ވެއެތުވެދިޔަ ތިން އަހަރު ދުވަހުގެ ތެރޭގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީގެ ޕްރޮޑަކްޝަން ވަރަށް ބޮޑަށް އިތުރުކޮށް، މުވައްޒަފުންގެ އަދަދު ދެ ގުނަކޮށްފައިވާ ކަމަށް އެ ކުންފުނީގެ މެނޭޖިން ޑައިރެކްޓަރު އާދަމް އާޒިމް މިރޭ ވިދާޅުވެއްޖެ އެވެ.
އެމްޓީސީސީއަށް 41 އަހަރު ފުރުން ފާހަގަ ކުރުމުގެ ގޮތުން މިހާރު ބާއްވަމުންދާ ޖަލްސާގައި ވާހަކަ ދައްކަވަމުން އާޒިމް ވިދާޅުވީ، މީގެ ދެ އަހަރު ކުރިން އެ ކުންފުންޏަށް އެއްފަހަރާ އެންމެ ގިނައިން ހިންގާފައި ވަނީ 25 ޕްރޮޖެކްޓު ކަމަށެވެ. ނަމަވެސް މިހާރު އެ ކުންފުނިން އެއްފަހަރާ 94 ޕްރޮޖެކްޓް ކުރިއަށްގެންދާ ކަމަށް އޭނާ ވިދާޅުވި އެވެ. އެހެންކަމުން އެއީ ޕްރޮޖެކްޓްވައިސްކޮށް ބަލާ ނަމަ 73 ޕަސެންޓުގެ ކުރިއެރުމެކެވެ.
"2018 ގެ ކުރިން، މި ކުންފުންޏަށް ހިންގިފައި އޮތީ، އެއްފަހަރާ އެންމެ 25 މަޝްރޫއު. ނަމަވެސް މިއަދު އަޅުގަނޑުމެން، އެއްފަހަރާ 94 މަޝްރޫއެއްގައި އެބަ ހަރަކާތްތެރިވަން. އަދި އެއްފަހަރާ 64 މަޝްރޫއެއް އެއް ވަގުތެއްގާ މިދަނީ ހިންގަމުން،" އާޒިމް ވިދާޅުވި އެވެ.
އޭގެ އިތުރުން އެންމެ ބޮޑު ކާމިޔާބެއްގެ ގޮތުގައި އާޒިމް ފާހަގަ ކުރެއްވީ މުވައްޒަފުންގެ އަދަދު އިތުރު ކުރުމެވެ. އެގޮތުން ކުރިން އެ ކުންފުނީގައި މަސައްކަތް ކުރީ 1500 މުވައްޒަފުން ނަމަވެސް މިހާރު އެ އަދަދު ޑަބަލްކޮށްފައިވާނެ ކަމަށް އާޒިމް ވިދާޅުވި އެވެ.
"މީގެ ތިން އަހަރު ކުރިން، މި ކުންފުނީގެ މުވައްޒަފުންގެ އަދަދަކީ އެންމެ 1500. ނަމަވެސް މިއަދު މިއީ، ވަރަށް މުރާލި 3000 މުވައްޒަފުން މަސައްކަތްކުރާ ކުންފުންޏެއް،" އޭނާ ވިދާޅުވި އެވެ.
އެމްޓީސީސީން މަސައްކަތް ކުރާ ސްޕީޑު ވެސް އަވަސްކޮށްފައިވާ ކަމަށް އާޒިމް ވިދާޅުވި އެވެ. އެގޮތުން އެ ކުންފުންޏަށް ކުރިން ބަނދަރެއް ހެދެނީ ތިން އަހަރުން ކަމަށް އޭނާ ވިދާޅުވި އެވެ. ނަމަވެސް މިހާރު އެ މުއްދަތު އެއް އަހަރަށް ކުޑަކޮށްފައިވާ ކަމަށް އާޒިމް ވިދާޅުވި އެވެ.
