މި މަހުގެ ތިންވަނަ ދުވަހު ޔަމަންގެ އަލް ހުދައިދާ ކައިރިން ދަތުރުކުރަމުންދިޔަ ޔޫއޭއީގެ ކާގޯ ބޯޓެއް ކަމުގައިވާ "ރަވާބީ" ހައިޖެކް ކުރި މައްސަލަ ރާއްޖޭން ކުށްވެރިކޮށްފި އެވެ.
މި ބަޔާނުގައި ސަރުކާރުން ވަނީ ޔަމަނާއި އިރާނަށް ނިސްބަތްވާ ޖަމާއަތެއް ކަމުގައިވާ ހޫތީ ހަނގުރާމަވެރިން ހިންގާފައިވާ މި ޖަރީމާ ކޮށްވެރިކޮށް، މިފަދަ އަމަލުތަކުގެ ސަބަބުން ބައިނަލްއަގުވާމީ ވިޔަފާރިއަށާއި ދަތުރުފަތުރުގެ ކަންކަމަށް ނުރައްކާވާނެކަން ފާހަގަކޮށްފަ އެވެ.
"މިފަދަ އަމަލުތަކުގެ ސަބަބުން ބައިނަލްއަގުވާމީ ދުނިޔެއިން އިރުމަތީ ގައުމުތަކުގައި ސުލްހަވެރިކަން ގާއިމްކުރުމަށް ކުރަމުންދާ މަސައްކްތަކަށް ބުރޫއެރުމަށް މަގުފަހިވާނެތީ ދިވެހި ސަރުކާރުން މި އަމަލު އެންމެ ހަރުކަށި އިބާރާތުން ކުށްވެރިކުރަން. އަދި މިފަދަ މައްސަލަތައް ހައްލުކޮށް ކަނޑުދަތުރުފަތުރު ކުރާ އުޅަނދުތަކުގެ ސަލާމަތާއި ރައްކާތެރިކަން ކަށަވަރުކުރުމަށް އަޅަންޖެހޭ ފިޔަވަޅުތައް އެޅުމަށް ކަމާބެހޭ އިދާރާތަކަށް ގޮވާލަން" ސަރުކާރުން ނެރުނު ނެރެފައިވާ ބަޔާނުގައި ބުންޏެވެ.
"ރަވާބީ" އަކީ ސައުދީ އޮޕަރޭޝަނަލް ހޮސްޕިޓަލަކަށް ބޭނުންވާ މެޑިކަލް ސާމާނާއި، މުވާސަލާތީ ވަސީލަތްތަކާއި، ކާބޯތަކެތި ހިފައިގެން ރަސްމީ ދަތުރެއްގައި ޔަމަނުގެ ސޮކޮޓްރާއިން ސައުދީގެ ޖިޒާންއަށް ދަތުރުކުރި ބޯޓެކެވެ. މި ބޯޓު ހޫތީ ހަނގުރާމަވެރިން ހައިޖެކް ކޮށްފައިވަނީ މިމަހުގެ ތިންވަނަ ދުވަހުގެ މެންދަމުގެ ވަގުތެއްގައެވެ.
މި މައްސަލައާ ގުޅިގެން ވަރަށް ގިނަ ގައުމުތަކުން ކަންބޮޑުވުން ފާޅުކޮށްފައި ވެއެވެ. ރާއްޖޭގެ އިތުރުން މިސުރާއި ކުވެއިތު އަދި ޖޯޑަންއިންވެސް މިއަމަލު ވަރަށް ހަރުކަށި އިބާރާތުން ކުށްވެރިކޮށް މިކަމާ ދެކޮޅަށް ފިޔަވަޅު އެޅުމަށް ވަނީ ގޮވާލާފަ އެވެ.
