ރާއްޖެބަލި ނުވަތަ "ރޫމަޓޮއިޑް އާތްރައިޓިސް" އަކީ ހުޅުހުޅުގައި ރިއްސާ ދުޅަވުން ފަދަކަންކަން ކުރިމަތިކުރުވާ ބައްޔެކެވެ. މި ބަލި ރާއްޖޭގައި އާންމުވެފައިވާތީ މިކަމަށް ބެނުންވާ ޒަމާނީ ފަރުވާ ދިނުމުގެ ގޮތުން މިކަމަށް ހާއްސަ ޑިޕާޓްމެންޓެއް އޭޑީކޭ ހޮސްޕިޓަލުގައި ގާއިމުކޮށްފި އެވެ.
މީގެ ދެ މަސް ކުރިން އޭޑީކޭގައި ގާއިމްކޮށްފައިވާ "ރޫމަޓޮލޮޖީ ޑިޕާޓްމެންޓް" އެ ހޮސްޕިޓަލުގައި ގާއިމްކުރެވިފައިވަނީ ރާއްޖެ ބައްޔާއި އެތެރެހައްޓާއި ހުޅުހުޅަށްޖެހޭ ތަފާތު ބަލިތަކަށް ފަރުވާ ދެވޭވަރުގެ ފެންވަރު ރަނގަޅު ވަސީލަތްތަކާއެކު ކަމަށް އޭޑީކޭއިން މައުލޫމާތުދެ އެވެ.
މީގެކުރިން އޭޑިކޭއިން މި ބަލިތަކަށް ފަރުވާ ދެމުން ދިޔައީ އެތެރެހަށީގެ ޑޮކްޓަރުން މެދުވެރިކޮށެވެ. ނަމަވެސް އަލަށް ހުޅުވުނު ރޫމަޓޮލޮޖީ ޑިޕާޓްމެންޓާއެކު މި ހިދުމަތްތަކުގެ ފެންވަރު ވަރަށް ބޮޑުތަން ރަނގަޅުވެގެން ދާނެ ކަމަށް އޭޑީކޭއިން މައުލޫމާތުދެ އެވެ.
"އަހަރެން މި ދާއިރާގައި މަސައްކަތްކުރާތާ ވިއްސަކަށް އަހަރުވެއްޖެ. އެހެން ގައުމުތަކުގައި ވެސް މަސައްކަތް ކުރިން. އެކަމަކު ރާއްޖެހާ މިބަލި އާންމު ގައުމެއް އަހަރެން ނުދެކެން. ރާއްޖޭގެ އާބާދީއާ އަޅާބަލާއިރު މުޅި ގައުމުގައި އާތްރައިޓިސް ބަލި ތަހަންމަލު ކުރަމުންދާ މީހުން ނިސްބަތުން ވަރަށް ގިނަ. މިއީ ކަންބޮޑުވާން ޖެހޭ ކަމެއް," އޭޑީކޭގެ ރޫމަޓޮލޮޖީ ޑިޕާޓްމެންޓުގައި މަސައްކަތްކުރައްވާ ޑރ. އަމާލް ވިދާޅުވި އެވެ.
ރާއްޖެ ބަލި ނުވަތަ އާތްރައިޓިސްއަކީ ކޮބާ؟
އާތްރައިޓިސްއަކީ އެންމެ ބައްޔެއް ނޫނެވެ. އެއީ ހުޅުތައް ދުޅަވުމާ، ހުޅުތަކުގައި ރިއްސުމާއި މިފަދަ ބަލިތަކަށް ކިޔާ ޖުމްލަ ނަމެވެ. މި ބަލި ކުރިމަތިވަނީ އިންސާނާގެ އަމިއްލަ ދިފާއީ ނިޒާމް އެމީހެއްގެ ހަށިގަނޑުގައިވާ ގުނަވަންތަކާއި ސިލޯށިތަކަށް(ޓިޝޫތަކަށް) ހަމަލާ ދިނުމުންނެވެ.
މި ބައްޔަށް ފަރުވާ ނުދެވި ގިނަ ދުވަސް ވެއްޖެނަމަ ހުޅުތައް ދުޅަވެ، ހުޅުގައި ރިއްސާ، ހުޅުގެ ކަށިތައް ގިރި، ހުޅުގައި އައިބު އުފެދުންވެސް އެކަށީގެންވެ އެވެ.
ޑރ. އަމާލް:
ކޮންމެ އުމުރުފުރާއެއްގެ މީހަކަށް ވެސް ޖެހުން އެކަށީގެންވާ މި ބަލި ތަހަންމަލު ކުރަމުންދާ މީހުންގެ ތެރޭގައި ނިސްބަތުން އެންމެ ގިނައީ އުމުރުން ދޮށީ އަންހެނުން ކަމަށް އޭޑީކޭގެ ޑޮކްޓަރު މައުލޫމާތު ދެއްވި އެވެ. މި ބަލީގެ އަލާމަތްތަކަކީ ދެނެގަންނަން އުނދަގޫ އަލާމާތްތަކެއް ކަމަށާއި ދުވަސްކޮޅަކަށް ފެނިފައި ގެއްލުން ވެސް އެކަށީގެންވާ އަލާމާތްތަކެއް ކަމަށް އޭޑީކޭގެ ރޫމަޓޮލޮޖީ ޑިޕާޓްމެންޓުގެ ޑޮކްޓަރު މައުލޫމާތު ދެއްވި އެވެ. އެހެންކަމުން ވީ އެންމެ އަވަހަކަށް މި ބަލި ދެނެގަނެ ފަރުވާ ހޯދަން ފެށުމަކީ ވަރަށް މުހިންމު ކަމެއްކަން ޑރ. އަމާލް ފާހަގަކުރެއްވި އެވެ.
