ކޮވިޑުގެ ބަލިމަޑުކަމާ ގުޅިގެން އިސްލާމިކް ޑިވެލޮޕްމަންޓް ބޭންކް (އައިއެސްޑީބީ) އިން ހަދިޔާކުރި 7.1 މިލިއަން ރުފިޔާއިން ގަތް ސިއްހީ އާލާތްތައް އެ ރަށްތަކަށް ނުފޮނުވައި ގުދަންކޮށްފައި ހުރުމުން އޮޑިޓާ ޖެނެރަލްގެ އޮފީހުން ކަންބޮޑުވުން ފާޅުކޮށްފި އެވެ.
ކޮވިޑާ ގުޅިގެން ހެލްތު މިނިސްޓްރީގެ އެމަޖަންސީ ރެސްޕޮންސް ޕްރޮޖެކްޓުގެ ފުރަތަމަ ފިޔަވަހީގެ ދަށުން މެއި 21، 2020 އިން ފެށިގެން ޖޫން 30، 2021 އަށް ތައްޔާރުކުރި އޮޑިޓު ރިޕޯޓުގައި ބަލާފައިވަނީ އެ މުއްދަތުގައި އައިއެސްޑީބީއިން ހޯދި 594،000 އެމެރިކާ ޑޮލަރު (9.1 މިލިއަން ރުފިޔާ) އިން ކުރި ހަރަދަށެވެ.
އޮޑިޓު ރިޕޯޓުގައި ބުނެފައިވާ ގޮތުން، އައިއެސްޑީބީން ހޯދި ފައިސާއިން 466،264 އެމެރިކާ ޑޮލަރު (7.1 މިލިއަން ރުފިޔާ) ގެ ސިއްހީ އާލަތްތައް މިދިޔަ އަހަރުގެ ޖޫން މަހުގެ ނިޔަލަށް ހެލްތު މިނިސްޓްރީއަށް ވަނީ ލިބިފަ އެވެ.
އެގޮތުން، އައިއެސްޑީބީއާއި ހެލްތު މިނިސްޓްރީއާއެކު އެއްބަސްވުމެއް ހެދީ އެ މަޝްރޫއުގެ ފުރަތަމަ ފިޔަވަހީގައި ހއ.، ހދ. އަދި ށ. އަތޮޅަށް ބޭނުންވާ ސިއްހީ އާލަތްތައް ފޯރުކޮށްދިނުމަށެވެ.
އެ މަޝްރޫއުގެ ދަށުން އީސީޖީ މެޝިނާއި ދެ ވައްތަރެއްގެ ވެންޓިލޭޓަރާއި ކާޑިއެކް މިނިޓަރާއި ޑީފިބްރިލޭޓަރު ސަރުކާރުން އޮތީ ހޯދައިފަ އެވެ. ނަމަވެސް، އޮޑިޓު އޮފީހުން ބުނި ގޮތުގައި މިދިޔަ ޑިސެމްބަރު މަހުގެ ދެވަނަ ދުވަހާ ހަމައަށް އޭގެ ތެރެއިން ގިނަ އާލަތްތައް ޑިސްޓްރިބިއުޝަން ޕްލޭނާ އެއްގޮތަށް އެ އަތޮޅުތަކަށް ފޮނުވާފައެއް ނުވެ އެވެ.
އެ ތަކެތި ނުފޮނުވައި ގުދަނުގައި ބަހައްޓާފައިހުރީ ހެލްތު މިނިސްޓްރީން ބުނާ ގޮތުން ނަމަ، ބޭރުގެ އެހެން ފަރާތްތަކުން ހަމަ އެފަދަ އާލަތްތައް ލިބެމުންދާތީ، އެއް ބާވަތުގެ އާލަތްތަކެއް މާ ގިނައިން އެއް ތަނަކަށް ފޮނުވުމުގެ ބޭނުން ނެތުމުންނެވެ.
ނަމަވެސް، އެ އޮޑިޓު ރިޕޯޓުގައި ބުނެފައިވަނީ އެ މަޝްރޫއުގެ ބޭނުމަކީ ސިއްހީ ވަސީލަތްތައް ނެތް ތިން އަތޮޅަކަށް އެ ވަސީލަތްތައް ފޯރުކޮށްދިނުން ކަމަށްވާއިރު، އައިއެސްޑީބީގެ އެހީގައި ހޯދި އާލަތްތައް ނުފޮނުވައި ގުދަނުގައި ބެހެއްޓުމަކީ، އެ އަތޮޅުތަކަށް ވަސީލަތްތައް މަދުވެ، ހިދުމަތަށް ބުރު އެރުމުގެ ފުރުސަތު އޮންނާނެ އެވެ.
އެހެންކަމުން، އައިއެސްޑީބީއާއެކު ހަދާފައިވާ އެއްބަސްވުމާ ހިލާފަށް އާލަތްތައް ފޮނުވުމަށް ބަދަލެއް ގެންނަން ބޭނުންވާނަމަ، ޑޯނަރާ މަޝްވަރާކޮށްގެން އެއްބަސްވުމުގައި ހިމެނޭ އެކަމާގުޅޭ ބައިތައް އިސްލާހުކުރުމަށް އޮޑިޓު އޮފީހުން ވަނީ ހެލްތު މިނިސްޓްރީއަށް ލަފާދީފަ އެވެ.
ފިނޭންސް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާގޮތުން، ކޮވިޑާ ގުޅިގެން ސިއްހީ ދާއިރާއަށް ކުރި ހޭދަ ވަނީ 2.15 ބިލިއަން ރުފިޔާ ހުރަސްކޮށްފަ އެވެ.
އޭގެ އިތުރުން، މި ބަލިމަޑުކަމާ ގުޅިގެން އާންމު ފަރުދުންނަށާއި ވިޔަފާރިތަކަށް ސަރުކާރުން ވަނީ އިތުރު 1.77 ބިލިއަން ރުފިޔާ ހަރަދުކޮށްފަ އެވެ.
ކޮވިޑުގެ އެންމެ ނުރައްކާތެރި ވޭރިއަންޓުގެ ގޮތުގައި ސިފަކުރާ އޮމިކްރޯން ވޭރިއަންޓު ރާއްޖޭން ވެސް ފެނިފައިވާއިރު، ކޮވިޑުގެ ކޭސްތައް މިހާރު އަނެއްކާވެސް ވަނީ ވަރަށް ބޮޑަށް އިތުރުވެފަ އެވެ.
އެގޮތުން، އިއްޔެ އެކަނި ވެސް ރާއްޖެއިން 224 މީހުން ވަނީ ކޮވިޑަށް ޕޮޒިޓިވްވެފަ އެވެ. އެއީ މާލެ ސަރަހައްދުން 104 މީހުންނާއި މީހުން ދިރިއުޅޭ ރަށްތަކުން 48 މީހުންނާއި ރިސޯޓުތަކުން 74 މީހުންނެވެ.