މީގެ ކުރިން، މި ކުންފުންޏަށް ބަނދަރެއް ހެދެނީ ތިން އަހަރުން. އެ ސްޕީޑު މިއަދު މިވަނީ އެއް އަހަރަށް ބަދަލުކޮށްފަ. އެއް އަހަރު ތެރޭގަ ހަދާނިންމި ހިމަންދޫ ބަނދަރު، އިއްޒަތްތެރި ރައީސް ވަނީ ހުޅުވާދެއްވާ، އެ ޝަރަފު އަޅުގަނޑުމެންނަށް ދެއްވާފަ،" އާޒިމް ވިދާޅުވި އެވެ.
އެއާޕޯޓު އެޅުން ފަދަ ބޮޑެތި ޕްރޮޖެކްޓުތައް ވެސް ކުރު މުއްދަތެއްގައި އެ ކުންފުންޏަށް މިހާރު ނިންމޭނެ ކަމަށް އާޒިމް ވިދާޅުވި އެވެ.
އެމްޓީސީސީން ކުރިއަށް އޮތް ތަނުގައި ކުރާނެ އެންމެ ބޮޑު މަސައްކަތެއްގެ ގޮތުގައި އާޒިމް ފާހަގަ ކުރެއްވީ އަމިއްލަ ޑޮކްޔާޑެއް ހެދުމުގެ ޕްރޮޖެކްޓެވެ. އެއިރުން ރާއްޖޭގައި ބޭރު ފައިސާ ހިފެހެއްޓި ވަޒީފާގެ ބައިވަރު ފުރުސަތު ހުޅުވިގެންދާނެ ކަމަށް އޭނާ ވިދާޅުވި އެވެ.
"މި ޑޮކްޔާޑުގެ ސަބަބުން ރާއްޖެއިން ބޭރުވެގެންދާ، އެތައް މިލިއަން ޑޮލަރެއް ރާއްޖޭގާ ހިފެހެއްޓުމުގެ ފުރުސަތު ލިބިގެންދާނެ. ދިވެހީންގެ އެތައް ބަޔަކަށް ވަޒީފާގެ ފުރުސަތު ފަހިވެ، ރާއްޖެއަށް ބޭރު ފައިސާ ވަންނާނެ މަގު ތަނަވަސް ވެގެންދާނެ،" އާޒިމް ވިދާޅުވި އެވެ.
މި ސަރުކާރުގެ ވޭތުވެދިޔަ އަހަރުގެ ތެރޭގައި އެމްޓީސީސީން " ފަތުއަޑުކިޔާފަ" ހިންގަމުން މި ގެންދަނީ، ސަރުކާރުން ރައްޔިތުންނަށް ވެފައިވާ ވައުދުތަކުގެ މަޝްރޫއުތައްކަމަށާއި އޭގެ ތެރޭގައި ބިން ހިއްކުމާއި، މަގުހެދުމާއި، ބަނދަރު ހެދުމާއި، އެއާޕޯޓު އެޅުމާއި، ގޮނޑުދޮށްތައް ހިމާޔަތް ކުރުމާއި، ހޮސްޕިޓަލް އެޅުމާއި، ދަތުރު ފަތުރުފަދަ މަޝްރޫއުތައް ހިމެނޭ ކަމަށް އާޒިމް ވިދާޅުވި އެވެ. އެ ކުންފުނީގެ މަޝްރޫއެއް ނުހިނގާ އެންމެ އަތޮޅެއް، ރަށެއް ވެސް ނެތް ކަމަށް އޭނާ ފާހަގަ ކުރެއްވި އެވެ.
"އަޅުގަނޑު ހިތަށް އަރާ، މި މަޝްރޫއު ތަކުގެ މޮޑެލް ތަކެއް، ބުރިޖުމަތީގަ، އެއްކޮޅުން އަނެއް ކޮޅަށް، އަތުރާލެވޭނެ ނަމައޭ. އޭރަށް ކަންނޭނގެ، މި މަންޒަރު ނުފެންނަ ބޭފުޅުންނަށް ވެސް، ރަނގަޅަށް ލޮލަށް ފެންނާނީ. އެ ބޭފުޅުންނަށް، އެ މަންޒަރު، ދައްކާލެވޭނެ ނަމައޭ، އަޅުގަނޑު ހިތަށް އަރާ،" އިދިކޮޅު ފަރާތްތަކަށް އިޝާރަތް ކުރައްވައި އާޒިމް ވިދާޅުވި އެވެ.
