އިތުބާރު ކުރެވޭ މަގާމެއްގައި ހުރެ، ފިރިހެނަކު، ކުޑަކުދިންތަކަކާ ޖިންސީ އަމަލު ހިންގާ، އެކުދިން ގްރޫމްކޮށް، އެކުދިން ބޭނުންކޮށްގެން އޮރިޔާން ކާޑު އުފެއްދި ކަމަށް އެއްބަސްވެ، ދައުލަތާ އެކު އިއުތިރާފްގެ އެއްބަސްވުމެއް ހެދުމުން، އޭނާގެ މައްޗަށް އަންނަން އޮތް ޖަލު ހުކުމަށް 46 އަހަރުގެ ބޮޑު ލުޔެއް ދީ ކްރިމިނަލް ކޯޓުން އޭނާ 30 އަހަރަށް ޖަލަށްލުމަށް ހުކުމް ކޮށްފި އެވެ.
ދައުލަތުން އޭނާގެ މައްޗަށް 5 ދައުވާ އުފުލިއިރު، އެ ދައުވާތައް ސާބިތުވާ ވަރަށް ހެއްކާއި ގަރީނާ ހުށަހަޅާފައިވާ ކަމަށް ޕީޖީން ބުންޏެވެ. ނަމަވެސް ދައުވާ ލިބޭ މީހާ ޝަރީއަތުގެ އިބްތިދާއީ އަޑުއެހުމުގައި ކުށަށް އިއުތިރާފްވެ، ދައުލަތާއި އެކު އިއުތިރާފްގެ އެއްބަސްވުމެއް ހެދުމަށް އެދިފައިވާ ކަމަށް އެ އޮފީހުން މައުލޫމާތު ދިނެވެ. ކުޑަކުދިންގެ މަސްލަހަތު ހިމެނޭތީ މި މައްސަލަ ކުރިއަށް ގެންދިޔައީ ސިއްރުންނެެވެ.
ދައުލަތުން އޭނާގެ މައްޗަށް އުފުލި ދައުވާތައް
- އިތުބާރުކުރެވޭ މަޤާމެއްގައިހުރެ ކުޑަކުއްޖަކާމެދު ޖިންސީ އަމަލު ހިންގުން.
- އިތުބާރުކުރެވޭ މަޤާމެއްގައިހުރެ ކުޑަކުއްޖަކާމެދު ޖިންސީ އަމަލު ހިންގުން.
- ކުޑަކުއްޖަކު މެދުވެރިކޮށް އޮރިޔާން ކާޑު އުފެއްދުން.
- މީހުން ދައްކާ ވާހަކަ ސިއްރުން އަޑުއެހުމާއި ފާރަލުން.
- ގްރޫމްކުރުން.
މި ދައުވާތައް ސާބިތުވެއްޖެ ނަމަ އެމީހާގެ މައްޗަށް ޖުމްލަ 76 އަހަރުގެ ޖަލު ހުކުމެއް އަންނާނެ އެވެ. އެހެން ނަމަވެސް ދައުލަތާއި އެކު އިއުތިރާފްގެ އެއްބަސްވުމަކަށް ދިއުމުން ތިން ދައުވާއެއް އަނބުރާ ގެނެސް، އޭނާގެ މައްޗަށް ކުރީ ދެ ދައުވާ އެކެވެ. އެއީ ކުޑަކުދިންނާއި އެކު ޖިންސީ އަމަލެއް ހިންގު ކަމުގެ ދެ ދައުވާ އެވެ.
މިމައްސަލަ ބައްލެވި ގާޒީ ދީބަނާޒް އޭނާގެ މައްޗަށް 30 އަހަރުގެ ހުކުމެއް މިއަދު އިއްވީ، އެ ދެ ދައުވާވެސް ސާބިތުވާ ކަމަށް ކަނޑައެޅުމަށް ފަހު އެވެ.
ޖިނާއީ އެކި ކުށްތަކުގައި ތުހުމަތުކުރެވޭ މީހުންނާއި އެކު އިއުތިރާފުގެ އެއްބަސްވުމެއް ވުމުގެ ފުރުސަތަކީ ޖިނާއީ އިޖުރާއަތުގެ ގާނޫނުގެ ދަށުން ހުޅުވިފައިވާ ދޮރެއްކަން ފާހަގަކަކޮށް ޕީޖީން ބުނީ ދައުލަތާ ދެމެދު އެއްބަސްވުމަކަށް އައުމުގެ ނަތީޖާއަކީ މައްސަލަތައް އަވަސްވެ، ޖިނާއީ އަދުލުގެ ނިޒާމަށް އޮންނަ ބުރަ ބޮޑުތަނުން ކުޑަވެގެންދިއުން ކަމަށެވެ.
އަދި އެކަމުގެ ސަބަބުން ދައުވާ ލިބޭ މީހާއަށްވެސް ބޮޑެތި ލުއިތަކެއް ލިބުމުގެ ފުރުސަތު އޮންނަކަން އެ އޮފީހުން ފާހަގަކުރި އެވެ.
"މައްސަލަ އާއްމު އުސޫލުން ކުރިއަށް ގެންގޮސްގެން ދައުވާތަށް ސާބިތުކޮށްދެވުނުނަމަ 76 އަހަރުގެ ހުކުމެއް އައީހެވެ. ނަމަވެސް އިއުތިރާފުގެ އެއްބަސްވުމުގެ ދަށުން އަދަބު ވަނީ 30 އަހަރަށް ކުޑަކުރެވިފަ އެވެ." މިމައްސަލައާއި ގުޅިގެން ޕީޖީން ނެރިފައިވާ ބަޔާނެއްގައި ވެއެވެ.
އެ އޮފީހުން ގަބޫލުުކުރާ ގޮތުގައި ދައުލަތުގެ މަސްލަހަތުގައި އޮތީ އަނިޔާ ލިބުނު ކުދިންގެ މަސްލަހަތު ހިމާޔަތް ކުރުމެވެ.
"މިމައްސަލައިގެ ޝަރީއަތެއް ހިނގާނަމަ، އަނިޔާ ލިބުނު ކުދިންގެ ހެކިބަސް ނަގައި، އެކުދިން އަލުން މިކަމުގެ ތެރޭގައި ޝާމިލުވާންޖެހޭގޮތް މެދުވެރިވާނެ. ރީވިކްޓިމައިޒްވުމުގެ ފުރުސަތު އޮންނާނެ. އެހެން ނަމަވެސް ކުށަށް އިއުތިރާފުވާ މައްސަލަތަކުގައި މި އުސޫލުގެ ދަށުން ޝަރީއަތުގައި އިއުތިރާފުވާނަމަ، ލުއި ދީގެން އަވަހަށް ޝަރީއަތް ނިމުމުން މިދެންނެވި ކަންކަމުން ސަލާމަތްވެފައިވޭ،" ޕީޖީން ބުންޏެވެ.
އެ އޮފީހުގެ އަމާޒަކީ ޕްލީ ބާގެއިންގެ ތެރެއިން ވީހާވެސް ގިނަ މައްސަލަތައް ކުރިއަށްގެންގޮސް އަވަހަށް ނިންމުމެވެ.