ހިނގާބިނގާވެ އުޅޭއިރު ކުއްލިކައަށް އަރާ ތަދުތަކާއި ސިޑިން މައްޗަށް އަރާ ފައިބާއިރު ކަކުލުގައި ރިއްސުމާއި، ހެލިފެލިވެ އުޅޭއިރު އެކި ކަހަލަ އުނދަގޫތައް އިހުސާސްކުރެވެން ފަށައިފިނަމަ ބަލި ސީރިއަސް ވީ ކަން ދެނެގަންނަން ޖެހެ އެވެ. މިފަދަ އުނދަގޫތައް ކުރިވަތިވާން ފެށުމަކީ އިންޒާރެކެވެ. މި ބަލި ދެނެގަތުމަށްޓަކައި ހަދަން ޖެހޭ ޓެސްޓުތައް އޭޑީކޭ ހޮސްޕިޓަލުގެ ރޫމަޓޮލޮޖީ ޑިޕާޓްމެންޓުން މިހާރު ހެދެން ހުރެ އެވެ.
މި ބަލި ރާއްޖޭގައި އެހާ އާންމުވެފައިވަނީ ކޮން ސަބަބަކާހުރެ ކަމެއް ޔަގީންކަމާއެކު ބުނަން ނޭނގެ އެވެ. ނަމަވެސް މި ބަލި ޖެހުމުން ރައްކާތެރިވުމަށް ގަވައިދުން ކަސްރަތުކުރުމާއި، ހަށިގަނޑުގެ ބަރުދަން އެއް ހަމައެއްގައި ހިފަހައްޓަން މަސައްކަތް ކުރުމާއި، ދުންފަތުގެ އިސްތިއުމާލު ނުކުރުމަށް ޑޮކްޓަރުން އިރުޝާދު ދެއްވަ އެވެ.
އޭޑީކޭއިން ލިބެން ހުންނަ ފަރުވާ
ރާއްޖެބައްޔަކީ ވަކި ހާއްސަ ފަރުވާއެއް ހޯދިފައި ނުވާ ބައްޔެކެވެ.
"ހުޅުހުޅުގައި ރިއްސާ ދުޅަވުން ފަދަ ކަމެއް ދެ ތިން މަސް ވަންދެން ފާހަގަކުރެވިއްޖެނަމަ ވީ އެންމެ އަވަހަކަށް ޑޮކްޓަރަށް ދެއްކުން މުހިންމު. މި ބަލިން އެއްކޮށް ރަނގަޅުވަނީ ވަރަށް މަދު މީހުން. އެކަމަކު ކުރިން ޑައެގްނޯޒް ކުރެވި ފަރުވާތައް ދެވެން ފެށިއްޖެނަމަ ބަލީގެ އަލާމާތްތައް ކޮންޓްރޯލްކުރެވޭނެ،" ކުރިން ވާހަކަ ދެއްކެވި ޑރ. އަމާލް ވިދާޅުވި އެވެ.
އޭޑީކޭގެ ރޫމަޓޮލޮޖީ ޑިޕާޓްމެންޓުގައި މި ބައްޔަށް ބޭސްކުރުމަށް ބޭނުންކުރާ ތަފާތު ވައްތަރުގެ ބޭސްތަކާއި އިންޖެކްޝަންތައް ލިބެން ހުރެ އެވެ. އަދި މި ހިދުމަތްތައް އާސަންދާއިން ވެސް ކަވަރު ކޮށްދެ އެވެ.
އެހެންކަމުން މިބަލި ތަހަންމަލު ކުރަމުންދާ މީހުން ފަރުވާ ހޯދުމަށް ރާއްޖޭން ބޭރަށް ދާކަށް މިހާރު ކޮންމެހެން މަޖުބޫރެއް ނޫނެވެ.
އޭޑީކެ ހޮސްޕިޓަލުން ލިބެން ހުންނަ ފަރުވާތަކުގެ ފެންވަރު ރަނގަޅު ކުރުމަށާއި ބޭސްފަރުވާގެ އާ ހިދުމަތްތައް ރައްޔިތުންނަށް ފޯރުކޮށްދިނުމަށް ފާއިތުވި އަހަރުތަކުގެ ތެރޭގައި އެ ހޮސްޕިޓަލުން ވަނީ ގިނަ މަސައްކަތްތަކެއް ކޮށްފަ އެވެ.
އަލަށް ހުޅުވާލެވުނު ރޫމަޓޮލޮޖީ ޑޮޕާޓްމެންޓުގެ އިތުރުން ރާއްޖެއިން ފަސޭހައިން ލިބެންނެތް އެހެނިހެން ހިދުމަތްތައް ވެސް އެ ހޮސްޕިޓަލުން އަންނަނީ ތައާރަފް ކުރަމުންނެވެ.
