ޕެޝާވަރް، ޕާކިސްތާން (ޑިސެމްބަރު 12) - ޕާކިސްތާނުގެ ހުޅަނގު އުތުރުގައި ޕޯލިއޯ ވެކްސިން ދޭ ޓީމަކަށް ސެކިއުރިޓީ ފޯރުކޮށްދޭން ހުރި ފުލުހަކަށް ބަޔަކު ހަމަލާދީ މަރާލައިފި އެވެ.
ފުލުހުން ބުނީ މިއީ ފާއިތުވި ދެ ދުވަހުގެ ތެރޭގައި އެފަދަ ގޮތަކަށް ފުލުހަކު މަރާލި ދެ ވަނަ ފަހަރު ކަމަށެވެ. ހައިބަރް ޕަހްތުންހްވާ ޕްރޮވިންސްގައި ފުލުހަކަށް ހަމަލާދީ މަރާލާފައި ވާއިރު، ދެ ދުވަސް ކުރިން ހަމަ އެ ސަރަހައްދުގައި ޕާކިސްތާން ތާލިބާނުން ދިން ހަމަލާއެއްގައި ފުލުހަކު މަރުވި އެވެ.
އެ ފުލުސް މީހާއަކީ ވެސް ވެކްސިން ޓީމަކަށް ރައްކާތެރިކަން ފޯރުކޮށްދޭން އުޅުނު މީހެކެވެ.
"ސައިކަލުގައި ހަތިޔާރު ހިފައިގެން ދިޔަ ދެ މީހަކު ޝެއިހް އުއްތަރް ސަރަހައްދުގައި ދެ އަންހެން މެމްބަރުން ހިމެނޭ ޕޯލިއޯ ވެކްސިން ޓީމަށް ސެކިއުރިޓީ ފޯރުކޮށްދޭން ހުރި ފުލުހަކަށް ހަމަލާދިނުމުގެ ސަބަބުން އޭނާ ވަގުތުން މަރުވި،" އެ ޑިސްޓްރިކްޓުގެ ފުލުހުންގެ ވެރިޔާ ސައްޖަދް ހާން އޭއެފްޕީ އަށް ވިދާޅުވި އެވެ.
ފުލުހުން ބުނީ ހަމަލާ ދިން ދެ މީހުން ފިލާފައިވާ ކަމަށެވެ. ހަމަލާގެ ޒިންމާ މިހާތަނަށް އެއްވެސް ފަރާތަކުން އުފުލާފައެއް ނުވެ އެވެ. ނަމަވެސް ހޮނިހިރު ދުވަހު ދިން ފުރަތަމަ ހަމަލާގެ ޒިންމާ ޕާކިސްތާނުގެ ތާލިބާނުން ވަނީ އުފުލާފަ އެވެ.
ހަމަލާތައް ދޭން ފަށާފައި މި ވަނީ ސަރުކާރާއި ތާލިބާނާ ދެމެދު ގާއިމްކުރި އެއް މަސް ދުވަހުގެ ސުލްހަ ހުކުރު ދުވަހު ނިމުމަކަށް އައުމުންނެވެ. މުއްދަތެއް ނެތް ގޮތުގައި ސުލްހަ ދަމަހައްޓަން ބޭނުން ކަމަށް ބުނުމަށް ފަހު، ހުކުރު ދުވަހު ތާލިބާނުން ސަރުކާރަށް ތުހުމަތު ކުރީ އެއްބަސްވުމާ ހިލާފުވި ކަމަށެވެ.
ޕާކިސްތާނު ތާލިބާނުންގެ ލީޑަރު ނޫރް ވަލީ މެހްސޫދް ހުކުރު ދުވަހު ނެރުނު އޯޑިއޯއެއްގައި ބުނީ ސަރުކާރާ އެކު ކުރި މަޝްވަރާ އިން ވެސް ކުރިއެރުމެއް ނުލިބުނު ކަމަށެވެ.
މިދިޔަ އޮކްޓޯބަރު މަހު ބޮޑު ވަޒީރު އިމްރާން ހާން ވިދާޅުވީ 2014 ވަނަ އަހަރަށް ފަހު ތާލިބާނާއި ސަރުކާރާ ދެމެދު ފުރަތަމަ ފަހަރަށް މަޝްވަރާ ފެށީ އަފްގާނިސްތާނުގެ ވެރިކަމަށް އައި ތާލިބާނުންގެ އެހީއާ އެކު ކަމަށެވެ.
އަފްގާނިސްތާނުގެ ތާލިބާނުންނާ އެއް ގޮތަށް މަސައްކަތް ކުރާ ތެހްރީކޭ ތާލިބާން ޕާކިސްތާން (ޓީޓީޕީ) ގެ ސަބަބުން 2007 ވަނަ އަހަރުން ފެށިގެން ޕާކިސްތާނުގައި ނުރައްކާތެރި ހަމަލާތައް އިތުރުވި އެވެ.
މީގެ ކުރިން ވެސް ޕާކިސްތާނުގައި ވެކްސިން ޓީމުތަކުގެ ސެކިއުރިޓީ ބަލަހައްޓާ ފުލުހުންނަށް ހަމަލާތައް އަމާޒުވެފައި ވެ އެވެ. ޕޯލިއޯ ވަރަށް ބޮޑަށް އަދިވެސް އޮތް ހަމައެކަނި ދެ ގައުމުގެ ތެރެއިން އެއް ގައުމަކީ ޕާކިސްތާނެވެ.
ނަމަވެސް ގްލޯބަލް ޕޯލިއޯ އިރޭޑިކޭޝަން އިނީޝިއޭޓިވް އިން ބުނީ މި އަހަރުގެ މިހާތަނަށް ރިޕޯޓުކޮށްފައި ވަނީ އެންމެ ކޭސްއެއް ކަމަށެވެ. އެކަމަކު 2020 ވަނަ އަހަރު 84 ކޭސް ރިޕޯޓު ކުރި އެވެ.
