ޕެޝާވަރު، ޕާކިސްތާން (ޑިސެމްބަރު 9) - ޕާކިސްތާން ސަރުކާރާއި އެ ގައުމުގެ ތާލިބާން ޖަމާއަތާ ދެމެދު އެކުލަވާލި ސުލްހައިގެ އެއްބަސްވުމުގެ ދަށުން 100 އެއްހާ މީހުން ޖަލުން މިނިވަންކޮށްފި އެވެ.
އަފްގާނިސްތާނުގެ ތާލިބާނުންނާ އެއް ގޮތަށް މަސައްކަތް ކުރާ ތެހްރީކޭ ތާލިބާން ޕާކިސްތާން (ޓީޓީޕީ) ގެ ސަބަބުން 2007 ވަނަ އަހަރުން ފެށިގެން ޕާކިސްތާނުގައި ނުރައްކާތެރި ހަމަލާތައް އިތުރުވި އެވެ.
ޓީޓީޕީއާ ދެކޮޅު ބޮޑު އޮޕަރޭޝަނެއް ފެށިތާ ހަތް އަހަރު ފަހުން، ޕާކިސްތާން ސަރުކާރުން މިހާރު މަސައްކަތް ކުރަނީ އަފްގާން ތާލިބާނުން ވެރިކަމަށް އައި ގޮތުން ހިތްވަރު ލިބި ޓީޓީޕީ އިން އެނބުރި އަންނަން މަސައްކަތް ކޮށްފާނެތީ އެކަން ހުއްޓުވުމަށެވެ.
އެގޮތުން ސުލްހައިގެ މަޝްވަރާތައް ކުރަމުން ދާއިރު، ބުރާސްފަތި ދުވަހު ނިމެން ހަމަޖެހިފައި އޮތް އެއް މަސް ދުވަހުގެ ސުލްހައިގެ އެއްބަސްވުން ވަނީ ދިގުދަންމާފަ އެވެ.
"ފާއިތުވި 10-15 ދުވަސް ތެރޭގައި 100 އެއްހާ ތާލިބާން ހަނގުރާމަވެރިން ދޫކޮށްފި. އެއީ ތަންކޮޅެއް ދަށް ރޭންކުގެ ހަނގުރާމަވެރިން. އެ މީހުންގެ ހަރަކާތްތައް މޮނީޓާކުރަމުން ދާނެ،" ސަރުކާރުގެ އޮފިޝަލަކު ބުންޏެވެ.
އަފްގާނިސްތާނުގައި ހުރި ޓީޓީޕީގެ އިސްވެރިޔަކު އޭއެފްޕީ އަށް ބުނީ ހަނގުރާމަވެރިން މިނިވަން ކުރުމަކީ ސުލްހައިގެ މަޝްވަރާ ކުރިއަށް ދާއިރު، އިތުބާރު ގާއިމްކުރަން މުހިއްމު ފިޔަވަޅެއް ކަމަށެވެ.
"ޓީޓީޕީގެ ލީޑާޝިޕުން ވަނީ މުއްދަތެއް ނެތް ގޮތަށް ސުލްހައިގެ އެއްބަސްވުން ދަމަހައްޓަން އެދޭކަން ހާމަކޮށްފައި،" އޭނާ ބުންޏެވެ.
މިދިޔަ އޮކްޓޯބަރު މަހު ބޮޑު ވަޒީރު އިމްރާން ހާން ވިދާޅުވީ 2014 ވަނަ އަހަރަށް ފަހު ޓީޓީޕީ އާއި ސަރުކާރާ ދެމެދު ފުރަތަމަ ފަހަރަށް މަޝްވަރާ ފެށީ އަފްގާނިސްތާނުގެ ވެރިކަމަށް އައި ތާލިބާނުންގެ އެހީއާ އެކު ކަމަށެވެ.
މަޝްވަރާތަކާ މެދު ޕާކިސްތާނުގެ ގިނަ ބަޔަކު ނުރުހެ އެވެ. އެއީ ޓީޓީޕީ އިން ސްކޫލުތަކާއި، ހޮޓެލްތަކާއި، ޗާޗުތަކާއި، މާރުކޭޓުތަކަށް ދީފައިވާ ހަމަލާތަކުގައި 70،000 އަށް ވުރެ ގިނަ މީހުން މަރުވެފައި ވާތީ އެވެ.
