ރެހެންދި އެވޯޑަށް ކުރިމަތިލުމުގެ ފުރުސަތު ހުޅުވާލައި ޖެންޑާ މިނިސްޓްރީން މިދިޔަ ބުރާސްފަތި ދުވަހު އެކަން އާންމުކޮށް އިއުލާނުކޮށްފި އެވެ.
ރެހެންދި އެވޯޑަކީ އެކިއެކި ދާއިރާތަކުން އަންހެނުން ކުރާ މަސައްކަތްތަކާއި ގައުމީ ތަރައްގީއަށާއި މުޖުތަމައު ބިނާ ކުރުމަށް އަންހެނުން އަދާކުރާ ދައުރާއި މުޖުތަމައުގައި އަންހެނުންގެ ހައްގުތައް ރައްކާތެރިކުރުމަށާއި އަންހެނުންގެ ކުރިއެރުމަށް ކުރާ މަސައްކަތުގެ އަގުވަޒަން ކުރުމަށް ދޭ އެވޯޑެކެވެ.
ވަކިވަކި ފަރުދުންނާއި މުއައްސަސާތަކާއި ޖަމުއިއްޔާތަކާއި ޖަމާއަތްތަކަށް ވެސް އެ އެވޯޑަށް ކުރިމަތިލެވިދާނެ އެވެ. އެއީ 2014 ވަނަ އަހަރުން ފެށިގެން ކޮންމެ އަހަރަކު ވެސް ސަރުކާރުން ދެމުން އަންނަ އެވޯޑެކެވެ.
މި އަހަރު މި އެވޯޑުގެ ގޮތުގައި ދިނުމަށް ހަމަޖެހިފައިވަނީ ޝީލްޑަކާއި ގައުމީ އެކިއެކި މުނާސަބަތުތަކުގައި ބޭނުންކުރެވޭ ގޮތަށް ފަރުމާކޮށްފައިވާ ހެދުމުގައި ޖަހާ "ބްރޫޗް" އެއް ކަމަށް ޖެންޑާ މިނިސްޓްރީން މައުލޫމާތު ދިނެވެ. މި އެވޯޑަށް ނަން ހުށަހެޅުމުގެ ފުރުސަތު އަންނަ މަހުގެ 10 ވަނަ ދުވަހުގެ 2:00 ގެ ނިޔަލަށް ވަނީ ހުޅުވާލާފަ އެވެ.
މި އެވޯޑަށް ކުރިމަތިލުމުގެ ގޮތުން އަމިއްލައަށް ނަން ހުށަހެޅުމުގެ ފުރުސަތާއި އެހެން ފަރާތްތަކުން ނަން ހުށަހެޅުމުގެ ފުރުސަތު (ނޮމިނޭޓްކުރުމުގެ) ފުރުސަތު މިހާރު ވަނީ ޝަރުތު ހަމަވާ ހުރިހާ އެންމެނަށް ވެސް ހުޅުވާލާފައި ކަމަށް ޖެންޑާ މިނިސްޓްރީން އިއުލާނުކުރި އެވެ.
މި އެވޯޑު ދިނުމަށް ހަމަޖެހިފައިވާ ދާއިރާތަކުގެ ޝަރުތުތައް އެކުލެވޭ އުސޫލާއި އެޕްލިކޭޝަން ފޯމު، ޖެންޑާ މިނިސްޓްރީގެ ވެބްސައިޓު www.gender.gov.mv ޑައުންލޯޑު ކުރެވޭނެ އެވެ.
އެވޯޑަށް ކުރިމަތިލާ މީހުންގެ ތެރެއިން މި އެވޯޑު ލިބޭ ފަރާތްތައް ކަނޑައަޅާނީ މިނިސްޓްރީން އެކަމަށް ހާއްސަކޮށް އެކުލަވާލާ "ރެހެންދި އެވޯޑު ކޮމިޓީން" ކަމަށް އެ މިނިސްޓްރީން ހާމަކުރިއެވެ. އަދި ރެހެންދި އެވޯޑު ލިބޭނީ ހުށަހަޅާ ލިޔެކިޔުންތަކާއި އިންޓަވިއުތަކުގެ މައްޗަށް ބިނާކޮށް 75 އިންސައްތައަށްވުރެ މަތިން ލިބޭ ފަރާތްތަކަށް ކަމަށް ވެސް އެ މިނިސްޓްރީން މައުލޫމާތުދިނެވެ.
ރެހެންދި އެވޯޑު 2020 ވަނަ އަހަރު ނުވަ ބޭފުޅަކަށް ލިބިފައިވެ އެވެ. ކޮންމެ އަހަރަކު ވެސް މި އެވޯޑު ހަވާލުކުރަނީ ބައިނަލްއަގްވާމީ އަންހެނުންގެ ދުވަސް ފާހަގަކުރުމުގެ ގޮތުން ބާއްވާ ސްމީ ޖަލްސާގަ އެވެ.
