ގުޅިފަޅު ކައިރިއަށް ބޯވަ ނަގަން ފޭބި ޒުވާނަކު އޮޔާގޮސް، ގެއްލިގެން އޭނާ ހޯދުމުގެ މަސައްކަތް ސިފައިން ފަށައިފި އެވެ.
ގެއްލިގެން ހޯދަމުން ދަނީ ހދ. ކުމުންދޫ، އަރާއިރު، ޝުރޭހު ހަސަން، 21 އެވެ.
ގުޅިފަޅު ކައިރިއަށް ބޯވަ ނަގަން ކުޑަ ލޯންޗެއްގައި ދިޔަ އެ ޒުވާނާ ގެއްލިގެން ކޯސްޓްގާޑަށް އެންގީ މިއަދު ހެނދުނު 9:00 ހާއިރު ކަމަށާއި އޭނާ ހޯދުމުގެ މަސައްކަތް ޑައިވަރުންގެ ޓީމުން ކުރަމުންދާ ކަމަށް އެމްއެންޑީއެފުން ބުންޏެވެ.
ގުޅިފަޅުގެ ހުޅަނގު ދެކުނު ކަންމަތީގައި ބޯވަ ނަގަން އުޅެނިކޮށް އޭނާ އޮޔާ ދަމައިގަތީ ވާދޫ ކަނޑުތެރެއަށް ހުޅަނގަށް ވާގޮތަށް ކަމަށް މައުލޫމާތު ލިބިފައިވާ ކަަމަށް އެމްއެންޑީއެފުން ބުންޏެވެ. ގެއްލުނު އިރު އޭނާ ލައިގެންހުރީ އަޅިކުލައިގެ ޓީޝާޓަކާއި ކަޅުކުލައިގެ ސޯޓެއް ކަމަށާއި އަޅައިގެން ހުރީ ނޫކުލައިގެ މާސްކެއް ކަަމަށް މައުލޫމާތު ލިބިފައިވާ ކަމަށް ވެސް ބުންޏެވެ.
އޭނާ އާއި ބެހޭ އެއްވެސް ހަބަރެއް ވޭތޯ މިސަރަހައްދުން ދަތުރުކުރާ އުޅަނދުފަހަރުންނާއި މި ހިސާބުގެ ރަށް ތަކުން ބަލައިދޭން ކޯސްޓްގާޑުން އެދެ އެވެ. އެއްވެސް މަޢުލޫމާތެއް ލިބިއްޖެނަމަ ލަސްނުކުރައްވާ ކޯސްޓްގާޑްގެ ހިލޭ ގުޅޭ ނަމްބަރ 191 އަށް ފޯނަށް ގުޅައި އެމައުލޫމާތު ދޭން ވެސް އެދެ އެވެ.
