ސަރުކާރުން ހިންގާ ހޮސްޕިޓަލްތަކުގެ އިދާރީ މަގާމްތައް އުވާލުމަށްފަހު، އިދާރީ އޮނިގަނޑަށް ބޮޑު ބަދަލެއް ގެނައުމަށް ހެލްތު މިނިސްޓްރީން ނިންމައިފި އެވެ.
އެ މިނިސްޓްރީން ބުނި ގޮތުގައި ހޮސްޕިޓަލްތަކުގެ ފްރޮންޓް އޮފީސް މެނޭޖްމެންޓް ޔުނިޓަށް މުވައްޒަފުން ހޯދަން މީގެ ފަހުން އިއުލާނު ކުރާނީ ކަސްޓަމާ ސާވިސް އޮފިސަރުންގެ މަގާމަށެވެ. އެއީ ކޭޝިއަރުކަމާއި، ޑޮކްޓަރުންގެ ތަރުޖަމާނުކަން ފަދަ މަގާމްތައް އެއްކޮށްލުމަށްފަހު އުފައްދާފައިވާ މަގާމެކެވެ.
ހޮސްޕިޓަލްގެ އިދާރީ އޮނިގަނޑަށް 14 މާޗް 2021 އިން ފެށިގެން މި ބަދަލު ގެންނަން ނިންމާފައިވީ ނަމަވެސް, މިކަން އަދި އޮތީ ތަންފީޒުނުވެ އެވެ. އެކަމަކު, މި ނޫހާ ވާހަކަ ދެއްކެވި ބައެއް ހޮސްޕިޓަލްތަކުގެ މެނޭޖަރުން ވިދާޅުވި ގޮތުގައި, މި އަހަރު ދެން އަމަލު ކުރަމުންދާނީ އެ ބަދަލާ އެއްގޮތަށެވެ.
މި ބަދަލާއެކު މިހާރު އިދާރީ މަގާމުތަކުގައި ތިބި އެއްވެސް މުވައްޒަފެއްގެ މަގާމަކަށް ނުވަތަ ރޭންކަށް ބަދަލު ނާންނާކެ ކަމަށް ހެލްތު މިނިސްޓްރީންގެ ތަރުޖަމާން މި ނޫހަށް ބުންޏެވެ. އަދި މި ބަދަލާއެކު އެއްވެސް މީހެއްގެ މުސާރައަށް ވެސް އަސަރު ނުކުރާނެކަން އޭނާ ފާހަގަކުރެއްވި އެވެ.
"މިހާރު މަގާމުތަކަށް ނަގާފަ ތިބި އެއްވެސް މީހަކަށް މި އޮނިގަނޑުގެ އަސަރެއް ނުކުރާނެ, އެމީހުންގެ ރޭންކަކަށްވެސް މުސާރައަކަށްވެސް ބަދަލެއް ނާންނާނެ, މާނައަކީ އެ މަގާމުތައް ހުސްވުމުން ދެން ހޮސްޕިޓަލްތަކަށް އަލަށް ނަގާނީ މި އޮނިގަނޑުގެ ދަށުން ކަސްޓަމާ ސާވިސް އޮފިސަރުންގެ މަގާމަށް," ހެލްތު މިނިސްޓްރީގެ މީޑިއާ އޮފިޝަލް ފާތިމަތު ޝޫބާ ވިދާޅުވި އެވެ.
އޭނާ ވިދާޅުވީ މި އޮނިގަނޑާއެކު ހޮސްޕިޓަލްގެ ހިނގުން އިތުރަށް ހަރުދަނާ ވެގެން ދާނެ ކަމަށެވެ. އެގޮތުން ހާއްސަކޮށް ރަށްރަށުގެ ހޮސްޕިޓަލްތަކާއި، ހެލްތު ސެންޓަރުތަކުގައި ދެމުން އަންނަ ހިދުމަތްތައް އަވަސްވެގެން ދާނެ ކަމަށް އޭނާ ގަބޫލު ކުރައްވަ އެވެ.
އަދި މުވައްޒަފުން މަދުވެގެން ހޮސްޕިޓަލުން ދެމުން އަންނަ ހިދުމަތެއް ހުއްޓުމަކަށް ނައިސް، ތިބި މުވައްޒަފުންގެ ބޭނުންކޮށްގެން ހުރިހާ މަސައްކަތެއް ކުރުމަށް މަގުފަހިވެގެން ދާނެ ކަމަށާއި، ގިނަ ދާއިރާތަކަށް މުވައްޒަފުންގެ ލޯ ހުޅުވިގެން ދާނެ ކަމަށް ވެސް އޭނާ ވިދާޅުވި އެވެ.
"މި ބަދަލާއެކު ލިބެން އޮތީ ހުސް ފައިދާ، މުވައްޒަފުން މޯބަލައިޒްކޮށްގެން، ހުރިހާ މަސައްކަތެއްގައި ޝާމިލް ކުރުވުމުގެ ނަތީޖާއަކަށް ވާނީ އެކަކު ސަލާމް ބުންޏަކަށް އެ ހިދުމަތެއް މެދު ނުކެނޑުން," ހެލްތު މިނިސްޓްރީން ބުންޏެވެ.
