އަންނަ އަހަރު އޭޑީކޭ ހޮސްޕިޓަލަށް 35 އަހަރު ފުރުމުގެ މުނާސަބަތު ފާހަގަ ކުރުމަށް އެ ހޮސްޕިޓަލުން ހިންގުމަށް ހަމަޖެހިފައިވާ ހަރަކާތްތަކުގެ ތެރެއިން "ދުވާހިތުން" ޗެރިޓީ ރަން މިއަދު އިއުލާންކޮށްފި އެވެ.
އެކަމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އޭޑީކޭގެ މެނޭޖިން ޑިރެކްޓަރު އަހުމަދު އައްފާލް ވިދާޅުވީ އެ ޗެރިޓީ ދުވުމުވައި ބައިވެރިވާ މީހުން ދުވާ ކޮންމެ ކިލޯމީޓަރަކަށް 35 ރުފިޔާ ހަދިޔާކުރަން އޭޑީކޭއިން ވަނީ ނިންމާފައިވާ ކަމަށެވެ.
އޭޑީކޭއިން އެ ފައިސާ ހަދިޔާކުރަން ނިންމާފައިވަނީ ހިތުގެ ބަލިތަކަށް ފަރުވާ ހޯދަމުންދާ މީހުންނަށް އެހީތެރިވަމުންދާ އެންޖީއޯއެއް ކަމުގައިވާ "ޓައިނީ ހާޓްސް އޮފް މޯލްޑިވްސް" އަށެވެ.
އެ ޗެރިޓީ ރަން ފެށުމަށް ހަމަޖެހިފައިވަނީ އަންނަ ޖެނުއަރީ މަހުގެ ފަސްވަނަ ދުވަހުގެ ހެނދުނު 9:00 ގަ އެވެ. މި ހަރަކާތް ފައްޓަވައި ދެއްވަވާނީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހްމަދެވެ.
އެ ހަރަކާތަކީ އާންމުންނަށް ހުޅުވާލައިގެން ހިންގާ ހަރަކާތެއް ކަމުން ބޭނުން މީހަކަށް ދުވުމުގައި ބައިވެރިވެވޭނެ ކަމަށް އޭޑީކޭއިން ބުންޏެވެ. އެ ހަރަކާތް ކުރިއަށް ދާނީ އެކުވެނި ޓްރެކް ސަރަހައްދުގަ އެވެ. އަދި ޖެނުއަރީ ފަސް ވަނަ ދުވަހުން ފެށިގެން 35 ގަޑިއިރަށް އެ ސަރަހައްދުގައި މި ހަރަކާތް ކުރިއަށް ދާނެ ކަމަށާއި ބައިވެރިވާން ބޭނުންވާ މީހުންނަށް އެ ވަގުތު އެސަރަހައްދަށް ގޮސް އިވެންޓުގައި ބައިވެރިވެވޭނެ ކަމަށް ވެސް އޭޑީކޭއިން މައުލޫމާތު ދިނެވެ.
"އަމިއްލަ ނަފްސަށްކޮށްލާ ޗެލެންޖެއްގެ ގޮތުގައި ދެކިގެން މި ހަރަކާތުގައި ބައިވެރިވެލާ ދުވެލުމަކީ އަޅުގަނޑުމެންގެ ވަރަށް ބޮޑު އެދުމެއް،" އޭޑީކޭގެ މެނޭޖިންގް ޑިރެކްޓާ، އަހުމަދް އައްފާލް ވިދާޅުވި އެވެ.
ޗެރިޓީ ރަންގައި ބައިވެރިވާ ކޮންމެ މީހަކު ދުވާ ކޮންމެ ކިލޯމީޓަރަކަށް 35 ރުފިޔާ އޭޑީކޭއިން ހަދިޔާ ކުރާނެ- ފޮޓޯ: އޭޑީކޭ ހޮސްޕިޓަލް
އާންމުންނަށް ހުޅުވާލައިގެން ބާއްވާ މި ހަރަކާތުގައި ކޮންމެ ފަސް ގަޑިއިރަކުން ލަކީ ޑްރޯއެއް ނަގާނެ އެވެ.
މި ލަކީޑްރޯ ކާމިޔާބު ކުރާ މީހުންނަށް ސްޕޯޓްސް މެޑިކަލް ޕެކޭޖެއް ހިލޭ ލިބިގެން ދާނެ ކަމަށް އޭޑީކޭއިން ބުންޏެވެ. އޭގެ އިތުރުން އެ ސަރަހައްދުގައި އޭޑިކޭގެ މުވައްޒަފުން އަބަދު ވެސް ހަރަކާތްތެރިވަމުން ދާނެކަމަށާއި ހަވީރު ހަތަރަކުން ރޭގަނޑު އަށަކާއި ދެމެދު ލޭގެ ޕްރެޝަރު ބެލުން ފަދަ ކަންކަން ކޮށްލުމުގެ ފުރުސަތު ޗެރިޓީ ހަރަކާތުގެ ބައިވެރިންނަށް ލިބިގެން ދާނެ ކަމަށް އޭޑީކޭއިން ބުނެ އެވެ.
މި ހަރަކާތަކީ އޭޑީކޭއަށް 35 އަހަރު ފުރުމާ ގުޅިގެން އެ ހޮސްޕިޓަލުން އަންނަ އަހަރަށް ރާވާފައިވާ ހަރަކާތްތަކުގެ ތެރެއިން އެންމެ ފުރަތަމަ ހަރަކާތް ކަމަށް ހޮސްޕިޓަލުން ބުނެ އެވެ.
މި ޗެރިޓީ ރަން ނިމުމުގެ ރަސްމިއްޔާތު އޮންނާނީ ޖެނުއަރީ ހަ ވަނަ ދުވަހުގެ ރޭގަނޑު 8:00 ޖަހާއިރެވެ. އަދި ނިންމުމުގެ ރަސްމިއްޔާތުގައި އަހަރީ ދުވަހުގެ ރަސްމީ ލޯގޯ އިފްތިތާހް ކުރާނެކަމަށް ވެސް އޭޑީކޭއިން ބުނެ އެވެ.
