އަރަބިއްޔާ ސްކޫލްގެ ވަގުތީ އިމާރާތުގެ މަސައްކަތް ޓައިމްލައިންއާ އެއްގޮތަށް ކުރިއަށްދާ ކަމަށް އެޑިއުކޭޝަން މިނިސްޓްރީން މައުލޫމާތު ދީފި އެވެ.
އިއްޔެ އެޑިއުކޭޝަން މިނިސްޓާ، އައިޝަތް އަލީ ވަނީ އެ އިމާރާތުގެ މަސައްކަތް ކުރިއަށްދާ މިންވަރު ބެއްލެވުމަށް ޒިޔާރާތް ކުރައްވާފަ އެވެ. މިނިސްޓްރީގެ އަމާޒަކީ ދިރާސީ އާ އަހަރުގެ ކިޔެވުން ފެށޭ ދުވަސް ކަމުގައިވާ މި މަހު 16 ވަނަ ދުވަހު ސްކޫލު ހުޅުވައި ކުދިންނަށް ކިޔަވަން ދެވޭވަރު ކުރުން ކަމުގައި މިނިސްޓްރީން މައުލޫމާތުދިނެވެ.
މިހާތަނަށް މި މަސައްކަތަށް ދައުލަތުން ހަރަދުކޮށްފައިވާ މިންވަރާ ބެހޭ މައުލޫމާތު އެ މިނިސްޓްރީން އަދި ހާމަކޮށްފައެއް ނުވެ އެވެ. ނަމަވެސް މި މަސައްކަތް ކުރިއަށް ގެންގޮސްފައިވަނީ ވަރަށް ގިނަ ފަރާތްތަކެއްގެ އެއްބާރުލުމާއި އެހީތެރިކަމާއެކު ކަން އެ މިނިސްޓްރީން ކޮށްފައިވާ ޓްވީޓެއްގައި ފާހަގަކޮށްފައިވެ އެވެ.
އަރަބިއްޔާ ސްކޫލްގެ އިމާރާތް ބާވެ، ސްޓްރަކްޗަރަށް ދިމާވެފައިވާ މައްސަލަތަކާ ގުޅިގެން އެ އިމާރާތުގައި ކިޔަވައިދިނުން ރައްކާތެރި ނޫންކަމަށް އެޑިއުކޭޝަން މިނިސްޓްރީން ނިންމައި، އެ ސްކޫލުގެ ބެލެނިވެރިންގެ ރައުޔު ހޯދުމަށް ފަހު މީހާރު ދަނީ ކުރީގެ ފޮރިން މިނިސްޓްރީ އިމާރާތުގައި ކްލާސްރޫމްތައް ގާއިމްކޮށް ވަގުތީ ގޮތުން ކިޔަވައިދިނުމުގެ މަސައްކަތް ފެށުމަށްޓަކައި ކުރަންޖެހޭ ކަންކަން ކުރަމުންނެވެ.
އެ އިމާރާތް އަރަބިއްޔާއާ ހަވާލުކުރުމަށް ރައީސް ނިންމަވާފައިވަނީ ކިޔަވައިދޭން ފެށޭވަރަށް ހުރިހައި އިންތިޒާމެއް ސަރުކާރުން ހަމަޖެއްސެވުމަށް ފަހުގައި ކަމަށް މިދިޔަ އަހަރުގެ ޑިސެމްބަރު މަހު އެމަނިކުފާނު ވިދާޅުވި އެވެ. އަރަބިއްޔާ ސްކޫލުގެ އާ އިމާރާތެއް ބާ ޖަމާލުއްދީން ބިމުގައި ގާއިމް ކުރެވެންދެން ދަރިވަރުންގެ ކިޔެވުން ބުރޫއެރުމަކާ ނުލައި ކުރިއަށް ގެންދެވޭނެ ހެން މި އިމާރާތް ތަރައްގީކުރުމަށް ސަރުކާރުން ވަނީ ނިންމަވާފަ އެވެ.
