައްޗަށް ދައުލަތުން ކުރަނީ ގަސްދުގައި މީހަކު މަރާލުމުގެ ދައުވާ އާއި މައްޔިތެއްގެ ބޭނުން ނަހަމަ ގޮތުގައި ހިފުމުގެ ކުށުގެ ދައުވާ އެވެ.
ސާލިމަކީ ދަނގެތީގައި ދިރިއުޅޭ އެރަށުގެ އުމުރުން ދުވަސްވީ މީހެއް ބެލުމަށް ގެނެސްފައި ހުރި މީހެކެވެ. މަހްމޫދު މަރާލީ އޭނާއަށް ގުޅައިގެން ސާލިމް ދިރިއުޅޭ ގެއަށް ގެންގޮސް ވަޅިން ހަމަލާދިނުމަށްފަހު އެވެ. އޭނާ މަރާލުމަށްފަހު ހަށިގަނޑު ގޯންޏަކަށް ލައިގެން ގެންދިޔައީ ފަޅު ގެއަކަށެވެ. އެއީ މަހްމޫދު އިމާރާތް ކުރަމުންދިޔަ ގެއެކެވެ.
މިއަދު މި މައްސަލާގައި ބޭއްވި އިބްތިދާއީ ފުރަތަމަ އަޑުއެހުމުގައި ދައުވާ އިއްވުމުން ސާލިމް ހަމައެކަނި ބުނީ ދައުވާގައިވާ ހުރިހާ ކަމަކަށް އެއްބަސްވާ ކަމަށާއި އިތުރަށް ދައްކާނެ ވާހަކައެއް ނެތް ކަމަށެވެ. އޭނާއަށް ދައުލަތުން ވަކީލަކު ހަމަޖައްސައިދީފައިވާއިރު އަމިއްލައަށް ވަކީލަކު ހޯދަން ފައިސާ ނެތުމުން ކުރިއަށް ދާން ބޭނުންވަނީ އެ ވަކީލާއެކު ފާހަގަކުރި އެވެ.
ސާލިމަށް ދައުލަތުން ހަމަޖައްސައިދީފައިވާ ވަކީލް މަޖީދު އަލީ ވިދާޅުވީ މަހުމޫދު މަރާލެވުނީ ސައިތާނާ އޭނާގެ ބޮލަށް ވެރިވެގެން ކަމަށް ބުނެފައިވާ ކަމަށާއި އެކަމާ ދެރަވެ މާފަށް އެދިފައިވާ ކަމަށެވެ. އޭނާ ބޭނުން ވަނީ ތަހުގީގުވީ އިއުތިރާފު ދަމަހައްޓައި, ދައުލަތާއެކު އިއުތިރާފު އެއްބަސްވުމަކަށް ދާން ކަމަށް ވެސް ވަކީލް ވިދާޅުވި އެވެ.
ނަމަވެސް, ދައުލަތުގެ އައިޝަތު މުނާ ވިދާޅުވީ ސާލިމާއެކު އިއުތިރާފު އެއްބަސްވުމަކަށް ދާން ދައުލަތުން ބޭނުން ނުވާ ކަމަށެވެ. އެއީ މިއީ މަރުގެ މައްސަލައަކަށްވެފައިވާ, ވާރިސުންގެ ބަސް ހޯދިއިރު ސާލިމްގެ ކިބައިން ގިޞޯޞް (މަރަށް މަރު) ހިފަން ބޭނުންވާ ކަމަށް އާއިލާއިން އަންގާފައިވާތީ ކަމަށް ވަކީލް ފާހަގަކުރެއްވި އެވެ.
ސާލިމްގެ ދިފާއީ ވަކީލް ވިދާޅުވީ މަރުގެ މައްސަލައެއް ނަމަވެސް, އިއުތިރާފު އެއްބަސްވުމަކަށް ދިޔުމުގެ ފުރުސަތު އޮންނާނެ ކަމަށް ދެކެވަޑައިގަންނަވާ ކަމަށެވެ. އެއީ, ސާލިމް ވަނީ ކުރެވުނު ކުށަށް މާފަށް އެދި ތައުބާވެފައިވާތީކަން އޭނާ ފާހަގަކުރެއްވި އެވެ.
އިއުތިރާފު މައްސަލަތަކަކީ އަވަސް ނިޔާގެ ދަށުން ކުރިއަށް ގެންދާ މައްސަލަތަކެއް ނަމަވެސް, ދައުލަތުން ވަނީ މި މައްސަލަ ހެކި ހުށަހަޅައިގެން ކުރިއަށް ގެންދަން ބޭނުންވާކަން ހާމަކުރައްވާފަ އެވެ. ނަމަވެސް, ދިފާއީ ވަކީލް އެކަމަށް އިއުތިރާޒު ކުރައްވަމުން ވިދާޅުވީ އިއުތިރާފު މައްސަލަތައް ކުރިއަށް ގެންދަން ގާނޫނުގައި އޮތް ގޮތަކީ އަވަސް ނިޔާ ކަމަށެވެ. އެކަމަށް މައްސަލަ ބައްލަވާ ގާޒީ, ކޯޓުގެ އިސްގާޒީ އަހުމަދު ޝަކީލް ވެސް ތާއިދު ކުރެއްވި އެވެ.
އިސްގާޒީ ވިދާޅުވީ މައްސަލާގައި ދެން އޮންނާނީ އަވަސް ނިޔާގެ އަޑުއެހުމެއް ކަމަށާއި އެއީ, މި މަހުގެ 26 ވަނަ ދުވަހު ކަމަށެވެ. އެ އިއުލާނަށްފަހު, މިއަދުގެ އަޑުއެހުން ނިންމާލި އެވެ.
މި މައްސަލާގެ ތަހުގީގު ނިންމައި ފުލުހުން ބޭއްވި ނޫސްވެރިންގެ ބައްދަލުވުމުގައި ބުނި ގޮތުގައި މަހުމޫދު މަރާލި ކަމަށް ތަހުގީގުގައި އެއްބަސްވެ ސާލިމް ކޯޓަށް އިއުތިރާފުގެ ބަޔާނެއް ދީފައިވާ ކަމަށެވެ. އަދި މަރާލި ކަމަށް ބެލެވޭ ސަބަބަކީ ނުވަތަ މޯޓިވަކީ ފައިސާ ހޯދުންކަން ތަހުގީގަށް ފާހަގަ ކުރެވިފައިވާ ކަމަށެވެ.
މަހުމޫދު އަތުން ފައިސާ ހޯދުމަށް ސާލިމް ބޭނުންވި ސަބަބުތައް ތަހުގީގަށް ފާހަގަ ކުރެވިފައިވާ ކަމަށާއި އަދި އެ ރޭ މަހުމޫދަށް ސާލިމް ދިރިއުޅޭ ގެއަށް ދައުވަތު ދިން ސަބަބު ވެސް ހޯދިފައިވާ ކަމަށް ފުލުހުން ބުންޏެވެ.
