އަރަބިއްޔާ ސްކޫލްގެ ދަރިވަރުން ވަގުތީ ގޮތުން އިއްޒުއްދީން ސްކޫލަށް ބަދަލު ކުރުމަށް އެޑިއުކޭޝަން މިނިސްޓްރީން ނިންމާފައިވާތީ އެކަމުގެ ކަންބޮޑުވުންތައް ހިއްސާ ކުރުމަށް އެ ސްކޫލުގެ ބެލެނިވެރިން އިސްލާމިކް މިނިސްޓަރު ޑރ. އަހުމަދު ޒާހިރުއާ މިއަދު ބައްދަލުކޮށްފި އެވެ.
ވަގުތީ ގޮތުން އިއްޒުއްދީން ސްކޫލަށް އަރަބިއްޔާގެ ދަރިވަރުން ބަދަލުކުރި ނަމަވެސް ހުޅުމާލޭގައި މިހާރު އިމާރާތްކުރާ ތިން ސްކޫލުގެ ތެރެއިން އެއް ސްކޫލް ހާއްސަ ކުރާނީ އެ ދަރިވަރުންނަށް ކަމަށް އެޑިއުކޭޝަން މިނިސްޓްރީން ބުނެ އެވެ. ނަމަވެސް އަރަބިއްޔާ ސްކޫލްގެ ބެލެނިވެރިން ބޭނުންވަނީ ވަގުތީ އިމާރާތެއް ހަދައި އެތަނަށް ދަރިވަރުން ބަދަލު ކުރުމަށެވެ.
އިސްލާމިކް މިނިސްޓްރީން ބުނީ ޑރ. ޒާހިރު ބައްދަލު ކުރައްވާފައި ވަނީ އަރަބިއްޔާ ސްކޫލްގެ ޕީޓީއޭގައި ހިމެނޭ ބެލެނިވެރިންނާ ކަމަށެވެ. އެ ބައްދަލުވުމުގައި ބެލެނިވެރިން ވަނީ އިއްޒުއްދީން ސްކޫލަށް ދަރިވަރުން ބަދަލު ކުރުމާ ގުޅޭ ގޮތުން ހުރި ކަންބޮޑުވުންތައް ހިއްސާކޮށްފަ އެވެ.
އަރަބިއްޔާގެ ޕީޓީއޭގެ ފަރާތުން މިިއަދު އިސްލާމިކް މިނިސްޓްރީއަށް ގޮސްފައި މި ވަނީ އިއްޒުއްދީން ސްކޫލަށް ދަރިވަރުން ބަދަލު ކުރުމާ ދެކޮޅަށް އަރަބިއްޔާ ސްކޫލް ކުރިމަތީގައި މިދިޔަ ހުކުރު ދުވަހު އިހްތިޖާޖް ކުރުމަށްފަހު އެވެ.
ހަމަ ހުކުރު ދުވަހު ޕީޓީއޭގެ ފަރާތުން ނެރުނު ނޫސް ބަޔާނެއްގައި ބުނެފައި ވަނީ އިއްޒުއްދީން ސްކޫލަށް އަރަބިއްޔާގެ ދަރިވަރުން ވަގުތީ ގޮތުން ބަދަލުކޮށްފި ނަމަ "އަޅުގަނޑުމެން ޅަދަރީންގެ އަރަބި އިސްލާމީ ތައުލީމު ފަނާވެ" ގޮަސްފާނެ ކަމަށެވެ. ނަމަވެސް އެހެންވާންޖެހޭ ސަބަބެއް ބުނެފައެއްނުވެ އެވެ.
އިއްޒުއްދީން ސްކޫލަށް އަރަބިއްޔާގެ ދަރިވަރުން ވަގުތީ ގޮތުން ބަދަލު ކުރުމުގެ ބަދަލުގައި ދަރުމަވަންތަ ސްކޫލުގެ ކުދިން ވަގުތީ ގޮތުން ބަދަލު ކުރި ފަދަ ސްޓީލް ސްޓްރަކްޗަލް އިމާރާތެއް ހަދައި، އެތަނަށް ބަދަލު ކުރެވިދާނެ ކަމަށް ބައެއް ބައެއް ބެލެނިވެރިން ބުނެފައިވެ އެވެ.
